幻想世界

2018/12/08 13:10:21 網誌分類: 生活
08 Dec

意外之後我時有失眠,試過在床輾轉反側兩三個鐘都不能入眠。當時唯有睇珠光寶氣再加一套45分鐘劇集(比如9-1-1,好醫生,SWAT),1.45am上床睡覺。有一次覺得累嘗試早些上床,碌來碌去之際,最後睇鐘時間係1am,跟住我發了一個夢,我去了一間在外國的屋,有停車場,屋內有一班非常友善的中國人但其實我唔知佢地係咩人。我地坐低食飯,用廣東話傾偈。我旋即夢醒,有種很開心的感覺。我以為我睡了很久,但原來只係睡了15分鐘。通常我們未必記得每一個夢,但因這個夢我一發完就醒,就印象深刻,記得屋內的每一個人。

之後,當我上床後,我會同自己講,go back to that house,然後幻想自己係屋中家庭的一份子,幻想有些事情出現,比如感恩節煮晚餐,感恩節深夜去shopping,暴雨來臨保護家園(都係受911劇集影響),或小鎮來了壞人要組隊夜更巡邏,等等,而我就在這幻想過程中入睡。

我是否快要精神分裂了?

意外到現在,我心情都很差。我好憎人問我,好返晒啦可?唔該唔知就唔好問,我根本唔會好返晒,給我90%已經好開心;現在都不知有冇50%。我情緒低落,有時甚至好驚福無重至禍不單行,如果再有癌症或甚麼的重病來臨,就唯有因病厭世去自殺。我的美女朋友,40幾歲選擇不接受治療離世,雖然傷感但我現在明白了她的選擇。

意外後堂家姐姐夫真係好支持我。堂姐夫幫我推輪椅去覆診,接受物理治療,老實講我體重都唔輕。後來我知道堂姐夫椎間盤凸出看脊醫,我問係咪因為推我,佢話唔係,但我知唔多唔少都有關係,我好內疚。家姐就同我講,「你之前話如果行得返,行動自如,就已經好開心,懂感恩,你現在已經行得返,你忘了自己當初的話嗎?你又不是運動員,行得,活動自如就可以,不需要話一定可以去攀山,去行冰川,輕鬆過活就可以。」佢提醒了我要感恩。我傷時每天早晚都祈禱但我現在根本已忘記了要做。我做人都好自私。

蝸居細少,我家好多物件向高發展,但我到現在還是無法攀高取物,可能係心理病罷,我以前用一張圓凳去攀,現在無法做到。我星期五冇去join飯局,因為我們常去一個地方係G/F飲嘢,用餐區在一樓但條樓梯級係幾高的,我唔想俾人知我怕條樓梯。工作方面我的部門已經分裂成兩派,我係被「歧視」為老餅的一派,我最幸運係我老闆仍對我幾好,可能佢見我還差3.5年退休,好來好去,冇特別想逼我早走。

可能有些人覺得斷腳好少事駁返就冇事,但在我來說係一件改變了我一生的事。係一件返唔到轉頭的事。

真心講我係覺得幾痛苦。

回應 (14)
我要發表
Persie
Persie 2018/12/12 21:00:47 回覆
@花姐...

花姐妳懂的尋找自己的快樂,係好事。我現在都很愛獨處,比較能放鬆。

花姐
花姐 2018/12/12 08:44:33 回覆

PERSIE,你好記性,我有隻可愛狗狗,肥仔又真係比時下的年青人

有良心和關懷,比上不足,夠用就感恩,我善忘,比肥仔噴完又

會跟他說話跟他一起外出食飯.自己想辦法忘記不開心,才是生活

的本質.

Persie
Persie 2018/12/11 22:15:57 回覆
@幪面馬仔...

馬仔,我食蝦,鵝肝,燒鵝的quota已經用盡晒,以前去得太盡!

我真係好鍾意好鍾意食燒鵝。

幪面馬仔
幪面馬仔 2018/12/11 22:10:26 回覆

Quota呢樣野,我信架。

我以前每晚嗒半杯可樂才睡。近2年加埋不夠10罐。

所以做人留有餘地好D!

Persie
Persie 2018/12/11 21:33:30 回覆
@花姐...

花姐,公司冇權因為我斷腳而炒我,我可以告佢。事實上好多做嘢差我幾倍的人都尚在,但公司絕對可以對我投閒置散希望我自己走。

我覺得肥仔好錫妳,放心佢會照顧妳㗎,希望你地和狗狗每日都開開心心。

Persie
Persie 2018/12/11 21:25:56 回覆
@花姐...

