6月初上攻屠熊

港股觸底回升, 連升兩日, 點跌落黎就點上番去, 展開尋頂屠熊之旅

1/6 周五恒指收報30493, 升24點(最多上升113點, 一度下跌105點)

國指收報12020, 升41點(最多上升94點, 一度下跌37點), 國指跑贏恒指

牛遠熊近利上攻, 大陰燭阻力位31200~31600, 升穿有運行

早前牛多熊少引起大鱷殺機, 5月中一路碌落山大舉屠殺8649張重倉肥牛之後, 令牛熊分佈回復均衡, 下殺誘因消除, 大鱷就轉口味上攻屠熊, 港股於期指結算日見底29964後止跌回升, 掉頭上攻, 上望30800.31000.31300.31500.31800...., 5月高位31592,

30800係關鍵大位, 收市如能上企, 500點一級(30800+500=31300)下一站就係31300, 再上就係31500.31800, 不過5月份多次挑戰31400~31600都打回頭, 而5月上旬見頂31592秒殺肥熊後大插插, 一路碌落山, 形成三支光頭光腳大陰燭, 當時好友走避不及重創

昨晚歐美股市全面下跌, 今日上証亦大幅回吐, 但港股卻底頂上移, 仍能小幅收升, 應跌不跌需防升, 30600樓上熊命危, 按照過去4個月的慣性走勢, 跌穿30000大關拗腰掉頭向上後, 短期內不會再插穿, 會係反覆上升, 直至見頂回落才會再試底, 特別要留意今次反彈浪會否遺留上升裂口, 因為5月上旬六連升遺留多個上升裂口, 於港股見頂後就全數回補, 非常驚嚇

過去幾個月有無形之手將恒指困在30000~31000, 兩面爆邊都企唔穩, 如今歷史再度重演, 30/5插穿30000低見29964後秒殺肥牛即彈, 大成交插水翌日(31/5)急升係見底訊號, 展開屠熊之旅, 再爆上去亦要慎防秒殺肥熊即回, 又落番去屠牛, 大鱷玩緊好淡通殺

7/5低見29791後拗腰, 用左5日時間爆上31592見頂回落

今次於30/5低見29964後拗腰, 要用幾耐多日才會挑戰前頂31592呢?

中港美三地股市見底頂通常係同步, 今次都係齊齊於5月尾創5月下旬新低, 亦同步掉頭向上, 展開尋頂之旅, 故此, 當中美股市見頂, 就係港股見頂之時

~~~~~~~~~~~~~~~~~~~~~~~~~~~~~~~~~~~~~~

恒指連跌三周後例升

港股於期指結算日大插係受多個因素拖累, 1) 當時29900~30400有肥牛  2) MSCI納入A股騰訊及建行要減比重, 沽盤拖低港股  3) 殺QQ.建行等一眾成份股的好倉.牛証等衍生工具  4) 破位而下逼投資者止蝕壓價後於低位收貨  5) 歐債危機重燃

港股觸底29964後得以連升兩日皆因形勢已改變 1) 29900~30400肥牛已死得七七八八  2) MSCI納入A股調動已完成 3) QQ.建行等一眾成份股的好友重創或陣亡  4) 破位而下投資者已止蝕或止賺, 大鱷成功於低位收貨, 亦震走了牛牛 5) 外圍政治局勢緩和

本周恒指收跌, 連跌3周, 今年試過三次連跌3周後, 都會爆升反彈上關鍵大位, 淡友冇趁30/5大插食胡就命危了, 因為結算前港股插水部份原因係受A股入摩技術性沽盤所拖累, 如今呢個因素已消失, 港股有條件重上31000, 觸底後兩連升係見底訊號, 以周波幅來看, 下周就會上破30600展開大屠殺, 要殺上去31300才夠800點周波幅 (30500+800=31300), 千點波幅見31500

以目前牛熊分佈來看, 升穿30600機會大, 如有利好消息, 就會進一步挑戰關鍵大位30800，向31000進發, 5月港股插水, 再一次印證港股30000/12000有無形之手護盤, 按照慣性走勢, 試完底就會再上沖挑戰前頂31592

史哥分析:6月波幅區 :

(28759)-29204-(29649)-30108- 30337-(30567)-30796-31026-(31485)

