30/4~3/5 急升暴跌

30/4 周一恒指收報30808, 急升527點(最多上升572點)

國指收報12331, 急升264點(最多上升295點), 國指大幅跑贏恒指

港股急升暴跌是常態.好淡通殺

今日港股爆升, 一舉突破過去兩周高位30665及30849, 高見30853, 不過今日係乾升挾淡畫月線, 消息面並不配合升勢, 反彈千點夠水位俾大鱷轉身, 上到現水平即近期波動區間上方(30000~31000)只會惹來更大沽壓, 30800升穿不難.企穩不易

港股只係虛火上升, 消息面及成交都不支持升勢, 點升上黎就點落番去, 今日的上升裂口30336~30483點都要回補

4/4見底29518後三扒兩撥彈番上去, 12/4見頂31094後展開跌浪, 26/4見低位29871後連彈兩日爆上30853, 從整個4月走勢來看, 係上旬見頂後一路走鬼碌落山, 4月埋單得以收升全靠呢兩日合共大升801點, 大市明明處於跌勢, 但就夾硬畫月線收陽收升, 升得好假, 其實成個月都係走貨撤退格

~~~~~~~~~~~~~~~~~~~~~~~~~~~~~~~~

超級星期的陰霾

本周重頭戲係中美貿易談判, 聯儲局議息, 友邦.恒生周五(4/5)公布業績, 市場憧憬周五(4/5)匯控公布首季業績會否宣布回購, 我認為匯控強係因為QQ弱, 有大量QQ好倉及牛牛拉住QQ後腿, 大媽走QQ以及科技股俾狂人打瓜左, 大鱷想推高港股只好推匯控上山, 基金泊入匯控亦有避險作用, 匯控.友邦.恒生公布業績前炒高亦要慎防見光死, 當天亦係平安好醫生上市日, 而周六(5/5)轉節氣立夏, 預示有大變

根據慣性走勢, 通常港股一轉向就會非常急勁, 彭彭聲就升跌千點, 不過跟住又會掉頭, 唔好見港股急升就以為冇事, 其實係暗湧處處, 美元直指92，今次美元突然走強連外匯專家都跌眼鏡，而家專家預測會上93, 美債息雖然沖高回落，但仍處高水平，人民幣及港匯走弱，股匯債形勢都不利港股

今日係月尾最後一天, 大鱷屠熊追數, 又係乾升挾淡, 成交係24/4以來最細, 並不配合升勢, 未來幾日立立亂, 今日的買盤可能係淡友補空倉, 基金經理唔似會在現水平追貨, 港股現處近期波動區間上方, 我估會走貨減磅,

未來幾日港股會有大震盪, 加息陰霾, 內地加強金融監管, 貿易戰, 市場上充斥着大量負面因素, 普遍投資者都傾向趁反彈沽貨減磅, 亦會拖低大市

2/5 周三恒指收報30723, 跌84點(最多下跌237點, 一度上升16點), 失守50.60天線

國指收報12193, 跌137點(最多下跌209點), 失守50.100天線, 國指大幅跑輸恒指

連升斷纜牛命危.指標股轉勢向下.代表大市已見頂

牛牛已上移至屠殺範圍, 今晚聯儲局議息, 小心明日大裂口落山屠牛, 重倉牛在29800~30200, 後市不妙, 連業績股未見光都死埋, 今晚議息揭盅, 股匯債都會非常波動, 美元愈走愈高, 嚇屎人, 利淡股市, 5月形勢不妙, 會有更驚嚇的大插插, 隊穿26/4低位29871

今日恒指拗腰收窄跌幅, 會令人有錯覺以為係好友反擊, 跌唔落之類, 其實係幕後黑手夾硬推番大市上去, 目的係扮強引好友牛牛入局, 收市睇牛熊分布果然有大量牛牛進場, 30200~30500有BB牛979張, 如上破30850爆頂貼價熊亦只得約千張, 取易不取難, 反正中美股市反艇, 梗係借勢推落山啦!

大鱷周一食完熊熊有可能掉頭殺牛, 今日港股死唔去就引左牛牛進場並上移, 證明大鱷扮跌唔落策略成功, 引好友牛牛入局, 即市見大市收窄跌幅, 散戶感覺良好就中伏了, 收市後做功課就發覺大市已出現轉向訊號, 大市今日高位低過昨日, 國指底頂下移, 一眾指標股齊齊見頂回落, 係利淡訊號

雖然上面有勁多肥熊, 但大鱷試過唔食肥熊就裂口低開, 落山插穿30500落山屠牛, 上星期用過呢招咖喇! 照睇牌面樓上30800~31000阻力係大過樓下30500平均線的支持力, 呢個水平有BB牛聚集, 大鱷今日係佈局唔食住, 養埋今日, 明日才開餐會肥好多

近日推升功臣匯控連日上升後結束升勢, 代表港股亦要掉頭向下, 以往匯控股價受英鎊影響, 但近日英鎊跌到走樣, 匯控卻照升可也, 可能係炒周五業績, 問題係英鎊續瀉, 匯控升勢亦會受制肘, 幾度於$79打回頭, 正是港股後市的啟示, 權重股匯控落山, 港股就會跟跌, 由於今日無法再創新高, 港股見頂轉勢向下機會大

港股見頂後連跌兩日.低開低走呈陰燭.展開尋底屠牛之旅

3/5 周四恒指收報30313, 大跌410點(最多下跌605點), 失守10.20.100天線

國指收報12018, 跌174點(最多下跌264點), 失守10.20天線, 國指大幅跑輸恒指

淡友反擊.港股連跌兩日.失守重要平均線利淡

今日港股大插呢棍未夠驚嚇, 代表今日低位30118唔穩陣, 尋底之旅未完, 頂部下移, 31094.30853....一路壓緊落黎, 底部亦向下降30483.30118, 後市不妙

好醫生招股期間港匯一度略為轉強, 如今招股完成港匯再度轉弱, 美元高企不下, 港股收市U盤急跌, VHSI恒指恐慌指數急升, 驚驚, 即係未跌夠

上証綜指死唔去, 先低後高, 單日轉向, 收3100, 升19點(+0.64%), 以接近全日高位收市, 中港股市通常係同步, 但港股竟然唔跟, 雖然收窄跌幅, 仍大幅低收, 代表港股沽壓沉重, 洗倉潮未完

連跌兩日後港股又再失守所有周一收復的平均線, 反映港股一彈走鬼盤就會出籠, 撤資潮未完, 港股底頂繼續下移, 要等阿爺打救才有活路, 否則上証A股跌就會拉住港股落山,

今日收窄跌幅都係全靠A股急彈, 不過彈力好弱, 連續兩日港股都係大插後收窄跌幅, 令人有跌唔落的錯覺, 可能係引好友及牛牛的局, 以及溫水煮蛙式派貨

