14~21/5收市總結全文

14/5 周一收市~連升六日收31541.挾淡屠熊升過籠.小心MSCI見光死

港股今日雖然大幅高收, 但其實有暗湧, 本周回調目標係回補兩個上升裂口至30800, 如插穿彈唔番上黎就確認見頂

大鱷頻頻變臉, 無啦啦升跌就係為了好淡通殺屠牛熊, 港股今日強爆大升, 翌日亦可弱雞大跌, 大鱷將港股舞高弄低已成常態, 大獅兄說大户目標喺32000, 即係看好, 燈神相反指標係利淡訊號，不會上32000, 反而會掉頭落去31000

過去3個月恒指每次去到31800~32000都反艇, 反映31500樓上阻力非輕, 而家才是月中, 仲有兩周才結算, 大鱷冇理由肯花子彈一直守住31500高位, 港股升勢過急遺留太多上升裂口是後患, 大市隨時會掉頭回落, 落去回補上升裂口31277~31423, 30851~31032, 30568~30713, 而30800係關鍵大位, 以周波幅計, 插穿機會大

15/5 周二恒指收報31152, 急跌389點~收市U盤最低位, 一度上升32點~開市位

港股高開低走.單日轉向呈大陰燭.見頂回落結束6連升.轉勢向下.展開尋底之旅

點升上黎就點落番去.溫水煮蛙式派貨

恒指呈光頭光腳大陰燭見頂回落訊號, 穿頭破腳, 底頂下移, 美元及10年期債息急升, 外圍股匯債有變, 可能係觸發走鬼散水的原因, 今日剛回補了一個上升裂口, 點升上黎就點落番去, 看來要繼續回補下一個裂口30851~31032, 滬大媽今日沽貨鬆人拖低大市, 要留意明日大媽入貨抑或走貨, 對港股能否守住30800起關鍵作用

不要低估大鱷操控大市上落的能力, 牛熊都要死, 按照慣性走勢, 如5月收升, 通常在下旬才創即月新高, 如收跌, 就會在下旬創即月新低, 今次爆邊向上突破, 重上所有平均線, 早前港股插穿30000拗腰彈升, 有唔少手腳慢的股民都悔恨走寶, 今次港股回吐相信會有買盤承接, 正好接了火棒, 因為連升斷纜代表升浪結束, 往後跌下彈下目的係派貨, 其實大媽牛市早已在1月結束, 北水積極沽貨撤退, 咬住30000/12000係溫水煮蛙式派貨

16/5周三收市~31000失而復得.收31110.連跌兩日.反彈阻力31400

中港股市通常係同步見底頂, 周初兩地股市已齊齊見頂, 如上証確認見頂回落就會拖低港股, 齊齊落去尋底, 如受阻而回又彈散, 就要再下試30800, 肥牛在30500~30800是後患, 港股高低位往往係一瞬即逝, 散戶要好好掌握, 今次反彈量度升幅及阻力大位在31600~32000(周一高見31592就打回頭), 到目前為止恒指月波幅有1801點已達標, 隨即見頂回落,

港股今日彈散係俾阿爺拖累, 今日上証超樣衰, 收市跌22點, 收3169, A股內銀內險資源商品油股全面反艇, 但奇怪的是相關H股一跌即彈, 表現勝A股, 中港股市通常係同步, 但尾市上証插水, 港股卻沖高收復大部份失地, 受AH差價影響, 不可能A股跌H股升, 早晚會俾A股拉落山, 如上証失守3150, 港股就大鑊, 31000危危乎

美元升至半年高位, 美國10年期債息急升至7年以來高位, 拖累在岸人民幣兌美元一度跌穿6.38關口, 收市報6.3686兌1美元, 跌151點子, 跌至一星期低位, 港匯觸及7.85弱方水平, 阿根廷.土耳其.巴西.印尼等新興市場貨幣潛行凶間, 美元及債息上升, 大媽沽貨撤退, 貿易戰, 都利淡港股, 但港股幾時升跌已經俾大鱷操控, 明明牌面向淡但卻咬住31000唔放, 可能等養肥牛熊才開大餐

恒指恐慌指數vhsi急升3.07%, 港股呈w形走勢收復大部份失地, 但vhsi仍驚驚, 沽空連日上升, 今日高達13.11%, 為今個月最多, 淡友未放手, 即係港股仲未坐完過山車, 長和系.匯控.恒生除息後沽壓將會大增, 亦對港股構成壓力, 大媽今日入QQ幫到大市收窄跌幅, 不過大媽通常會趁反彈沽貨鬆人, 似係套現回流A股, 當大媽變臉走貨港股就會彈散,