~~~~~~~~~~~~~~~~~~~~~~~~~~~~~~~~~~~~~~

見底後底頂上移尋頂格

全城看淡大鱷果然反手推升挾淡, 港股30/5見底後連續兩日底頂上移, 係尋頂格, 代表下周一會升穿今日高位30581, 向上推進, 只要升穿30600~31000就可收復所有平均線, 解除短線再插穿30000大關的可能性, 有利進一步向上

恒指5月高低位29791~31592, 月波幅點1801, 而家港股在區間低位附近, 買上值博率高, 總之睇住區間來炒上落, 單日升跌500點對大鱷大媽來說係易如反掌, 睇呢兩日港股表現就會明白技術指標弱亦可突然大陽燭爆升, 連阻力位都攔唔住, 當大鱷於低位收夠貨, 食飽肥牛, 震完倉就會變臉上攻

大鱷鍾意玩急升暴跌再急升的大型上落市, 令股民無所適從, 大鱷就可好淡通殺, 大鱷最陰毒係裂口爆升或插水, 企錯邊根本冇得走, 散戶在明, 大鱷在暗, 在港股跌下彈下的過程中, 大鱷係必勝, 散戶多數走避不及被屠

趁呢兩日有成份股調動, 好友趁大成交推升, 反敗為勝佔上風, 已奪回主導權, 下周有望更上一層樓, 港股有個慣性走勢, 就係當大市升到你唔信(例如7~14/5六連升)就會失驚無神掉頭連日大插, 跌到阿媽都唔認得, 但當跌到走樣(例如29~30/5連環插, 低見29964), 就會突然無啦啦連日爆上, 下周可能又會係升到彭彭聲, 會否歷史重演等下周揭盅啦!

港股慣性走勢喺無論轉勢向上抑或轉勢向下, 都喺連升或連跌, 非常急勁, 目的係逼死另一方, 然後就會突然轉向, 當牛熊分佈嚴重失衡, 就係港股轉向之時, 要密切監察牛牛成長情況, 要牛牛大幅多過熊熊才要擔心, 否則大鱷就會一路推上去屠熊

港股通(滬)已是連續8日出現資金凈流出, 大媽繼續沽貨走人, 狂人掀起全球貿易戰, 要避免再插穿30000大關就要突破31500/31800才夠月波幅, 現時形勢向好, 落山未係時候, 估計6月初會先向上挑戰31000來擴大月波幅, 因為肥熊近在咫尺, 沽空急增, 有上攻挾淡誘因

~~~~~~~~~~~~~~~~~~~~~~~~~~~~~~~~~~~~~~

成也QQ.敗也QQ

騰訊及建行受MSCI納入A股減比重拖累, 30/5急挫, 係港股插穿30000/12000的罪魁禍首, 如今MSCI調動已完成, QQ及建行連續兩日底部上移, QQ及建行見底, 亦同樣代表港股已見底,

今日港股成份股季檢執位, 石藥染藍, QQ增比重見掃貨盤一如所料收升推動港股向上, 恒指在30600關前窒步詐死, 似係養熊引淡, 以大鱷的能力, 爆上30800根本毫無難度, 大鱷只係想引多些熊熊入局才殺上去, 港股連日沽空高企, 都有挾淡誘因

QQ捱埋昨日MSCI減比重走勢明顯改善, 今日QQ增比重買盤增加推動大市向上, QQ好.港股好, 由下周一起QQ佔國指比重增加至4%, 即係分別佔恒指10%/國指4%, 舉足輕重, QQ升跌同港股升跌關連性非常高, 係大鱷操控港股上落的最佳棋子, 我估大鱷已經殺完QQ好友, 而家輪到推升殺淡友

QQ於5月中公佈靚仔業績後卻反艇, 皆因大鱷/大媽/基金明知A股入摩, 5月下旬QQ會有減比重沽壓, 梗係趁業績後急升上破$420拿拿臨走貨, 然後等插穿$400低位才回補啦! 全世界都趁低補貨, 亦係呢兩日QQ拗腰上升的主因, 連大媽昨日都突然掃QQ喇! 今日係季檢調動QQ增比重, QQ連升兩天, QQ脫險港股有運行,

QQ於5月中公佈靚仔業績卻沖高見頂$424.2後回落, 插穿$400低見$395, 全數回補公佈業績後爆升的上升裂口, 成也QQ敗也QQ, QQ於30/5見底$395, 港股亦同步見底29964/11722, QQ重拾升軌, 港股亦得以展開反彈浪, 要留意QQ會否受制於前頂$424.2, 港股能走多遠就要睇QQ表現

