曾智華 - 大姐明感謝公務員｜祿祿無窮
2022/09/13 04:12:44 網誌分類: 生活
睇睇來電顯示先！哦……原來「大姐明」林建明，咁就要聽嘞。否則，若是三九唔識七的，當然懶理。
「智華呀，我中咗呀……真係好彩！」佢笑騎騎話。
當天早上，人人手機網、電視電台報章皆有報道病毒專家袁國勇教授中招。其實，如今中招，根本乃閒事一宗。
「大姐明，連戴兩個口罩嘅袁教授都中啦，如今通街病毒，避無可避，好似我咁，早中早享受，成身免疫力，舒服晒。嗱，你間屋咁鬼大，只得小白同你住，關埋房門七日，當staycation啦，我都係咁搞掂㗎，冇問題㗎 ！」我以自身經驗安慰佢。點知……
「你搞錯晒啦，哈哈哈（招牌笑聲），我唔係中咗病毒，係又中咗牛肉乾呀！」
「咦…」睇睇手錶：「喂，七點幾，邊度有咁早抄牌㗎？係咪校巴上落區？」
「工廠區，新蒲崗四美街呀！今朝六點幾返工廠大廈個竇搞啲嘢，七點半落街取車，嘩嘩，乜得咁勤力呀？智華，我好開心呀，因見到香港公務員咁又盡責，效率又高，重有，小妹又可以向庫房作貢獻。請代我表揚一下抄牌公務員呀！」
大姐明與我，皆抑鬱病康復者，深知保持樂觀情緒對精神系統非常重要，故乜都笑一餐也。
曾智華
回應 (0)
我要發表