心態決定一切~
其實到而家講左咁多實戰、方法、技巧。講咩都假,如果你根本唔想、唔信、覺得冇需要,唔想改變,唔想財務自由的,真係冇人幫到你~
最緊要問自己為咩要買樓? 為自住?投資? 財務自由? 如果想用投資直到財務自由,你的心態就決定一切,你究竟有幾想財務自由? 而且問點解要自己財務自由,點解唔打一世工?安安定定有糧出?
好老實講自己,我真係好想變,好唔甘心打死一世工,雖然我做緊政府部門,搵萬幾,18年後有4萬人工,退休仲有退休金,政府養你一世,唔駛憂,如果冇咩要求,穩穩定定,餓你唔死,唔會發達,就咁做到60歲~我而家26歲,我真係唔甘心將我的34年青春放係工作,好似的同事番工等放工,放工等退休,等34年。我想財務自由的原因係想做自己的工作或興趣。之前的我好想開CAFE,雖然我知唔一定賺,但為興趣我知可能會蝕,不過我知我要蝕得起,所以我要有大筆資金同現金流維持~
我睇左咁多成功學的書,第一: 其實好多都講心態,究竟有幾想成功,幾想改變?我頭一篇文章提過一本書"秘密" 講的係"吸引力法則", 就係話你每個思想都是可以真實存在的東西,愈想得多,愈有機會讓你想到方法。試問一個人如果從來冇諗過要財務自由,咁你點會財務自由到呢?如果冇諗過買樓收租可以有現金流? 你點會去買樓? 所以我睇完本書之後,真係日思夜想,番工諗放工諗,點樣可以透過買樓收租達到財務自由? 終於比我諗到點樣可以玩呢個遊戲,就係將我爸層樓轉名再加按,於是我就有第一桶金,原來有時D野諗通左,就係咁容易,有D人窮一生的精力都買唔到樓,或者儲幾年先有錢~所以你心在那裡,你的成就就在那裡。
第二: 行動,成功的人係透過大量行動直到成功為止,屢敗屨戰。20%思考,80%行動去實行,一想通了就實行,因為沒有行動就算有幾多的想法都沒有結果。而且別人有的經驗也不是你的,要自己行過走過才深刻。正如就算我講到幾有方法,你沒有真係去睇過樓,買過樓,租過樓比人,你都唔知有咩係要留意,永遠只可以看著別人買完一間又一間,一直想等樓價跌睇佢幾時負資產死。
有好多人話買唔到樓,因為佢地根本不是真正想有樓,可能只係見人有佢想有,一覺得貴,遇困難怕麻煩,就停左係度得個諗字,我並唔係要叫人而家買樓,但你有冇真正諗過幾多錢先買? 跌幾多先買?租金回報幾多你會買? 如果你一直都冇預備過冇做功課去睇樓,冇留意住個市,唔熟D地產,就算真係有荀盤介紹比你,你都唔識分荀唔荀,機會係留左比有預備的人。
今日如果你好想買樓,無論冇錢冇首期,冇穩定工作,唔駛我講你自己都一定會諗方法買,同人借,問家人借,同幾個人夾,做9成按揭,慳D儲多D上車,咩都會諗到出來~ 好似細細個你想買心愛的玩具一樣,你死慳死抵都會儲錢買,可能食飯食平D,行路儲搭車錢,問家人借住一個月零用錢,做PART-TIME,你日想夜想點都要得到佢的時侯,你唔駛人教你都諗到方法。我唔聰明,想財務自由我都係搵方法,結果係網上SEARCH到財叔-財務自由人,我覺得WORK就去學,我敢講睇的人多,做的人少。等於信耶穌一樣,被召的人多,選上的人少。
