詠藜園聘新血 出錢出秘方
2016/10/07 08:41:13 網誌分類: 生活
世界各地名廚地位崇高,偏偏中廚仍難以脫離「廚房佬」的形象,新血不入行,中廚老化,手藝恐失傳。獲米芝蓮推介的老字號川菜館詠藜園斥一千萬元,以傳授中菜秘方,希望吸納年輕新血入行;學成手藝後更可獲「打本」做老闆,仍乏人問津。如年底招聘仍不成功,詠藜園擬將計劃轉移至內地,負責人楊莉莉慨歎:「根喺香港,始終想畀香港人先,但如果香港請唔到,都要搵人傳承(手藝),我都無辦法!」 詠藜園早前宣佈出錢出秘方,開辦「千歲擔擔麵店」,望招聘七十位新血,培育年輕接班人,如應聘者表現合格可獲「打本」創業。食店另一方面安頓一班老員工,讓他們轉任教官,免去不少辛勞。楊莉莉說,已預留一千萬元資金,實現這個「老幼」計劃,可惜,招募數月,仍未有成果,如年底最後一次招聘仍不成功,無奈下須向內地招手。 「有中大畢業學生,好鍾意做中菜,但最後無嚟,因為屋企人反對,話『廚房佬,讀唔成書做㗎』,好遺憾。其實係偏見,外國嘅廚房佬地位不知幾高!」 應聘者通通「甩底」 記者採訪當天,原本有新人返工,但同樣臨時「甩底」。「個女仔好有抱負,覺得係千載萬逢嘅機會,原本做行政管理,三萬幾蚊一個月,辭咗份工話要過嚟,點知突然唔嚟,話問過人,呢度好辛苦,專業精神,做鬼死人。」她又說,早前有華仁書院畢業的年輕人欲入行:「佢阿爸同大哥都係律師,佢偏偏鍾意做廚師,但阿嫲唔想佢做。」 做廚四十多年的駱師傅,年屆七旬,他坦言,餐廳「四圍搵人」,原本有新血返工很開心,豈料「空歡喜」。他說,詠藜園人情味濃,不願退休,只望有新人加入承傳手藝,願傾囊相授,「事頭婆真係放個心喺度,好着緊班老員工,生意好就分錢畀員工,接班人唔使經驗,有心學,就教佢!」 任職九年的董事助理朱先生亦指,希望有新人加入他們的大家庭,「之前一年之間爸爸走咗,外母走咗,阿嫂都走咗,老闆娘淨係話唔好理公司,搞掂自己嘅嘢先,糧照出,仲問我夠唔夠錢使。」 楊莉莉慨歎,提供做老闆的機會,仍未能吸引年輕人入行,主要是工作辛苦,新人入職最長做一周便辭職。「好多人入嚟諗住可以即刻煮,其實唔容易;你學做包,首先學識認高低筋麵粉,都有排學。」 餐飲聯業協會會長黃家和說,青黃不接是行內普遍現象,尤其中廚更難求。他又指,「廚房佬」的形象有影響,但很難一時三刻改變,在提升競爭力及改變形象上,政府及業界仍有大量工作。 記者麥凱淇 |
| |
| |
| |
回應 (0)
我要發表