花姐,好多謝妳的無私分享。我都知道家人對我無限支持,我好多謝他們,但我現在真係只得以前40%的活動能力。我有位朋友又係同我講係神的安排,件事終於係會對我好,只係我現在未能理解。

我想了很多,這是不是報應,但不斷翻來覆去想了又想都冇意義。

我塊面下半部的敏感就來似幅地圖,乾到甩皮。今日同事叫我唔好睇大眼姐姐,換一位醫生(曾經醫好同事的皮膚敏感)。她也是女醫生,年紀比較大(佢話大我幾年,唔太似)。佢真係好細心,講完皮膚講我隻腳,佢再介紹另一位物理治療師俾我。佢叫我唔好太在意皮膚,求其佢唔發得太緊要就算,亦可能無復舊觀,因為致敏源唔易搵到。人老左真係樣樣都差晒,我以前皮膚好好的,最後幾年要還晒以前幾十年。

起碼我知道食蝦會令我的皮膚變差。我愛食蝦愛了幾十年,點知幾十年後佢變了我的致敏源!Quota用盡了,沒辦法。

Persie
Persie 2018/12/11 21:07:03 回覆
@蕃茄...

每次去針灸,治療師都可以幫我轉動腳眼擰到dark一聲鬆左。佢話我早上起來腳唔腫係好事,晚上腫係累積一天的活動,但會慢慢好返。

花姐
花姐 2018/12/11 21:05:38 回覆

Persie,其實你比好多人幸運,公司繼續用你,沒因你

腳傷炒掉你,仲可以有糧出,腳傷又有人推你去覆診,我老公死後,

去醫院檢查覆診都是自己,我耳仔退化,已配戴助聰器,

每次見醫生都叫醫生說大聲些,好的有愛心的都肯,但有些說了你

還是聽不到,他也懶得花氣力,算了!我亦明白人家看太多症,不

能兼顧每一個病人,我都沒有放棄跟朋友同學的交往,花近兩萬蚊配

一隻耳機,希望能幫到自己,政府給我配的千二蚊平,係!可惜外界嘈音

接收晒,人家講的內容聽唔清楚,常比朋友笑餐飽,初時好介意,

現在唔會了凡事看開些,不要難為自己,始終耳機會因太嘈環境,

發揮唔到,同埋太專注用神聽對方說話回家人好累.

所以飲茶是最辛苦,我沒必要就不出,自己一個人就去茶餐廳快餐

店食野,不用費神跟別人互動,又不用躲在屋子發呆,正面想多些,

不要鑽牛角尖,夠時候要走,神自然帶你走.

蕃茄
蕃茄 2018/12/11 16:52:46 回覆
@Persie...

Persie,

我自己年齡去到五十後, 都明顯感到身體機能 同 復原能力, 真係比幾年前差左一截咯, 可能我亦小做運動吧. 早排輕輕屈到條腰, 開頭以為好小事, 搽吓藥酒, 點知都痛左成四,五個星期至好番晒...

Persie
Persie 2018/12/11 07:45:50 回覆

浪子,thanks bro!

馬仔,我會啦,但要睇我老板張合約續唔續。佢係鬼佬富二代,唔太緊錢,但要放好多假期,不要太多壓力,要開心過活。

幪面馬仔
幪面馬仔 2018/12/10 22:14:45 回覆

過埋呢3.5年先算啦!

浪子152
浪子152 2018/12/10 14:15:25 回覆

dont think too much la, look forward and positive, support U!!!

Persie
Persie 2018/12/09 03:50:25 回覆

阿仙奴1-0僅勝Huddersfield,很好。上半場大好形勢但必入球又入唔到。入球又被旁證錯判越位。

但車仔竟然爆冷贏曼城,爬過我們上第三位。

利記笑哈哈。

熱刺李城剛開波,熱刺贏又上第三,阿仙奴會跌落第五。

user

最新回應

Persie
Persie 2020/06/23

馬仔,我出左院,暫時一切OK,星期六照X-光和洗傷口。

幪面馬仔
幪面馬仔 2020/06/22

舅父仔

你現在醫院?專心休養。

她始終是你媽咪,一定擔心,切肉不離皮!

幪面馬仔
幪面馬仔 2020/06/22

世界在變,世事無常。

我現在反而努力返工,有就做。襯現在經濟尚可,儲多D柴。

蕃茄
蕃茄 2020/06/21
@Persie...

Persie,

祝願 你腳患康復程況理想.

"人生無常" 呢四個字在今年全球新冠肺炎大流行之際, 令我感受很深,

我盡量會記多D令自己 開心,溫暖 嘅人同事, 令到自己心境 保持平靜同多番D正能量