有危有機~ (復建居屋)

上二星期特首出招收緊按揭,加上近日吹風復建居屋,我相信都一定會實行~樓市應該短期有下調的跡象,但應該唔會跌多過20%~由於期望復建居屋,又期望政策會令樓市跌,成交一定呢幾個月都會減少~租盤一定增多,租金有緩和趨勢。

奉勸各位係加按套現整餅的朋友, 呢個時間就係財叔所講:"升市買平樓,跌市換大屋" 加按套現多D來等跌市買大D的單位的機會。來緊銀行一定會加息同收緊按揭,借錢會愈來愈難。加上交投少,一定影響銀行估價。要加按要快啦!

另外,有心買自住物業的人注意,唔好諗住等佢跌多D先買,人愈跌愈唔敢買,就等於HSBC 當年33蚊都冇人敢入,之後升到99蚊就後悔一樣,冇人知幾時跌完同升完。居屋起好最快都3年幾,你白交3年幾租金,最後又買唔到居屋,又繼續租,租到幾時呢? 政府如果起得個5000個單位有咩用呢? 夠公屋人(綠表)爭定白表人爭?如果等居屋起好,究竟有冇你份入場買? 

好似我家姐咁,結婚5年都租樓,雖然租金真係好平,4000都唔駛,但5年足足消費左約24萬租金,如果買200萬樓已經夠1成首期, 借9成,30年供,2%息口,月供7000蚊,本金3800,利息都係3100蚊,利息平過租樓消費, 本金唔好忘記係還自己的樓價。如果供左5年,還的本金就係(3800X12X5=228000), 即係話你有22萬的資產,就算樓價5年唔升,當儲蓄都係好,樓價跌根本對你冇影響,當交租比銀行。

最慘的係如果租30年,同供30年,結果的相差可以好大,一個係消費係租金(4000X12X30=144萬);一個係供完擁有 (200萬資產) 所以租樓人士三思。