曾智華 - 肥蟲郁郁貢｜祿祿無窮
2022/10/12 04:12:48 網誌分類: 生活
豪少少的，一於到會。小弟食過幾餐大廚到會，連樓面高級侍應都連整套服務，甚至餐具有齊，稱心滿意。當然，花費並非普通人可「玩」的。
老友「紀律K」更勁。因屬超級為食鬼。所以，不時捐窿捐罅搵食外，更有一招，唔知邊度來路數，可以自己入飛機貨！
呢呢，上周末佢又召集大群日本魚生迷，拉隊上屋企，一於開其刺身大餐。事前，安排日本買手晨早到新築地掃貨，跟手打包立即送上機，下午抵港。K哥準時直奔機場取貨，之後，飛車到尖沙咀相熟魚生店，託日本仔師傅片呀片，完成後，再用冰封運回家。
晚上七點，八丁日本魚生迷各攜一瓶頂級大吟釀，口水流流等開餐。K哥早早命菲傭姐姐預備一個滿是碎冰的玻璃盤，刺身回家後，逐件擺得靚靚上枱。
未食做乜？當然先打卡，你又打我又打！打打吓，Madam I突然尖叫：「嘩嘩嘩！」繼而彈開，
乜事呀？全場俾佢反應嚇親。
「有……有蟲呀！」Madam離開一米指住盤中一件魚生嗌。
K哥一睇，哎吔吔，果然，一條透明肥嘟嘟蟲生生猛猛在起舞（圖）。死得，呢餐食唔食呢？
曾智華
回應 (0)
我要發表