胡慧沖 - 芒果主題下午茶 | 筆泰沖動

　　泰國過了潑水節之後就是一眾生果當造的季節，除了有榴槤當造，也有芒果當造，部分地方更已推出任食榴槤自助餐……其實與此同時，亦都有好多不同嘅芒果甜品推出。

　　正如曼谷Intercontinental酒店就推出芒果主題嘅下午茶餐，其實在泰國可以見得人同埋好味嘅下午茶餐，基本上大多數都係喺酒店裏面找得到，當然價錢一定唔會話超平，但比起香港嚟講其實CP值都高，起碼種類多元化，影相打卡冇問題，同埋亦都坐得舒適。

　　就以這個芒果作主題嘅Afternoon Tea Set為例，當中有12種不同類型的糕點配搭，每日供應時間是下午2時至5時半，價錢兩位計1,990銖，其實都唔算話十分貴。供應期一直至到6月30日，如果自問係芒果控嘅話都可以來一試。

　　其實好多香港人都非常鍾意泰國芒果，甚至乎臨上機之前都會喺機場裏面買一些芒果糯米飯拿回香港食。雖然今時今日都會有一些代購服務，從泰國運送芒果糯米飯或者榴槤到港，但個人認為運得過嚟都蚊瞓，一係未熟一係熟得滯，始終都係現場即時食會穩陣啲，咁先至真係泰滋味！

胡慧沖