曾智華 - 兒時味道雞絲粉卷｜祿祿無窮
2022/10/13 04:12:49 網誌分類: 生活
我一輩，非常喜歡有點心車叫賣的茶樓。可惜，因要「經濟效益」，幾乎全港消失了。另外，五六十年代不少點心品種，也是同樣原因再冇乜酒樓肯做。例如大大隻的糯米雞及雞球大包。簡單，你食一隻已飽到上心口，速速埋單，咁……舖租及人工咁貴，經營者賺乜？
所以，在人人追求最高毛利下，飽肚點心，日漸消失。
另外部份點心少見，因麻煩難做又或唔留得，必須即做即蒸，賣唔完就要掉，例如雞絲粉卷（見圖），已難在一般酒樓搵到。
不過，難搵唔等於冇！上周「馬主L」來電：「喂碌Sir，為食報告，終於俾我揾返兒時味道的雞絲粉卷喇，正！快啲去歎啦！」
去咪去！呢間「大四喜」，藏在跑馬地一條頗難搵的橫街，名昌明街。
推門入內，乾淨企理，食客斯文，跑馬地典型，就是令人舒服。
打開點心紙，咦，但竟有近五十款點心選擇，唔簡單噃。
既專誠來歎雞絲粉卷，當然立即柯打。另外，七條大漢來次狂風掃落葉，乜都叫！
食飽飽後要評分。咁細間食肆有此高水準，師傅乜背景？噢，原來出自大酒店中菜部，半退休來此，以表演心態過日晨！
曾智華
回應 (0)
我要發表