~~~~~~~~~~~~~~~~~~~~~~~~~~~~~

潛行凶間

港股每月的高低位不會在一個星期內見晒, 所以往後會爆邊30118~30853, 破底機會大, 30000危危乎, 今日插水都唔見好友護盤, 我擔心周一好友推高大市上30853已食胡鬆人, 如果5月見左頂, 港股就會潛行凶間, 向下最少1500點月波幅都好得人驚, 貿易戰升溫正是災難的催化劑

昨晚美國10年期國債息率回一回又再升過, 再次逼近3厘，導致港美股市受壓, 今日港股下跌係預期之內, 但跌幅之大卻是意料之外, 有洗倉走鬼味, 今晚美債及美元略為回軟, 受除息大低水拖累, 現貨低見30118, 但期指已率先失守30000大關, 會拉住大市落地獄, 後市不容樂觀, 大方向未見底,

~~~~~~~~~~~~~~~~~~~~~~~~~~~~~

尋底屠牛之旅

熊食胡.牛進場.下殺誘因增加: 熊5576 VS 9268牛(重倉牛在29800)

我成日話牛熊過夜係高危, 風險大, 因為收市後才知最新牛熊分布, 今日港股走勢差劣, 但竟然係牛加倉博反彈, 熊食胡並下移, 牛多熊少, 真係死得,

今日港股大瀉, 熊熊開開心心食胡瘦身, 最大鑊係大量牛牛飛撲入市博反彈, 29800有二千幾張重倉肥牛, 只得少量貼價熊下移至30400水平, 今日恒指低見30118, 殺左979張相對期指對沖張數牛證, 牛多熊少是後患