17/5周四收市~港股連跌3日, 收30942/12278, 反彈在望

港股上周五收31122/12345，今日收30942/12278，到目前為止雖然本周收跌淡友勝, 但明日仲有一天俾好友反擊, 有QQ靚業績撐市，加上大媽掃入油股亦有助穩住大局, 本周收升定跌還看明天畫圖日，如能收升, 連跌斷纜係利好訊號, 上証表現及大媽會否繼續走QQ內銀內險是港股升跌關鍵,

港股連跌3日或已紓緩了部份周末沽壓, 由高位亦已回吐近一半升幅, 加上港股每周升跌比例通常係3:2, 即係3升或2升, 但本周只係升左1日, 並不符合慣性走勢, 要明日收升才達標, 不過QQ沽壓沉重, 會壓住港股, 大媽往往趁反彈走貨亦拉住港股後腿, 相信大市明日仍要在31000穿梭

周三低見30818見期指大手減倉, 今日繼續減少, 港股連日下跌期指持續減倉, 可能有淡友食胡, 因為由高位已回吐近一半升幅, 有淡友獲利亦合理, 但睇沽壓大淡友可能未肯收手, 其實本周大市在31000穿梭, 似係消化急升後的沽壓, 亦似係好友用拖字訣想磨到20號後, 等好消息做助力才上攻, 貼價牛熊都係大鱷屠殺範圍, 因為而家港股即市及周波幅都好大, 單日三五百點是等閒

近日大鱷玩估佢唔到走相反, 目的係令股民無所適從企錯邊, 昨日應大跌卻拗腰僅小跌收市, 今日應大升卻收跌, 應升不升令股民看淡, 人人估明日跌, 即係明日有望收升, 不過明日要收31122/12345樓上, 周線才收升, 明日許升不許跌

7/5拗腰反彈重上31000企左4日, 已收復所有平均線, 淡友連日殺跌, 今日係首度失守31000, 如明日續跌就麻煩, 所以好友必需要出手, 希望上証生生性性結束兩連跌彈高高幫手撐港股

以恒指日波幅計閒閒地都有200點，即係明日基本波幅係30900~31100再爆邊, 向下要守本周低位30818(但本周波幅已達標, 冇必要破底), 100天線大位在30901及多條平均線在30500~30901, 好友一直力守, 向上方面, 反彈阻力在31200.31400, 31600樓上有肥熊, 不過31200樓上兩棍光頭光腳大陰燭阻力非輕, 要有好消息才能上破

====================================

港股又彈散.收31048/12355

18/5周五收市~上証急升刺激港股結束3連跌, 惟尾市沽壓加劇, 抹去一半升幅,

昨日已預期今日好友會反擊, 今日收升機會大, 因為大鱷鍾意玩聲東擊西, 好淡通殺, 昨日續挫令人人看淡, 以為今日會插水屠牛, 結果係高開高收, 呢種格局也不是第一次, 當人人以為會落去屠牛, 結果係肥牛擦身而過, 只係震走牛牛就急彈, 部署屠殺正在下移的熊熊, 係明修棧道.暗渡陳倉

下周一轉節氣小滿及佛誕假期前夕，必定會有大龍鳳, 以周波幅計四天市一係升穿本周高位31592, 一係插穿31000再下試即本周兩個低位30904/30818, 睇牛熊分布會先上攻, 但要大陽燭上企31200/31400才脫險, 向上要留意幾個關鍵位31416.31466.31472, 以及大媽會否繼續沽出QQ等成份股, 如沖高回落, 屠熊後或會落番去屠牛, 牛熊都要死

周末中美貿易戰談判即將完結，究竟係利好抑或利淡下周一會有答案, 由於現時牛熊都非常貼價, 下周一大鱷肯定有得開餐, BB熊已大幅下移, 上攻有肥熊, 但下殺只得瘦牛

今日內地股市表現亮麗，高見3193創1個月新高, 大升39點以全日最高位收, 午後一度刺激港股彈高206點，但尾市收窄升幅, 究竟係好友抑或係淡友食胡呢? 只要下周上証升穿3200, 好友就可借勢再上攻

