曾智華 - 會員中的會員中的……｜祿祿無窮
2022/08/23 04:12:42 網誌分類: 生活
因以前馬會選董事，基本都是等額選舉，個個選個個中。又或，早早知道邊個中，硬闖的必食檸檬，輸四條街，冇晒面。
無他，馬會頂層是一個「鐵圈子」，能夠參選及投票的遴選會員，乃一個「獨特群體」，正是——外人不得擅進。
香港馬會，會員萬計，但絕非一視同仁，也非有同一身份及權利。
小弟不是講笑，馬會中，滿是「會員中的會員」。即係點？即係……跑馬會員最底層，呢層會員中的會員，是全費會員；全費會員中的會員，是遴選會員；遴選中的會員，是董事；董事中的會員，是主席。
每個級別，都有明顯權利及地位分野。
跑馬會員不可用山光道會所，只可在平日用沙田會所及享用上水會所。
全費會員個個會所可用，但馬場之內冇特別廂房，賽馬日也冇特別車位，除非係馬主。
遴選會員有特別車位，賽馬日，馬場內有特別廂房，招呼親友，威威。更可選董事。
董事呢？快活谷馬場每人有一個廂房。沙田則有董事大房，位置靚絕。兼且，可以參選主席，更上一層樓。
至於主席，真係勁！在沙田擁有唯一的主席房。每次賽馬日，可以宴請親朋戚友，恍似坐在雲端㗎！真係好威威！
曾智華
回應 (0)
我要發表