假如你係華叔……
2014/04/12 10:14:57 網誌分類: 生活
這令我想起28年前的一幕。那時阿爺搞《基本法》起草委員會，內裏有兩個民主派草委，一個是李柱銘，一個是司徒華，李馬丁行事大開大闔，似鬼佬作風，華叔較為深謀，有中國人的智慧。
當時傾到政制方案的關鍵部位，有親北京委員提出保守方案，街外有人建議他們辭職唔玩。我那時是記者，去到廣州白天鵝酒店華叔住的房間，問他點睇。華叔開門迎客，等我入房後先把電視聲開到大一大，嘈到我要貼近他嘴邊才聽到他的說話。華叔話：「小心有偷聽呀！呢個係最原始的方法防止偷聽。」
華叔話除非去到必要時候，否則他不會辭草委之職，「一日有得同共產黨爭取，都要盡力爭。辭職好易，反枱好易，反咗枱又點呀？」他的理念好簡單，一方面堅持民主原則，一方面爭得幾多得幾多，盡爭。（後來華叔在八九年六四事件後辭去草委一職，這又是後話了）你睇華叔這樣驚偷聽，就知他十分不信任共產黨，但他亦不是不傾不講，大有「怕乜同你傾」之勢。
如今泛民在政改問題有兩種態度，民主黨這類溫和民主派都有少少想有協調方案，但激進民主派就認為同阿爺傾都無謂，馬上上街啦，溫和派比較弱勢，所以阿爺叫他們去上海，他們就遲遲唔想去咁款，結果民主黨派了單仲偕和黃碧雲去上海，不是最大粒的陣容，擺出一個「叫做出席吓」的態度。唉，未去都預咗無得傾，又是否一個合理態度？
有人話最近的區議會海怡西選區補選，嚇怕了民主黨，因為人民力量的袁彌明有1083票，得票仲多過民主黨的單仲偕，係激進民主派打贏溫和民主派，經此一役，民主黨更不想同阿爺傾，以免未來失票更多。喂，大佬，大家睇清楚，單仲偕一個白髮中坑，袁彌明一個後生靚女，大家都無在地區工作的往績，選民當然是選靚女不選中坑啦，和激唔激進關係有限啦，選民覺得區議員都無大用，選個靚女得閒落區向我匯報工作也好呀。若民主黨被海怡區選結果嚇怕，頭腦又是否簡單了一點？
回頭說政改，阿爺擺明企硬，但又是否寸步不可讓呢？同阿爺傾，向他爭取，又是否一定無結果呢？傾也不敢傾，或者預了只是做騷不預有結果，又會否辜負市民期望？好多人都希望泛民和阿爺傾出一個妥協方案，等2017年有普選，而不是未傾就想住反枱。如果華叔還在，相信他亦不怕和阿爺傾，當然，傾的時候，也不會丟失立場啦。
wh.lo@bastillepost.com
盧永雄
回應 (0)
我要發表