古星輝 - 認住呢個「#」｜乜都5G

近年，「騙徒手法層出不窮」已經由網絡潮語，進化成大家掛在口邊嘅說話。近年嘅電騙手法的確變化多端，稍一疏忽就會墜入陷阱。根據警方資料，近年電騙案件數目一直上升，單是今年首9個月已錄得2506宗，涉及損失金額達7.05億元，各位絕對不能掉以輕心。

面對經常變種嘅電騙，電訊業近年嘗試以不同方式，幫助市民提防電騙。數個月前，我哋推出集合攔截詐騙來電及讓用戶自訂來電黑名單嘅「來電管理組合」，65歲或以上嘅月費用戶仲可以到門市免費申請使用。

另一方面，業界相當配合政府嘅措施，例如年前已經喺可疑境外來電加入「+852」字頭，方便市民識別。根據通訊辦資料，截至上月底，電訊商已攔截逾190萬個以「+852」為開首嘅可疑境外來電，亦暫停約49萬個懷疑詐騙境內電話號碼嘅服務。

助辨別已登記短訊發送人

噚日開始，大家可能留意到部分短訊發送人多咗個「#」，呢個並唔係電話出現問題，而係通訊辦聯同業界推出嘅「短訊發送人登記制」正式實施，對於已登記嘅短訊發送人，一律會喺發送人名字前加上「#」以資識別，例如#3HK、#SoSIM、#3HK_Renew及#My3_App等，萬一遇著使用同一名字嘅偽冒發送人，網絡商可將該訊息即時攔截，幫助減少詐騙訊息；呢個計劃嘅另一好處，係用戶毋須預先安裝任何程式，亦唔使做特別設定已經可以使用。作為首階段參與行業，已經涵蓋23間主要電訊服務營辦商，預期銀行業將會於明年首季加入此登記計劃。

提一提大家，登記制暫時處於過渡階段，各位仍有機會收到由登記發送人發出，而又冇顯示「#」嘅短訊。大家留意，經即時通訊程式如WeChat及WhatsApp發出嘅訊息，由於不屬電訊商提供嘅服務，故暫時並沒有列入登記制內，所以緊記時刻打醒精神，千萬唔好輕易提供重要個人資料，亦不要隨便登入短訊內嘅連結，以策萬全。

和記電訊香港行政總裁

古星輝