曾智華 - 一樹倒下N樹瓜得|祿祿無窮
2022/10/19 03:12:42 網誌分類: 生活
上月,失驚無神,於七點幾冧咗棵十幾米高大樹,橫臥馬路,剛剛壓中三部車,一為校巴,兩為私家車。
事後一睇,成額汗。因冧的樹,正正扑中我朝朝泊的錶位。即係,冧遲少少,我中招!
大樹倒下之後,慘矣,簡直「誅九族」開始!
乜嘢意思?通常,官僚機構辦事,當然以唔使孭鑊為最高原則。故此,大家應可以想像得到,一樹倒下後,附近的大樹,命運會如何了。
做官的一定諗:「嘩,不得了?若再冧多一棵就大大鑊!到時,壓死人點搞?肯定千夫所指。」
於是,最安全做法,就是「見樹殺樹」,有殺錯無放過,將早前倒下大樹附近的同類,全部鋸之,以免發生下次意外。
就咁,最近我行晨運時,經過巴富街及常康街,慘矣。N棵樹被處「死刑」,全棵鋸晒,剩返個躉,用黑膠布罩着,好似死屍袋咁款,非常核突,唔知政府最後會點處理。
究竟,呢批閒閒哋全部十年以上的樹,是否需要全部接受死刑呢?有冇官員可以交代一聲?
當中,有一棵冇判死,但樹幹被鋸去七七八八的,正是在常康街與巴富街交界的鳳凰木。每年開花時,皆燦爛到漫天火紅,全港拍友來打卡。如今,死火,重會否有這樣的日子呢?
曾智華
回應 (0)
我要發表