換樓好時候~

沉寂半年,似乎辣招出現後,樓市都靜左一排,工廈直頭靜到冇朋友,亦導致我出現投資第一滴血,有一摸貨損手離場,有一個就收租持有。由於而家真係冇咩好搞,唯一就係市場有平1成的盤,都來自一D驚青業主OR 投資者賺夠離場。有危有機,有不少人以此消息四出搵樓,而且亦到劈到個靚價。到今日我都係覺得有自住需要的話應該要買,始終低息仍有一段日子,供平過租,細價樓供應仍然短缺,只要買入樓齡25-30年,300萬以下的物業,其實都好安全,因為上車的人始終多。

上回講葵芳1月以350萬買入,現市價380-400萬,平市價入差不多10%,租金現市值租12000-12500。但葵芳係升市比較慢的區,自住的性質較強,本人因為自住先買,因為MTR上蓋物業相對算平。

講番自己呢排做左D乜記低先~葵芳收左樓租比家姐先,辣招後我忍痛放賣工廈,繼而出售爸爸持有的物業之後換樓。點解要賣:
1. 套房舊裝修,租唔起價,要好價就要重新裝修,浪費金錢同裝修時間
2. 地點做不到BNB,原本打算再整多間,但地點不合宜
3. 套房係有潛建,遲早都有拆的一日,回報不是持續
4. 換地點買個間旺區,近MTR,BNB最緊要方便

出售當日就即時四出搵樓,大大話話都睇左十幾間,終於不負有心人~
由大角咀轉陣佐敦,
285"換個450",
30年轉到50年,
MTR由行10分鐘變2分鐘,
$10000呎變到$7000呎
除左樓齡大左D,其他都賺曬,最緊要2年後的高鐵效應，佐敦應該都會受惠。補40萬差價就OK,其實七成按揭都係比多首期12萬,其實都幾抵。所以市好真係咩樓都賣到好價,至於搵唔搵到筍盤就靠自己。