曾智華 - 為乜冇晒點心車｜祿祿無窮
2023/06/16 03:22:36 網誌分類: 生活
人人熱烈懷緬的，是昔日飲茶有推車仔俾你揀點心，逐籠揭，啱就攞。冇似如今，間間唔係填紙就係掃QR code，冇晒「搶點心」的熱鬧情懷。不過，一切變化必有其道理。酒樓集團掌舵老友P來訊，詳細解釋點解會搞成咁。
其實，萬佛朝宗，都係一個字——錢！做生意講利潤，所以一定揀低成本加大錢流，就係咁簡單。P哥指出：
一、用點心車，需枱與枱間通道加大，即要減少枱的數目。每張枱都計收入，若能擺多幾枱的話，必做，所以先淘汰點心車。
二、用點心車，即要搵人推，而每次推出的數量有限，加上客人圍住又揀又搶，令點心由出廚房到上枱的效率大減，費時又多，直接拖慢翻枱速度，做少好多生意。
三、客人左揭右揭，一邊講一邊揭，口水噴噴，以今時今日的衛生要求，完全唔掂。
四、用點心紙及QR code可以一條龍搞掂，出錯機會少得多。
P哥話，如今大會堂有間酒樓仍推點心車，但成本高，故收費貴，唔介意，去嗰度懷舊啦！
曾智華
回應 (0)
我要發表