8月結算後轉勢向下+11~12/9醞釀反彈

史哥分析 9月波幅區 :

(26465)-26874-(27284)-27706-(28128)-28594-(28971)-29405-（29840）-

~~~~~~~~~~~~~~~~~~~~~~~~~~~~~~~~~

港股暗藏殺機.調整未完

熊市氣氛差, 利好消息瞬即消化, 但壞消息就會發酵及擴大, 會引發骨牌效應, 拖累大市, 港股危機未除, 熊市死貓彈就要好好掌握, 港匯弱雞, 洗倉及走資潮未完, 大鱷只係托沽, 推高權重股來維持市場氣氛, 引股民入市接火棒, 一路推升一路掩護出貨

港股跌親腰骨, 底子脆弱唔嚇得, 升市都唔好太樂觀, 一有乜風吹草動就會插水, 基金經理都話趁反彈沽出港股加碼炒美股, 因為貿易戰矛頭直指中國, 人民幣弱勢已成, 企業盈利前景欠佳, AH股互相牽引, 當A股止跌回升, 港股就會跟住上, 當A股見頂, 港股亦要落山

大行落井下石, 摩根士丹利建議繼續沽空印尼.印度.菲律賓.巴西等新興市場貨幣, 新興市場貨幣危機有惡化跡象, 南非經濟衰退, 南非蘭特急挫, 阿根廷央行連日出售外匯儲備, 試圖穩定比索的跌勢, 土耳其里拉弱勢持續, 美元強勢, 資金流入美元資產, 美股下跌餐餐都死唔去, 皆因基金看好美股, 見插就趁低吸納, 8月有調查顯示基金經理美股持倉比例創逾3年最高, 因美國經濟向好, 企業盈利佳, 不過美股位高勢危, 近來多左聲音唱淡美股, VIX亦釋出利淡美股的訊號, 如美股見頂回落, 全球股市就死得

匯控回購及除息結束後, 股價持續受壓, 除凈價$70.77成攔路虎, 股份除息後好息之徒通常會走貨, 加上回購完結都利淡股價, 匯控表現欠佳失守$70, 港股跛左一隻腳, 另一隻權重股友邦業績遜預期, 加上受東南亞國家匯率波動拖累, 連友邦都反艇, 港股又跛多一隻腳

~~~~~~~~~~~~~~~~~~~~~~~~~~~~~~~~~

熊市底部下移.溫水煮蛙式派貨

內地水緊可能係促使北水班資回朝的原因之一, 大媽往往趁反彈沽貨, 或者上証碌落山, 都會拖低港股, 因為港股幅即市圖通常係跟足上証, 人民幣仍處弱勢, 大方向有下行壓力, 貿易戰利淡中資股, 要人民幣回穩才能推高港股, 當人仔彈完, 港股就會反艇,

阿爺雖然頻頻出招救市, 但A貨偉哥持久力通常不長, 成交萎縮, 股民入市意慾低, 阿爺救市都引唔到資金入市, 只係得國家隊掃貨托市, 當上証反艇, 港股就會跟住插水

8月中港股展開大反彈, 皆因當時27000附近重倉牛已死左九成, 降低再跌誘因, 但隨著港股一路彈上28500樓上, 26500~27600牛牛陸續入局, 只要養肥牛牛又會再插過做第二隻腳, 以年波幅計, 26871只係短底, 並不是大底, 仍有下跌空間, 8月份大媽繼續撤出港股, 沽多買少, 基金經理看淡逢高沽, 都是後患

恒指過去幾個月係千點一級級落, 底部下移, 溫水煮蛙式派貨, 全民皆艇, 不宜重倉, 趁反彈就要好好掌握, 大鱷通常係玩大插跌過籠逼死好友, 當股民止蝕/斬倉, 大鱷低位收夠貨之後, 大市就會拗腰彈高, 輪到逼死淡友, 當淡友死得七七八八又會再插過, 不斷急升暴跌來蠶食股民的血汗錢, 股民企錯邊會好大鑊, 少做少錯, 入市要快閃, 無論當天大市有幾強或幾弱, 過夜可以變天,

8月上旬股災嚇屎人, 利淡因素一大籮, 但股民好了傷疤忘了痛, 8月下旬大鱷刻意營造向好氣氛引股民入局, 散戶陸續入市買牛及掃正股, 大鱷就梗係乘機派貨啦! 大鱷食飽肥熊正部署碌落山屠牛喇! 28/8高見28579打回頭收陰燭, 沖頂回落夾硬撐埋結算就散水, 其實弱勢已成, 見散戶結算後竟然飛撲入市博反彈, 唉! 梗係中伏啦! 8月尾早已提醒大家港股有暗湧, 每次反彈上10及20天線都係企唔穩, 吻別後又會再跌過

元帥公私兩忙, 無法再緊貼市況分析港股, 要封筆喇! 臨別寫埋9月呢篇, 有空閒時會再寫, 不會日日寫喇! 拜拜!

6/9周四收市~上証失守2700 = 恒指插穿27000

網遊稅利淡.QQ未見底.港股續尋底

今日港股一如所料插穿前底26871做了第二隻腳26818(關鍵大位26800), 但無論月波幅以及年波幅都未達標, 今日破底成交增, 有走鬼味, 股份洗倉式下跌, 唔係好現象, 代表往後仍會有新低, 50隻藍籌股當中有33隻股價較去年至今高位累積下跌兩成或以上，技術走勢上已見熊, 要上証收復2700, 港股才有望重上27000/10500

今早即市回補下跌裂口, 扮守得住26800關鍵位擺明係養牛引好入入局的手法, 看來大鱷要隊穿牛屎派一直所說的牛熊分界線26787(從1月高位33484調整20%), 才能逼到好友死心撤退, 如失守26800, 程式沽盤及斬倉止蝕盤就會另港股跌勢加劇, 向下26500.26300.26000....

