青心直說：誰是領先指標

當唔少人仲賣緊甚麼中國增長、中國溢價，冷不防唔少中資股（尤其內需股）已慘被市場逐隻劏，以內銀及內房為首的內需股分別於去年 8月及 11月見頂，近期嘅家電、汽車、體育用品、醫藥板塊個別股份亦輪流於 4月至 6月出現明顯派貨。雖然下半年不少聲音異口同聲話內需消費股仍係主流，但自股價異軍突起後，已因估值過高而被輪流洗倉。將心比己，當你係早在 4萬億振興經濟規劃出台揸貨嘅基金經理，根本未需要等中國公佈 6月份鐵礦石、銅及生產用原材料反映減產之滯後數字，睇見波羅的海乾散貨指數自 5月 26日跌咗 59.6%，當中國進口原料數據一出，大家才恍然大悟點解航運股發盈喜股價仍然唔起，更明白哪一個才是領先指標。

雖然基於物極必反道理，相信多個已被拋窒的板塊將隨資金回流慢條斯理地翻生，任憑你點換馬，換嚟換去都只係抓住咗同一個市場。 A股唔爭氣，一下子連外圍都出問題，港股更不堪一擊，上周港股無論升市跌市，全周二升三跌都係陰燭收場，敗象已現， 6月 11日遺下位於 19729點上升裂口必補，另一次位於 4月 16日 5連陰後出現之下跌裂口在 21789點也極待回補，相信要由上證指數重見 2500點才能展開。
反觀亞太區其他股市，尤其東盟市場年初至今都維持正數，當中印尼在全球股市年初至今表現中更以 18.1%升幅排名第 2，僅次丹麥的 21.6%升幅；韓國也有 3.3%進賬，連今年 3度加息嘅印度都有 2.8%升幅，真係強勢不能移。年初至今中港台皆跌凸，台灣股市跌幅 6.4%亦較港股 7.4%跌幅溫和；上證指數年初至今計亦以 26%跌幅排第二，僅次於希臘 26.5%跌幅。
買同一個市場裏面嘅股份唔係真正嘅分散，然而若只想買一隻股份享受以上市場跑贏之時帶嚟嘅契機，一樣有選擇，明天開估。
胡孟青
獨立股評人