曾智華 - 三點三 歎熱撻｜祿祿無窮
2023/07/14 03:24:28 網誌分類: 生活
童年老友的Comfort Food各有不同，有的是街邊咖喱魚蛋魷魚，有的是狗仔粉，有的是廟街甜酸炒蜆，有的是煨番薯。我又如何？出爐蛋撻是也。中學時，個個暑假都冇得玩，去邊？去捱世界搵全年零用錢！中三那年最辛苦，到建築地盤做雜工。不過，發覺有好嘢，正是凡下午三點三，師傅就叫：「肥仔（那時小弟已頗肥）停一停，跟我去三點三！」
大隊人馬揮汗如雨，浩浩蕩蕩操到附近士多休息半小時。師傅個個大啤一支，吸兩支煙，來碗即食麵。我呢？例牌凍檸茶及出爐蛋撻。一啖冰凍飲品，一啖熱辣辣蛋撻，當時來講，乃全日至高享受（因回家的飯餸，非常草根）。
日子飛逝，當年地盤認識者，不少已駕鶴歸西，其他也在人海中失聯。但日日三點三的情趣，仍深印腦海。為重溫美好回憶，至今我仍久不久三點三就去買出爐蛋撻歎。家居附近的何文田商場，正好有一間凱詩餅家，酥皮蛋撻，天天下午三點至四點出爐，為食鬼此時紛紛出動。不少即買即食，享受燉蛋似的柔軟香甜及一咬在口中爆散的酥皮。
曾智華
回應 (0)
我要發表