全周埋單國指升恒指跌, 但幅度不大, 即係磨左成個星期係原地踏步, 大鱷將港股點穴似係等貿易戰談判消息及養牛熊, 但今日國指已見偷步買盤掃天然氣股

上周史哥預測本周市況, 曾說//國指12250有超大支持, 只要上企12400就係好友天下, 不過12850有超大阻力//, 結果本周國指高低位係12250~12458, 真係神級, 本周果然係落到12250就拗腰, 今日國指大幅跑贏恒指, 係升市功臣, 國指強.阿爺好.港股才會好

4月份恒指多次收復平均線都係企唔穩, 但自從8/5陸續上企所有平均線就一直咬住唔放, 不過大媽積極沽貨, 最弊係丟權重QQ, 所以港股亦唔似會飛出外太空, 似係上落市

無論下周會否創即月新高, 以周波幅計下周都要再挑戰31500, 本來以為昨日會反彈, 結果跌多一日養熊, 拖到今日(周五)港股才反彈, BB熊大幅下移至31150, 極具吸引力, 上証觸底回升, 按照慣性走勢, 中港股市係同步見底頂, 即係港股會跟上証完成調整展開反彈, 萬事俱備, 只係等好消息做助力, 不過市傳沽空機構正在部署出手, 而貿易談判就算講掂數亦不應太樂觀, 中國肯定有俾唔少著數老美, 我估形勢未必對中資股有利, 當大鱷沖上去食完熊就會落山屠牛, 30500~30800係肥牛重倉區

港股收31234/12349, 假期前後例牌大龍鳳.死貓彈完再尋底.向30800進發

21/5周一收市~好淡通殺.熊死牛命危.好消息出貨.沖高回落趙完鬆

大鱷今日已經殺到上31500關口, 任務完成即閃, 點解彈散趙完鬆? 牛多熊少拉住港股後腿, 熊5014 VS 11134牛, 當牛熊分布嚴重失衡後市多數插水, 所以高位一瞬即逝, 大鱷唔想放生牛牛, 今日大鱷食完熊掌, 俾我係大鱷就會掉頭落去屠肥牛

今日冇上攻殺31600熊, 又係擦身而過, 大鱷話會轉口味落去食埋BB牛, 今日收31234, 超貼價BB牛已上移至31200, 向下一路殺落去30500都有肥牛, 命危噢!

今日港股收升也不應過份樂觀, 凈係向上望就會中伏, 而家只係上落市, 因為下周三才結算, 如果大鱷而家推港股出外太空, 托到結算要用好多子彈咖! 其實匯債形勢都不利港股, 中美停止貿易戰, 刺激美元升至5個月高位, 一度升穿94, 是去年底以來首次, 在岸人民幣大幅低收128點子，報6.3888兌1美元，為近4個月以來最低, 國指先高後低, 單日轉向, 倒跌收場可能和人仔走弱有關, 大媽繼續沽貨套現拖低港股, 其實大媽每次見反彈都走鬼, 過去幾個月北水都係積極走貨撤退

貿易戰講掂數, 中國俾賤美踩到上心口, 狂人大勝陰陰嘴笑, 美股梗係要開香檳慶祝啦! 道期全日都維持超過200點升幅, 今晚美股肯定會飛天, 但道指25000阻力非輕, 中資股卻彈散, 有何啟示? 今日恒指係俾國指拉落山咖! 好友要留意的是恒指好少全周日日升, 要預計未來3日會跌幾多日, 史哥早前說國指12250有超強支持力, 但今日港股反彈完, 12250就未必守得住喇! 就好似上周下試30800就拗腰急彈, 因為第一次通常係插唔穿, 再下試就會隊穿

假期前後例牌大龍鳳, 以800點周波幅來看即係要插穿30700, 31500打回頭, 就要插穿今日低位31232向30800肥牛區進發, 食牛扒早餐, 今日一度沖高見31464, 伸埋呢腳上去好友鬆人喇!

炒牛熊要快閃, 過夜係高危, 今日大鱷上攻屠熊, 翌日亦可插水屠牛, 不斷交替, 目的係令人無所適從企錯邊, 大鱷就可好淡通殺, 港股係跟住牛熊分布來走, 任何利好利淡消息都只係殺戮的藉口, 港股已經完全俾大鱷操控, 牛熊都要死, 今日元帥牛牛已食胡, 部署入熊買跌, 因為大市已出現利淡訊號