金兄在9月講

金兄在9月講：

行得慢，避到大海嘯是永生神對您的祝福。我估計中國領導人換班、08奧運再加美國大選的政治市總有煙花放盡的一天，現在個市對壞消息無反應（美國經濟放緩及信貸危機），完全不肯調整，是極不正常，但旺市莫估頂，可能真的要再沖一轉才肯跌。最後一注博得去得太盡就預左會有反艇的危險。我認識靠炒股發達而又得到快樂家庭的真係好少，但蠢蠢地有閑錢就買好股如匯豐、中石油等等收埋收埋的小富婆真的有幾個，平時開開心心，又不憂愁年老生活，令人羨慕。互勉之。

曹兄在11月講：

美國出現三低三高

油價唔止睇100美元

　　滬深三百指數跌1.46％。油價上升令航空股全面下挫，中國國航跌4.7％、南方航空跌5.6％、長安汽車跌8％，只有中石化升7.3％、中海油升3.7％；寶鋼跌3.5％、鞍鋼亦跌6.7％。

　　今天期油價一度見96.24美元，係1983年成立期油市場以來最高。2002年至今油價升幅已好大，依家已經唔係睇100美元一桶，而係睇125美元（如土耳其揮軍入侵伊拉克，加上美國可能向伊朗動武，局勢不安將令油價最少升多20美元）。

　　市場似乎仍未接受Bernanke Boom。去年2月1日貝南奇接手聯儲局主席後，大量唔信任佢的分析員不斷攻擊佢的黃金歲月論，忘記左唔好同聯儲局作對的教訓。貝南奇的「唔太熱唔太冷」經濟論，同格老的「有危機便出手挽救」策略唔同。總之，經濟好之時佢便放冷空氣，經濟差時佢便放暖流……。道指由去年2月1日的11000點升至依家的 14000點，可以講達到佢唔冷唔熱的要求。

高科技股正在轉身

　　貝南奇上任至今，美國出現三低三高情況（三低係美元匯價低、美國樓價低及美元利率低；三高係油價高、金價高及股市高）。上任至今道指上升27％，但如扣除美元匯價回落升幅並唔大；總之係唔太冷唔太熱。

　　恒生指數由去年2月由16000點起步，到今年8月20日20000點，升幅亦只係25％。至於8月20日恒指由20000點升到近日接近32000 點，則同貝南奇無關，而係受港股直通車計劃刺激。過去十一個星期唔少人身家多左50％（恒指由不足20000點升上32000點），但相信80％投資者都 跑輸大市，因為：一、散戶壞習慣止賺唔止蝕，大部分優質股都太早賣掉，留番D唔曉升的股份係手。二、受到泡沫論專家的言論影響而唔敢入市，眼光光睇住個市係十一個星期內上升60％而自己冇份，正式生人唔生膽。唔少人認為聯儲局只會減息兩次？坦白講，美國樓價唔會因呢次減息而唔再下跌，次按問題亦唔會從此消 失，因此美國第三次減息必定出現，至於係今年12月或明年1月則木宰羊。每年11月至1月係股市傳統旺季，你又點睇？恒生指數32000點係咪好影響各位 心情？各位忘記Sector-specific holdings的策略？家下高科技股正在轉身，加上明年係美國大選年，通常係大選年出現衰退的機會唔大。過去三十年（因為1975年前我老曹自己亦懵懵 下，真正開竅係1978年鄧小平上台後，係眼見五十萬中國移民非法進入香港時叫人炒樓開始）我老曹體會到世界趨勢不斷改變，只要追隨趨勢去揀股及hold on，成為小富並唔難。1984年中英《聯合聲明》草簽宣布限制港府賣地每年五十公頃，提供左買樓可以發達的途徑，你亦可投資地產股發達。上述限制 1997年7月1日取消，呢段長達十三年的地產大牛市如果未能令你成為小富，反而係賣地限制取消、取而代之係八萬五房屋政策時你卻去買樓，冇人幫到你。

　　特區政府另一土地政策更改係2003年9月「孫九招」，但威力已遠不及每年賣地局限五十公頃的政策。另一個趨勢大改變係中國對原材料需求急升，到2000年 已無法自給自足，開始從海外大量入口原材料，引發全球資源價格大升值，再加上2002年1月開始因2001年1月1日美國減息而引發美元大貶值……，炒賣資源股令畢非德亦獲利驚人。今年中央的政策好明顯：開始限制高耗能、高染污、低附加值製造業發展，鼓勵及配合高科技行業！現階段應投資內地高科技股。有智 慧不如趁勢：試想想ipod對Apple股價的影響？一件成功產品，可令公司股價上升二十倍或以上！

