曾智華 - 台灣得 香港唔得｜祿祿無窮
2023/06/30 03:23:44 網誌分類: 生活
2000年，香港希望爭取「2006年第15屆亞運會」，為造勢，整個政府瞓身出擊，雖則金融風暴剛過，財政緊絀，但時任特首董建華力拒所有反對聲音去馬。
作為土生土長具深厚感情的香港人，我真係上心上腦，希望香港一定得！可是，靠嗌有乜用？自己呃自己？一個人，一間機構，一個城市，必須先肯承認自己的不足，才有機會進步。
「長他人志氣，滅自己威風」，唔應該，對！但若根本自己唔掂，欣賞別人，再查找自己不足尋求進步，這才是有「卡士」的心態。
今日小弟想講的，正是香港搞足幾十年，仍似一潭死水的的士業。不少市民，講起火滾。
周初到台灣，一出機場，無需行，已有大列新型黃的排列，全部乾淨醒目，司機穿着整齊制服，彬彬有禮，主動協助客人將行李妥善安放。
不止在機場的如此，日日走在街上，也如此。的士充足，車廂整潔，車費合理。
最重要，沒有香港司機的壞習慣，包括：（一）拒載、（二）冚旗揀客、（三）滿口怨言、（四）胡亂切線或大聲講機⋯⋯。
台灣政府好勁咩？唔似！點解佢哋可以將的士業管理得井井有條，但香港政府唔得？
曾智華
回應 (0)
我要發表