PACO名人會
PACO名人會
PACO名人會

新片反映現實有意義 余香凝岑珈其演學生大挑戰

2018/10/08 04:12:26 網誌分類: 生活
08 Oct
          由《十年》和《樹大招風》導演歐文傑執導的新作《非同凡響》將於本周四(11日)上映。電影講述三個平凡人的故事,今次請來戲中飾演平庸學生的余香凝(Jennifer)和做反叛學生的岑珈其,他們在參與一套特殊學校的音樂劇排練後,從中得到啟發,更加認識自己。歐導演希望透過故事引起大家關注不被重視的一群,並要正視怎樣克服自己面對的困難,尋找活得開心的意義。

        歐導演表示拍攝《非同凡響》的念頭比《十年》還要早,他憶述:「嗰時要拍一部微電影,所以去粉嶺一間特殊學校參觀,臨走時校長畀咗隻DVD我,係佢哋學生演出嘅音樂劇,返屋企睇完後,我問點解冇人報道過?好似社會冇人關心呢件事,再諗番當日拍完《十年》後一開始都冇迴響,直至攞咗金像獎才先得到大家嘅關注,我就諗呢個音樂劇,對學生同佢嘅家長好有意義,咁啱社聯(香港社會服務聯會)想搵我拍一部社會性題材嘅電影,我就覺得可以拍出嚟。」他直言希望這部電影是面向社會,除了特殊小朋友,亦藉着電影中不同角色所要面對的困難來反映現實。

        讀書壓力沉重

          Jennifer在戲中是一位Band 1學校中比較平庸的學生,她說:「講我讀書讀得好辛苦,而媽媽葉童類似啲怪獸家長,係咁叫我讀書,唔得就補習,所以我成日都好攰,但其實我有個夢想係煮嘢食,但媽媽話做廚師冇前途,都幾慘!」她表示幾意想不到導演會搵她做學生,「佢第一次畀我嘅評語係,有睇你平時嘅訪問或工作表現,你個人都冇乜特色,點解呢?我話我心裏面有好多諗法,但如果做嘢,你要A,我畀A你,我唔想偏離,咁呢個中心點同個角色好似,個心有好多諗法但唔敢講出嚟。冇諗過佢睇完《骨妹》會搵我做17歲嘅中學生,都係一個大挑戰嚟。」

        被爸爸打一巴

          曾演出過《點五步》的珈其,今次首做男主角,在戲中雖然飾演學生,但會側重家庭方面多一點,他說:「因為講我有一個特殊兒童細佬,自少父母對細佬照顧周到,忽視咗我,令我缺乏家庭溫暖,變得好獨立,甚至係反叛。」他最難忘有場戲講細佬唔見咗,他與爸爸林嘉華都好擔心、分頭去搵,「原來細佬去咗每日睇住爸爸揸車開工嘅地方,搵番時我同爸爸有啲爭執,佢打咗我一巴,細佬失控喊晒咁保護我,我好感動。」他坦言20幾歲飾演學生有難度,幸好導演給予好多指引,「佢叫我唔好演,而係要成為嗰個人。」

        重拾鬥志熱誠

          講完學生面對的問題,谷祖琳在戲中飾演在特殊學校任教的老師,歐導演稱是現時打工仔的寫照,「小谷個角色本身有才華,係港大音樂系碩士畢業,現實中係負責嗰個音樂劇嘅老師,套戲首歌都係用佢喺音樂劇作嗰首歌,佢因為背負住照顧老父嘅責任,雖然返工搵到錢,但其實本身係鍾意音樂同創作。」原本當打份工,但搞完音樂劇、多理解這班特殊小朋友後,她尋回做這件事的價值,不但重拾鬥志,對工作、對音樂都有番熱誠。

        主持:黃柏高 統籌:林永匡 協力:李佩儀 攝影:袁東亮、謝民光 場地:面譜京川料理(尖沙咀港鐵尖東站33號舖)

        黃柏高
■歐文傑導演(右二)在新戲中搵余香凝(左二)和岑珈其(左)演學生。
 ■歐文傑導演(右二)在新戲中搵余香凝(左二)和岑珈其(左)演學生。 
■余香凝在戲中與葉童多對手戲,對方戲場勁更有助她入戲。
 ■余香凝在戲中與葉童多對手戲,對方戲場勁更有助她入戲。 
■岑珈其在戲中以為父母只照顧特殊兒童細佬而變得反叛。
 ■岑珈其在戲中以為父母只照顧特殊兒童細佬而變得反叛。 
■(左起)歐文傑導演與谷祖琳、余香凝、岑珈其、葉童、劉玉翠和廖子妤等演員,早前齊出席首映禮。
 ■(左起)歐文傑導演與谷祖琳、余香凝、岑珈其、葉童、劉玉翠和廖子妤等演員,早前齊出席首映禮。 
回應 (0)
我要發表
user