推新歌sell閨蜜情 Super Girls揭友情保鮮秘訣
2018/08/06 04:12:34 網誌分類: 生活
《閨蜜專用》是慶祝Super Girls相識七年、成軍六年的一份情,講述一班姊妹開心時一齊去玩,唔開心時可能開個Party就冇事,仲會一齊追夢,Jessica說:「其實我哋喺大家面前都係做最真嘅自己,鍾意乜唔鍾意乜大家都好了解,好少觸碰到大家嘅底線。」問她們相處有甚麼難忘事時?Heidi說:「Aka係隊長,知書識禮,但性格好傻,好多烏龍嘢。」Heidi舉例指有年生日,佢整蠱大家話中了六合彩二獎,但只有Aka一個信,Aka仲向Heidi說:「你真係太犀利喇,我身邊冇人中過六合彩㗎,你可唔可以分幾萬蚊畀我,我好想擁有呢啲中返嚟嘅錢。」雖然事後知道被整蠱,但Aka說:「見到佢哋嬉皮笑臉又嬲唔落。」
拍MV似焗桑拿
為了新歌,她們排練了兩星期舞去拍MV,Jessica稱:「今次用咗Party Dance嘅元素,因為呢首係開心歌,所以導演希望我哋輕鬆啲,唔好太拘謹。」回想拍攝過程十分辛苦,她們均稱:「MV拍咗超過12小時,你見我哋跳得好自然咁,其實現場係冇冷氣㗎,因為嗰度嘅中央冷氣一到凌晨就熄晒,加上啲燈光好熱,搞到我哋好似焗桑拿咁,但拍出嚟嘅效果好好,都係值得嘅。」對於拍攝過程中的趣事,Yanny透露:「首歌有一段好快嘅歌詞,好似講急口令咁,我哋要一邊咪嘴一邊跳,好在我哋都有做足功課,所以3 take就完成喇。」
期望再開Show
談到未來大計,她們開心表示已錄完第二首跳舞歌,「因為太耐冇出跳舞歌,其實fans都好期待,我哋都希望今年可以跳多啲舞畀大家睇。」會再開演唱會嗎?Aka即說:「想呀,希望儲多啲歌有機會再開,因為我哋都身痕㗎!」Yanny續說:「每次都係得一場,有時覺得用咁多時間排練,可唔可以做兩場呢?甚至可以喺唔同地方表演。」而去年開完畫展的Aka希望跟不同藝術家合作。雖然訪問當日Cheronna因抱病未能現身,四女力撐好姊妹:「佢O依家做緊單曲,都唱得好勁,仲有拍旅遊節目同拍劇,希望佢愈做愈好。」
主持:黃柏高 統籌:林永匡 協力:李佩儀、宋家旋 攝影:李權威、謝民光 髮型:Calvin Tsoi、Terrence Chan @ HAiR Salon 場地:膳亭(西環德輔道西321號瑧傲1樓2號舖)
黃柏高
■Super Girls相隔兩年再出新歌,成員Cheronna因病未能出席訪問。
■Super Girls在MV中大顯舞技,背後卻跳得大汗淋漓。
■隊長Aka表示好開心被隊員整蠱,能帶給大家歡樂。
■Cheronna最近單飛出歌,能歌善舞的她是組合中的「大家姐」。(資料圖片)
■Jessica表示每次開演唱會都辛苦,但過完一關就代表成長了。
回應 (0)
我要發表