葉澍堃 - 澳門 吃喝玩樂食「興利」「富貴門」 精采懷舊中菜｜葉Sir食經
2023/07/01 03:22:52 網誌分類: 生活
中午到達澳門，首先到鏡湖馬路57號「興利美食」食頓疫症期間渴望了3年的午飯，「興利」做的是正宗懷舊粵菜，蝦多士、蟹盒和煙鯧魚等做得出色，價錢公道，比很多私房菜抵食好食得多。鄧名高是「興利」鐵粉，一早為我們訂座寫菜，菜式有濃湯雞煲翅、古法煙䱽魚、金錢蟹盒、千層蝦多士、糯米雞、佛手羅盤、超級先生飯和上湯浸菜心等，此外還有咖喱牛筋腩、咖喱牛脷和咖喱雞，每人約600元，是頓食得心滿意足的午飯，專誠過大海來食一餐是絕對值得。
蝦多士是何賢先生的特別版，除了蝦，還有雞膶、金華火腿和松子仁等，香口惹味，是佐酒佳品。金錢蟹盒也做得出色，香脆鮮甜，跟冰凍啤酒是神仙配搭。
古法煙䱽魚是「興利」招牌經典名菜，很多吃貨認為是港澳兩地做得最好的煙䱽魚，老闆姍姐要買到靚魚才肯做這菜，大鷹鯧醃得入味，用茶葉煙燻得香氣動人，肉質爽甜香滑，不禁勾起當年在「紅寶石」跟太座撐枱腳食這道菜的美好回憶。濃湯雞煲翅湯甜翅滑，太座連飲兩碗雞湯，笑逐顏開，「興利」的咖喱也不可錯過，謙謙最愛當然是咖喱雞，連食幾件，直豎拇指，頸都紅埋！單尾超級先生飯是大堆頭製作，炒飯配料有多隻鮮鮑魚、雞球、斑球、冬菇、鹹蛋黃和生菜等，全部是當年澳門名人家族的心水食材，12位用賣580元是超級抵食，是我食過最豪華的碟頭飯。飯後甜品是姍姐敬送的香草綠豆沙，是我常食的清熱解毒甜品。
看完Born Pink演唱會後，匆匆到位於黑沙環的「富貴門海鮮酒家」食late dinner，「富貴門」是澳門馬家飯堂，菜做得不錯，抵食大碟，是夜菜式甚多，有八寶冬瓜盅、上湯澳洲龍蝦球、雜菇鮑汁扒黑豆腐、鹽焗奄仔蟹、豬腳薑、秘製咖喱崩沙腩、豬膶杞子浸苟𣏌和龍蝦肉薑蔥撈生麵，甜品是脆皮倫教糕，埋單每位約500元，絕對抵食。我最愛的是餐前小吃蘿蔔皮、鹽焗奄仔蟹、咖喱牛腩和脆皮倫教糕，咖喱腩用的是澳門「大昌」咖喱膽，據說非常搶手，很難買到，下次來澳門一定要去買番幾罐試試。
在澳門我們住在銀河旗下的「JW Marriott」萬豪酒店行政樓層，可以免費享用行政會所的餐飲服務，早餐除了國際美食，也有即點即煮的中式粉麵，會所的下午茶點和輕便晚餐相當不錯，黃昏時在這裏飲杯冰凍啤酒配馬介休球，或者來碗牛筋腩河粉配普洱茶是賞心樂事，澳門真是吃喝玩樂的好地方！
葉澍堃
■佛手羅盤
■澳門「興利」的古法煙䱽魚
■富貴門的鹽焗奄仔蟹
■萬豪酒店行政會所的牛筋腩麵
■在「興利」來張大合照
■糯米雞
■超級先生飯
■千層蝦多士
■金錢蟹盒
■富貴門的冬瓜盅
■脆皮倫教糕是第一次食
■富貴門的咖喱牛腩
■跟「興利」老闆姍姐合照
回應 (0)
我要發表