曾智華 - 問？即有小小信啦！｜祿祿無窮
2023/07/21 02:54:18 網誌分類: 生活
如今做賊，最蠢係行劫。因通街天眼，你走得去邊？警察一定慢慢出手，等你以為走得甩才「拉其無備」！
總之，任何罪案，一用暴力，自己有機會受傷之餘，也判得極重。賊仔多數懂得經濟學，「機會成本」太重就制唔過也。何況，搶得的金銀珠寶也要脫手，一浮面畀人知係賊贜，對方仲唔撳你價就奇。分分鐘做埋「金手指」也不定！
所以，「犯罪界」近年全部傾向舒舒服服做騙徒，尤其電話或網上行騙，可以坐在冷氣房中揸住杯冰凍生啤進行，以「釣魚」心態，放100條餌，釣中一條水魚也相當和味。
睇數字，已知騙徒相當豐收。不計冇報案的N咁多水魚，單單願去報的，今年頭4個月已接近1200名！
能夠呃到咁多人，點解？因為原來真係好多人好易呃！就算擺明老千局，都會「半信半疑」，傻吓傻吓就會走入去試試！
我點知？因近日無數老友話在網上見到我教人買「潛在五成利潤股票」。
五成？本來應該傻的才會信，弊在，原來真係有人信，否則就唔會走來問我啦！喂，識就可以搵到我問清楚啫，唔識？若十個有一個信的話，老千就真係「大豐收」嘞！
今日嚴正聲明，附上的宣傳，百分百是騙局！
曾智華
回應 (0)
我要發表