出爐影帝古天樂公司旗下藝人宣萱（Jessica）和新晉男演員吳肇軒、胡子彤和朱鑑然，談到拍電影就非常雀躍。入行二十多年的宣萱坦言，過往很少接觸電影，未來好想演奸角，演得愈衰就愈開心。而三位男演員均稱是好兄弟，目標是希望多作新嘗試、演好每一部戲，盼望用5年時間令觀眾記得自己：「總之提起香港男演員就會諗起我哋。」
去年重返TVB娘家拍了兩套大熱劇集的宣萱，人氣再次急升，由於工作不斷，去年她加盟昔日拍檔古仔旗下的經理人公司，嚟緊不但會返內地拍劇，仲會拍電影，她坦言：「冇諗過竟然有機會拍戲，將會開拍《犯罪現場》同《尋秦記》，基本上今年都好唔得閒。」
一衰衰到盡
問宣萱最想演甚麼電影角色時，她笑笑口話：「想演衰衰嗰啲，因為二十幾年做嚟做去都係專業人士比較多，通常都係女強人，做得多有啲悶，衰人真係少啲搵我做，但我鍾意做，嚟緊返內地拍嗰部都係做衰人，佢哋話你會害埋你個女喎？我話啱喇。（即係個角色愈衰愈好？）係，唔好衰衰哋又唔係咁衰，一衰要衰到盡。」她記得幾年前拍過套劇叫《愛情悠悠藥草香》，「我日日係毒吓人、打吓人，我拍得好開心，哈哈哈，有啲變態。」至於跟誰合作都冇所謂，都是新嘗試。
做個好演員
24歲的吳肇軒14年拍攝黃修平導演的《哪一天我們會飛》而為人所認識，今年初就與劉嘉玲合演《以青春的名義》。修讀演藝學院的他興奮表示：「嚟緊我會有幾套戲上映，先有邱禮濤執導、同吳鎮宇、袁詠儀合作嘅《家和萬事驚》，另一部《翠絲》就係姜皓文做變性人嗰套，我會做佢個仔，都經歷咗好多嘢；仲有《逆向誘拐》都就嚟會上，跟住我會去台灣拍個半月戲，做一個香港過台灣嘅留學生，（要講普通話嗎？）要，但容許有少少唔準，相信講講吓會愈嚟愈準。」未來目標是做一個好演員。
試不同角色
26歲的胡子彤是現役香港棒球員，16年在電影《點五步》中飾演細威，並憑此片獲得第36屆香港電影金像獎「最佳新演員」。他表示：「上年同鎮宇哥、潘燦良同黃德斌拍咗套《逆流大叔》，講幾個中年uncle扒龍舟，四個男人去到唔同階段所遇到嘅各種問題，係一部幾男人味重嘅電影，今年大約6月端午節就會上。」而他的目標比較明確，「可能因為我係運動員出身，我唔抗拒演一啲好正面陽光嘅角色，但我好希望嚟緊可以嘗試多啲唔同嘅嘢，同埋希望五年後大家諗起香港男演員，就會第一時間諗起我哋三個。」
開發新思維
29歲的朱鑑然為前香港游泳代表隊隊員之一，最近作品有早前播出的網劇《無間道》，他飾演洛威一角，他表示：「啱啱拍完另一部網劇叫《蝕日風暴》，同張智霖及薛凱琪合作。」提起快上映的電影《逆向誘拐》，他感觸說：「係我第一次同阿軒做對手戲，記得拍呢套戲時啱啱簽公司，𠵱家諗番起嗰陣時同《蝕日風暴》嘅拍攝經驗，大家都成長咗唔少。」問他最想與哪位導演合作？他坦言：「我目前真係唔敢開名，我覺得好似愈演愈lost，未來希望每遇到一位導演，就可以開發到我一啲新嘢出嚟。」我覺得三位男演員仲年輕，還有好長的路要行，總之唔好怕蝕底、豁出去，並做到最好為止就可以了，預祝他們成功！ 主持：黃柏高
統籌：林永匡
協力：李佩儀
攝影：李權威、謝民光
場地：國金軒（尖沙咀） | 
