曾智華 - 馬會主席是「流口水位」｜祿祿無窮
2023/06/02 03:21:44 網誌分類: 生活
馬會是間「會所」，不少情況可以「黑箱作業」，尤其有個古怪制度，就是由董事推薦遴選委員，而倒轉，董事則由遴選委員選出。於是，利益互相掛鈎，你中有我，我中有你。
故此一向以來，關係皆極之「和諧」，冇人會「搞風搞雨」，百數十年以來一直安穩。直至去年，「新界王」劉業強突然殺出話想「選」董事。
點解個選字要加引號？乃因董事從來不是真真正正「選」出來的，而是透過協商，論資排輩論關係產生的，絕對冇話你想「選」就得。
劉業強怎有實力或勢力打破一個如銅牆鐵壁的關係網？如此夾硬衝，經已得罪大量既定勢力，相信再冇機會坐上董事位喇。
主席又如何？本來，一向規矩，主席只要未滿70歲，多數可以連任一次。不過，上屆又起風雲。有人大力發功，「勸」陳南祿不要爭取連任。
結果，利子厚60出頭就坐正。即係點？即係若佢爭取，可能會冧莊。不過，問題又來了，你想做兩任啫，咁明年66歲嘅副主席廖長江又如何？佢都一定想做兩任喎。到時利子厚一任完成後，會否又會俾人「勸退」呢？塘邊鶴好想知！
曾智華
■左起：陳南祿、利子厚、廖長江
回應 (0)
我要發表