曾智華 - 由頭開心到尾|祿祿無窮
2022/10/11 04:12:40 網誌分類: 生活
想開心,除了要努力自製外,也可到處尋找的。例如,搵套窩心電影,躲在黑漆影院內,與劇中人共同渡過兩小時。
今期上畫的《幸福入場券》(Ticket to Paradise)正有這個療效。靚仔靚女靚佬靚姐加靚風景,全間戲院觀眾齊齊去到澳洲昆士蘭美麗小島度假,離座時輕鬆愉快。
欣賞此片,完全唔使用腦。因為,任何普通影迷,一開場已幾乎個個知道結局,完全冇驚喜。問題在,導演點炮製過程,令其幕幕畫面有色香味俾大家歎矣。
一對二十五年前閃婚再失敗的初老怨偶,當年「搞出」個心肝寶貝女Lily,大學畢業,當然要去觀禮。本以為見一次就此生陌路。
點知, Lily行完畢業禮後,與女友到滿是原居民的未開發小島度假,竟然愛上一位英俊土著青年,短短三個月決定閃婚!
嘩,得了?飾演初老怨偶的佐治古尼及茱莉亞羅拔絲立即飛赴當地,名為參加婚禮,實為合謀拆散呢對「閃婚鴛鴦」,以免女兒重行自己悔婚後路。過程冇悲情,只是笑料百出,大家開開心心就過咗一百分鐘。感覺實在好正!
曾智華
回應 (0)
我要發表