~~~~~~~~~~~~~~~~~~~~~~~~~~~~~~~~~~~~~~

財經日誌

結算後6月開新局, 受多隻成份股除息拖累, 期指會呈大低水140點, 隨著股份陸續除凈, 期指大低水幅度會逐步收窄

6月7日歐洲央行議息

6月7日內地智能手機生產商小米在港上市聆訊, 小米計劃在中港兩地上市 (內地 CDR約$234億, 本港IPO約$546億), 6月底招股,

周五(6月8日)七國集團G7峰會之前，G7財長會議率先舉行，美國貿易保護主義成為會議焦點, 彭博資訊認為今次貿易爭端引發七國集團自上世紀 70 年代成立以來最嚴重的危機

「世界盃」將於6月14日~7月15日舉行, 假如我係基金經理, 就會在6月初推高港股, 沽貨食胡, 提早埋半年結鬆人, 去嘆世界睇波

6月11日 匯控策略日

6月12日美朝峰會於新加坡舉行, 兩位絕世狂人會面

6月12~13日美聯儲局議息

6月底基金半年結

6月15日美國公布對中國徵收25%關稅相關商品

4~5/6 港股連升4日, 繼續尋頂屠熊之旅, 仍未有見頂跡象, 以周波幅計上望31300~31500

今日收31093, 高位31188不會是本周高位, 仲有得上, 窒窒步只係詐死養熊引淡, 31200~31600有肥熊, 有上攻誘因, 但31200~31600係早前插水的光頭光腳大陰燭所在, 估計呢個水平會見沽壓, 不過以月波幅計會升穿31500

如升抵31300就做夠800點基本周波幅, 千點波幅可見31500, 不過大媽亦會趁反彈走貨, 港股好少全周日日升, 而家已經升左兩日, 升埋明日就係五連升, 如果大鱷咬住唔放, 本周升足5日, 就創二月以來最長升市記錄, 透支了升幅, 下周回吐壓力就會增加, 明日轉節氣芒種

今日國指跑輸恒指, 上升動力遜恒指, 5月初係六連升反艇, 今次會升幾多日呢? 當午後無法再創新高, 又或者收陰燭才要擔心, 今日仍未有見頂跡象

多隻美國科技股創歷史新高, 帶動納指再創歷史新高, QQ未見頂, 代表港股仲有得上, 美國科技股飛左出外太空, 亦係QQ重上$420的動力來源, QQ阻力在$425附近, 亦係100天線所在, 會見初步阻力, 升穿有運行, 中興事件有望以大額罰款了事, 舜宇光學.舜宇光學見買盤追入, 科技股做好推動港股重上31000, 向31300.31500.31800進發

由於MSCI納入A股對港股的沽壓已結束, 有利港股今次上攻, 隨著貿易戰逐步明朗化, 基金經理對港股後市轉趨樂觀, 連大淡友經仔通梁蛇亦追左少少貨, 港股能走多遠就要睇內地股市表現, 上証收復3100, 港股亦重上31000/12200, 係同步, 亦係齊齊尋頂,

恒指已收復所有平均線, 牛遠熊近利上攻, 升勢未完, 近日配股活動明顯增加, 內地企業水緊, 亦有誘因推高股價來融資, 港股連日上升亦係為了小米本周四上市聆訊營造良好市場氣氛剛重上31000大鱷已經咬住唔放, 代表本周會收呢個水平之上, 如能收31300樓上, 代表好友佔上風

本周由好友主導, 收陽收升冇走雞, 大鱷部署本周收31000樓上, 升埋今個星期, 下周才要擔心(參考上述財經日誌)