曾智華 - 大狀是職業球員|祿祿無窮
2022/11/15 03:12:42 網誌分類: 生活
事實,此片有頗多談論點。其中之一為描寫大狀的幾場戲。
我並非想講控方周文健與辯方蘇玉華及林海峰法庭戲中的唇槍舌劍。剛剛相反,係想講講佢哋散庭後的表現。
N年前,大狀老友向小弟指出:「碌Sir,你咪睇庭上控辯大狀好似想你死我亡咁呀,其實,角色扮演咋!一如職業球員,例如C朗,一時打曼聯,一時打皇馬,一時打國米,總之,代表邊隊就瞓身令邊隊贏,此乃專業態度。大狀一樣。今日代表控方,明日就可能代表辯方,冇乜正邪忠奸,代表邊個都好,總之一出場(庭)就要盡力砌低對方!」
所以,大家就見到《正義》片中,開庭時,周文健針住蘇玉華及林海峰嚟鋤,希望兩個被告全部入罪,如此就代表佢「贏波」!
倒轉,蘇林兩位,心態相同,最好客戶明明有罪都打甩,咁就全取三分!
法庭上,控辯劍拔弩張。但散庭時又點?林海峰最神似,立即約周文健:「喂喂,今晚一齊歎米之蓮,等陣邊度邊度等吖!」 表情完全放鬆,絕冇似一小時前法官未扑槌結案一刻那種緊張。職業球員,吹雞完場後,老友的,當然攬頭攬頸「隊」啤去。 大狀絕對一樣!
曾智華
回應 (0)
我要發表