考潛水牌拍《狂獸》水底戲 林家棟:浸喺海 驚有鯊魚O架
2017/11/20 15:33:25 網誌分類: 生活
由足球員轉型做影壇新星的灰熊,開心能參與此片,他說:「開拍前接受了幾個月特訓,終於大派用場。其中一場喺漁市場和張晉追逐嘅戲好難忘,因為現場地面濕滑,好易跣親,跑來跑去仲要跳過另一隻船,都幾危險。好記得朝早7時拍第一個shot,要由呢隻船嘅第二層跳落對面船下層,武指示範一次後,我懶叻話『掂呀!』雖然有晒墊,但其實都有少少怕,然後跳啦,點知真係跣腳,整到條腰。但都要頂硬上,拍多三個take終於OK,成身散晒呀!」
灰熊跳船搵命博
灰熊為處男作去盡,影帝林家棟一向專業認真,為支持導演的「第一次」亦要克服心理關口拍「水戰」。飾演「廢柴差佬」的家棟謂:「導演兩年前已經畀劇本我睇,佢有少少鄭保瑞導演嘅影子,追求激烈嘅動作畫面,加上話水底玩吖嘛!好開心同到李子俊合作,拍完有少少唔夠喉,想再合作吓。」今次新片賣點好吸引,水底打鬥夠gimmick,余文樂、張晉和林家棟等本身唔識潛水,預先安排去學,其中張晉極之畏水,但為了拍攝都要克服陰影。
「張晉打得好睇夠殺氣」
到真正落海拍,家棟話好恐懼,他憶述說:「有場戲講我哋喺沉於海底嘅破爛船內打鬥,游來游去再打幾吃力。最慘有一幕講我甩咗個氧氣樽,得番條喉,呼吸兩下又無嘞!雖然明知做足安全措施,但都好恐懼。其中印象最深,係凌晨3、4點,漆黑一片喺西貢海域拍攝。浸喺海度,乜都睇唔到,成日諗起《大白鯊》啲經典畫面,驚有嘢扯我落海O架!工作人員離我二、三十呎咁遠,真係好驚好驚,淨係想快啲拍完,唔好NG,快啲上水,但拍完又好享受,心情好矛盾。」家棟戲中拍檔係爆裂型警張晉,二人首結片緣,家棟對張晉讚不絕口:「張晉簡直係型、英、帥、靚、正啦!打得好睇唔使介紹,氣質贏晒呀!場場都咁搏命,喺船拍攝時撞到身體瘀晒,而且個金毛造型夠晒殺氣,合作得好開心。」
主持 : 黃柏高
統籌 : 林永匡
攝影 : 袁東亮
協力 : 林書鉉
林家棟化妝 : Esther Huang@J.A.C.K.Factory
林家棟髮型 : Alex Chan@projetz4/J.A.C.K.Factory
場地 : 米走雞 Deluxe (9341 5931 whatsapp)
黃柏高
■影帝林家棟(左)和首度拍戲的灰熊(右)搏命演出《狂獸》,新片11月23日上映。
■家棟和余文樂(右)拍前齊齊學潛水。
■家棟成日濕身拍攝,其間病足兩星期。
■左起 : 林家棟、余文樂和張晉三人謂好開心在片中合作。
■其中一場戲在街市跟蹤JM(文詠珊),JM沿途掟爆炸品,家棟笑話,「爆到我無得連戲O架!」
■灰熊難忘帶傷頂硬上拍跳船戲。
回應 (0)
我要發表