5/6 部署挾淡屠熊

恒指結束五連跌, 拗腰重上26800關鍵大位, 牛死熊命危

5/6 周三恒指收報26895, 升134點(最多上升358點)

國指收報10345, 升4點(最多上升121點, 一度下跌27點), 國指大幅跑輸恒指

連跌斷纜利好.嚴重超賣利反彈

狂人逼亂儲局減息, 市場憧憬短期內會減息, 道指作出報復式反彈, 爆升512點, 收25332, 再度向打不死的神奇大位25500進發, 美股素來有無形之手睇場, 例如企業回購或狂人利用權力護盤(6月18日前要為宣布競逐連任做勢), 連基金經理黃蛇一向都話減港股加美股, 可想而知優質美企具吸引力, 所以每次美股暴瀉後都能大彈高, 美股回穩, 有利港股好友反攻, 只要明日好友食得晒周末前例牌沽壓, 以及守得住低位26672, 後市有望再上27000, 從陰謀論角度來看, 今日港股彈散, 其實係大鱷用拖字訣想俾時間熊熊入局, 等養肥才殺上去

而家全城看淡做淡, 石石極度悲觀，唱到落地獄, 反而要逆向思維，淡友太多沽空持續高企亦有挾淡誘因, 今日閃上27000彈散似係試水溫, 養熊引淡震走好友牛牛, 所以用拖字訣咬住26800關鍵位來游走, 假如今次跌浪創低位26672已見短底, 根據慣性走勢就會起碼反彈600點, 如有利好消息, 更會有逾千點的大反彈, 所以今日高位27119唔會係6月頂部, 因為只係由低位彈左約450點, 反彈幅度未達標, 仍有上升空間

從消息面來看, 港股本周應要落山, 但從大鱷及大媽的盤路來看就想周四(6/6)收26901樓上, 畫陽燭格局, 只要明日(周四)收26901/26909之上, 本周恒指就收陽收升, 結束由30081轉勢向下, 連跌四周的弱勢, 釋出回穩訊號, 代表好友正部署反擊, 大前題要上証止跌回升做助力, 否則只會係彈散, 只要下周一(10/6)冇創新低, 港股上攻勢頭就可確認

美國減息預期以及經濟數據轉弱, 美元失守98後連日下跌, 亦有利資金流入股市炒作, 人民幣跌勢亦放緩, 匯市表現利好港股, 一如昨日所說, 牛牛已死得七七八八, 牛熊分布有變, 牛少熊多, 熊熊正在快高長大, 只要有利好消息做催化劑, 就可再上攻27000~27300阻力區, 甚至回補27523~27640下跌裂口

由於消息面利淡, 全城皆艇, 投資者入市意欲不大, 買盤縮, 淡友當道, 只有突然大幅抽升挾淡, 逼淡友回補空倉的途徑才能令大市急升, 從而收復平均線, 穩住市場信心, 吸引買盤進場, 抽番大市上去

~~~~~~~~~~~~~~~~~~~~~~~~~~~~~~~~~~~

靜候上攻催化劑

5月大舉屠牛之後, 牛牛死得七七八八, 貼價熊飛撲入市, 牛熊分布變成熊多牛少, 代表深潛誘因降低, 上攻挾淡誘因增加, 港股已跌抵圓頂量度跌幅目標, 一直都係嚴重超賣, 尚欠一技術性大反彈來消化超賣, 博反彈具值博率, 上望裂口27523~27640

過去一個月尋底期間例牌彈1~2天又跌過, 如果大市見短底, 就會連升超過2天, 如能突破27300，就有望挑戰27500裂口區,

近來大鱷一直咬住國指10400唔俾深潛, 跌勢放緩, 目的係想拖到上証及美股止跌回升, 到時就可借勢推番港股上去殺埋正在不斷下移的熊熊, 以及挾淡倉, 順道回補23/5的下跌裂口

港股繼續嚴重超賣, 人人都等技術性反彈, 但港股卻日日彈散, 股民以為彈唔起就中伏了, 大鱷好鬼奸，通常要好友心灰意冷, 死心撤退, 大市才會彈高, 5月份恒指競價多數係低開, 但踏入6月份就日日高開, 似係有買盤趁低吸納

資金流方面, 美元跌穿98, 港匯轉強, 5月份老外大舉沽貨撤退, 但踏入6月滬深股通就突然出現大額資金凈流入, 老外日日瘋狂掃貨, 推動港股拗腰, 守住26700大位

~~~~~~~~~~~~~~~~~~~~~~~~~~~~~~~~~~~

詐死養熊引淡

技術上港股明明要彈高, 但大鱷一邊屠牛一邊刻意壓住大市頻頻玩彈散, 吸引淡友進場, 熊熊不斷下移至27000附近的屠殺範圍, 大鱷奸計得逞, 道指於3/6低見24680後止跌回升, 亦有助港股向上推進, 挑戰27000.27500.27800.28000....

雖然恒指走弱, 但其實以收市計, 港股近日跌勢已放緩, 指標股具啟示作用, 多隻指標股今日都冇跟隨恒指創新低係利好訊號, 大部份老肥牛已死, 回購亦增加, 阿爺繼續推出刺激經濟政策, 都有助好友反擊, 近日在27000樓下亦見買盤暗暗吸納, 可能係淡友回補空倉及博反彈盤進場, 5月港股跌勢過急, 大媽大鱷貨多走唔切, 亦有誘因推高派貨

以往當牛牛死得七七八八大市就會拗腰向上, 沽空持續高企亦有誘因上攻, 逆向ETF買盤縮, 同樣預示反彈在望, 大鱷力守QQ$315, 推番上$325, 擺明係唔俾QQ落去回補$300附近的裂口, 代表大鱷唔想恒指回補26000附近的裂口, 想在現水平築底部署反彈

恒指落到26672, 已跌至圓頂量度跌幅的短線目標, 等技術性反彈, 恒指碌落山, 人人向下望, 但踏入6月, 恒指恐慌指數卻連日大跌, 唔驚啵! 6月開局插多兩棍似係震倉, 要震走好友牛牛才能彈高, 老外經滬深股通掃貨, 好少見, 代表上証或權重A股快將作出反彈

港股已累積龐大跌幅, 未見過似樣反彈, 隨著成份股陸續除息, 期指低水情況會逐步紓緩, 所以6月上旬(首兩周)有望挑戰27000~27300, 如有利好消息就會上攻27500(裂口區), 到打回頭就會繼續尋底