譚鎮國 馬清揚齊心籌辦活動 王賢誌大計：東華年輕化
2018/05/28 04:12:32 網誌分類: 生活
Vinci表示今年的籌款活動已準備得七七八八，當中大家最熟悉的《歡樂滿東華》，不經不覺已舉辦40年，而《愛心滿東華》已是第30次舉辦，所以Vinci稱今年要搞得大陣仗一點。而今年的新計劃亦有好多，「嚟緊6月尾會同馬浚偉合作，佢個舞台劇《偶然．徐志摩》再度公演，畀咗第一場我哋做慈善，唱歌嘅dinner騷我哋成日有，但咁文藝嘅drama未試過，今次都想試吓。」他還打算舉辦一家大細都可參與的活動，「你知我哋不嬲有打golf或者打保齡，但唔係好啱小朋友，我想今年有啲小朋友都啱嘅活動，可以一家大細一路玩一路籌款嘅。」
善用社交平台
由於今年想畀人年輕的感覺，Vinci會善用社交平台宣傳，「我係勁玩fb、微博同ig嘅人，喺我fb入面有個我的主席日記會提到每日的工作；此外我仲想搵啲嘢互動，譬如每年8月尾賣旗，我哋近年啲紙旗特別搵人設計到好colourful，有漫畫人物帶出我哋唔同嘅服務，以前你買旗只係得一張，但O依家有幾款，你鍾意買完可以再買儲齊一套，同埋我哋會喺網上玩遊戲，例如儲齊一套可以參加去贏獎品。」他表示今年的紙旗搵了出名的插畫師Hello Wong去設計，不但搶眼，還有很多meaning等待大家去發掘。
主力搞交流團
而譚鎮國副主席今年負責教育方面，Vinci表示：「其實佢都好辛苦，因為我哋有超過50所中小學同幼稚園，所有學校嘅嘢都關佢事。」其中譚副主席要籌辦兩個交流團，他說：「每年我哋都想帶啲中學生去交流，我哋會喺中學選拔比較優秀嘅學生一齊去，嚟緊會去溫哥華，畀佢哋了解當地歷史文化及同當地學生交流等；小學生都有份，我哋有個『有品足球大使』計劃，會帶佢哋去越南踢波，同唔同國家嘅學生切磋球技，希望培養佢哋成為一個有德行、對社會有承擔嘅人。」為了支持學生，幫他們打氣，董事局成員也會一齊去，甚至落場一齊踢友誼賽。
社企重錘服務
而馬清揚副主席今年就負責社會服務，Vinci說：「做訪問嘅呢間餐廳就係社企單位之一，都係under佢。」馬副主席續稱：「其實呢間iBakery係我哋其中一個好重錘嘅服務，會請啲殘疾人士，等佢哋可以好似正常人咁工作。」他開心表示iBakery早前在上環無限極廣場開了第8間，為了慶祝新店開張，iBakery的無添加系列手工麵包加入新款式包括葱花肉鬆卷、紅豆餅和海鹽朱古力圈圈包。還有其他計劃如支援年輕人發展的「青年共居空間」、「創業共融」計劃和大灣區考察團。而安老服務都不能忽視，推出嶄新的「修租易」長者自住物業代理先導計劃，亦有提供家庭服務如開設兒童發展資源中心，為新手父母提供健康課程和支援網絡。
讓人認識東華
Vinci補充一句：「其實我哋仲有醫院及醫療衞生等服務，我希望讓大家認識東華係個咩機構，同畀大家知道董事局成員去run一個慈善機構係做緊咩，唔係淨係睇電視叫人捐錢。其實東華有好多唔同嘅範疇，幫緊好多唔同嘅人，當你了解後，你自然就會更加投入，希望將件事做得更好，惠及萬家、發揚光大。」透過今次訪問，讀者可了解到今日的東華有善心、有概念、有創意，希望香港巿民能全力支持。
主持：黃柏高 統籌：林永匡 協力：李佩儀
攝影：袁東亮、謝民光
場地：iBakery Gallery Cafe（金鐘添馬公園）
黃柏高
■Paco對王賢誌（左二）、譚鎮國（左一）和馬清揚（右一）如此落力為東華服務讚不絕口。
■今年4月，東華夥拍滙豐舉辦首屆社區同樂日，王賢誌（後右3）和馬清揚（後右2）也有現身支持。
■王賢誌表示時常幫襯iBakery Gallery Cafe，睇住員工成長，慢慢建立自信感安慰。
■王賢誌上任主席後，曾在東華慈善粵劇晚會首次演出粵劇。
■王賢誌（中）身為東華主席，與副主席譚鎮國（左）和馬清揚（右）分工合作，為慈善出力。
■今年東華以「星」為主題，王賢誌搵了Dorian Ho設計會呔、絲巾和卡片套等。
■譚鎮國表示與王賢誌一齊加入東華，他覺得這個主席夠創新，能令東華形象年輕化是好事。
■馬清揚表示iBakery的新款麵包如葱花肉鬆卷、紅豆餅和海鹽朱古力圈圈包，賣相吸引，味道又好。
回應 (0)
我要發表