港股非理性亢奮

　　1984至97年本港樓價由600元一呎升上12000元一呎，上升二十倍，創造左本港地產界巨人，今天佢地的財富已富可敵國。2000年至今資源價 格上升，令中東、俄羅斯、澳洲、加拿大甚至中國資源股的財富上升速度極度驚人。新興市場產生唔少巨富，因為全球資金正從美國、歐洲、日本等成熟經濟市場流向新興市場。我老曹睇好明年高科技項目（無論軟件或硬件）。

　　一個Boom可以維持幾耐？短則三五年、中期係七年至九年，最長期係十一年到十三年（例如1984至97年本港樓市係十三年繁榮期），千祈咪估頂。周二乾貨輪指數出現大幅回落，係咪代表2001年開始的原材料價格上升周期見頂（因為已有七年）？其中又以好望角型乾貨輪（最大型號）租金跌幅較大。分析員 指可能係受中國鋼鐵生產量見頂影響，反映中國鋼鐵廠對鐵礦砂需求增長開始回落；估計下一步將影響煤價；反之，對小麥需求仍好大，對乾貨輪（小靈通型）租金有支持。鐵礦砂運載佔去好望角型乾貨輪運量25％，中國鋼鐵產量過去十年由佔全球8％到去年佔35％，波羅的海指數今年6月由6000點起最高見 15515點，升幅令人咋舌，周二開始回落，要小心。

　　恒生指數今年8月20日起進入1996年格蛇指摘道指「非理性亢奮」的情況，但道指係2000年1月升穿10000點才回落。恒生指數由8月20日起 進入非理性亢奮，最後升幅幾多、日子有幾長？我老曹完全木宰羊（連格蛇都估唔到，我老曹點會有資格估到？更何況美元仍未轉強，通常美元轉強後一段日子，恒生指數才轉弱），國企、紅籌股的re-rating情況正向其他股份擴散。全球氣候暖化，北極熊漸漸失去生存空間；過去兩個半月如做「熊」便慘被追殺，因 為呢個冬天不太冷。

　　聯儲局第二次減息，代表寬鬆貨幣政策持續。減息可否挽救美國樓市？Case-Shiller指數已連續二十一個月下跌，8月份二十個最大城市中，有十六個仍下跌（7月份只有十個），其中十五個係過去一年負增長。跌幅最大係坦帕，下跌10.1％；第二係底特律跌9.3％，第三聖地牙哥跌8.3％、第四鳳 凰城跌8％。由去年中開始美國樓價便下跌，9月份數字快公布，相信跌幅正加快。過去八年美國樓按上升135％，至10.1萬億美元。美國第三季GDP增長 3.9％（第一季0.6％，第二季3.9％），證明未受房地產價格回落影響。令人擔心的反而係第四季GDP增長率能否保持？大摩估計美國第四季GDP增長 率僅1.1％。

　　投資者點解為股市擔憂？點解唔用心揀股？港元追隨美元回落快六年，油價已接近100美元一桶、金價接近800美元一盎斯，係呢個水平仲能夠上升幾多？以購買力計，美元已進入偏低期，皆因人人睇 淡；2002年至今美匯指數回落48％（失去接近一半匯價）。

養成旁觀者心態

　　金錢、政治與狂躁症，你肯定自己唔係Public Thinking的受害者？如你想法同群眾一致，咁你就係群眾的一分子而唔係領導者，小心自己亦犯左狂躁症。請留意booms and busts初期所發出的訊號（寧買當頭起，莫買當頭跌！），將群眾的一致行動轉化為個人機會（咁講可能政治上唔正確）。要成功便須出類拔萃，而非人云亦云。成功與失敗、賺錢與虧損往往只係一線之差，一切由小小一個洞察力（insight）開始，就係過去三十年我老曹一再強調要洞燭先機，而唔係勤力過人。要洞燭先機首先學習觀察入微，不可傲慢，更加不可有偏見。當局者迷、旁觀者清，你能否養成旁觀者心態？群眾盲目咁相信一切、悲觀者否定一切，只有實事求是 者才看清一切。傲慢與偏見往往帶來災難，勝利往往帶來失敗，群眾最終註定做錯事，無論係政治或股市，結果都一樣。

259