9月開局港股反覆急瀉, 敗象已呈, 形勢進一步惡化, 周五(7/9)破日, 剛好有成份股調動, 由於已連跌兩日創新低26818, 代表周五表現舉足輕重, 會否續創新低或秒殺肥牛即彈非常關鍵, 去年牛市升到你唔信, 今年熊市將會係跌到你唔信, 低處未算低, 唔好估底, 每次落到關鍵位窒窒步, 目的係誤導股民, 令人有見底的錯覺, 係養牛引好友, 以及騙股民入場接火棒的手法

港股超賣, 明日表現就要睇上証會否收復2700, 因為國家隊一直力守2700(前底2653), 無論如何, 估計周五好友會借大成交推升來作出垂死掙扎, 目的係趁狂人加關稅的催命符宣佈前逃命, 如好友反擊失敗, QQ插穿今日低位$312, 恒指26800就危, 26400~26800係肥牛重倉區, 不過26400樓下只得瘦牛, 仲要養多一陣, 以最多1300點周波幅來看本周或會見26700, 但本周不會插穿26500(下周就危), 因為如果落到呢個水平周波幅就會超標, 要留番多些水位俾下周跌

周五(7/9)恒生指數系列季度調動, 成交會大增, 港股勢必大幅波動, 恒生指數剔出東亞銀行(00023)及招商局港口(00144), 加入中國生物製藥(01177)、申洲國際(02313)

匯控比重由原來的10.33%降至10%
騰訊比重由9.74%增至10%

我曾做過統計, 阿嬸大師玄學估市命中率好低, 本周過去四日果然全部估錯, 燈神估明日大升即係收跌

11~12/9收市~上証見底.阿爺護盤.肥牛陣亡.港股超賣.醞釀反彈

QQ止跌回升.港股同步見底.有望轉勢向上

踏入9月, 納指就碌落山, 係QQ反艇的其中一個原因, 但10/9納指已止跌回升, 美股見底但港股卻續瀉創新低唔跟升, 因為中港股市通常係同步見底頂, 大鱷係想等上証見底或跌近熔斷底才推高港股, 而且過去幾日大鱷未食飽肥牛, 所以繼續推港股落地獄, 屠牛震牛之餘亦可養貼價熊引淡友入局, 今日上証已見底, 即係港股即將會掉頭回升, 反彈阻力26800.27000.27300.27500....最大阻力在27800

日前曾說按照大鱷的習性, 不會食盡26000~26500牛, 加上26000~26300係大位, 好友亦會力撐, 大鱷守住QQ $305及$300, 即係想保住26000, 所以呢兩日我頻頻提醒大家港股超賣反彈在即, 就係因為多隻指標股有拗腰向上的味道, 按照慣性走勢跌穿大位會有吻別, 即係會重上26800.27000, 測市指標出現利好訊號, 港股反彈能走多遠就要睇上証能否重上2700

9月開局大鱷日日屠牛, 飽到上心口, 12/9低見26219食多一口, 上証亦跌近熔斷底2638, 淡友亦驚國家隊護盤, 攻勢亦見收斂, 本輪跌浪高達1765點, 做淡亦夠水位食胡啦! 16/9圓桌會議中美貿易談判亦令淡友有所顧忌

近日港股每次彈上去都係高位一瞬即逝, 皆因大鱷唔想放生肥牛, 所以連日創新低日日屠牛, 但當港股見底就會大彈高, 一升到尾扯住上, 到時就輪到唔會放生肥熊, 大鱷玩好淡通殺, 做好做淡都要靈活走位, 不能死坐, 無論當天大市有幾強或幾弱, 一過夜就會變天

通常燈神經仔通梁蛇唱好高追就係升到水尾, 唱淡走鬼就係跌到尾聲, 11/9梁蛇估計港股會有反彈, 但當天卻插穿26400, 呢兩日港股續創新低梁蛇死心大手減倉走鬼賤價而沽, 仲話14/9前港股易跌難升, 不會大彈, 所以慌忙逃命, 仲叫粉絲不要買上博反彈, 相反指標就係利好訊號, 代表港股即將會有大彈高吃, 大鱷推港股落地獄, 唔少股份都跌到阿媽都唔認得, 大鱷目的就係逼好友股民斬倉/止蝕, 當大鱷低位收夠貨, 重倉死得七七八八, 港股就會急彈, 所以技術派梁蛇相反指標往往係好準, 大鱷係裝個陷阱呃分析師

港股超賣, VIX.指標股.VHSI.匯市都有異動, 預示大市即將會作出反彈, 早前恒指由前底26871累計反彈1708點就轉勢向下, 如今亦由高位下跌約1700點, 夠皮啦! 彈得喇!

大鱷愛玩好淡通殺, 無論升跌, 通常一轉向就會係急勁, 企錯邊冇得走, 利淡因素多到不得了, 股民入市意慾低, 搵鬼入場咩! 但大鱷非常聰明, 在跌勢中突然轉向急彈, 就可逼淡友回補空倉, 淡友買盤及跟風短炒盤就可幫手推高大市,

港股好少全周日日升或日日跌, 本周已連跌3日, 未升過呀! 上周都升左1日啦! 上周曾預測本周會升2日, 因為通常每周升2~3日咖! 今日大鱷壓住大市唔俾升就係想養熊引淡, 熊熊已大幅下移, 時辰到了