股神未睇淡
2017/09/04 08:42:06 網誌分類: 經濟
美國連續兩個月新職位錄得強勁增長後，最新數據顯示，上月新增職位升幅放緩至不足16萬份，加上失業率回升，工資按月升幅似有若無，加上失業率意外地回升0.1個百分點，令市場更加相信聯儲局今年內將難以再加息，帶動美股上揚，杜指一度重上22000點關；美匯則受壓。杜指收市報21987點，升39點，納斯達克指數收市報6435點，升6點，標普500指數收市報2476點，升4點。外圍本來風平浪靜，但周日北韓又走去核試，令人擔心稍為降低咗熱度嘅地緣政治風險又升番溫。
有吸引力股份買少見少
恒指出現近年最長嘅升市，累積升幅都唔嘢小，動力來源主要係炒全球復甦，尤其美國數據最為強勁，加上通脹仍然溫和，令到資金源源不絕流入美股。經濟向好，美股兩類股票最受惠，就是科技股同銀行股。股神巴菲特買重蘋果股票，成為大贏家，同時又透過早前行使換股票據，成為美銀最大股東。佢係美股處於歷史高位之際接受電視訪問時估計，目前美國經濟增長可能正在加快，但美股經過數年快速上揚後，現時具吸引力的美股愈來愈少。雖然係咁，股神認為為買股仍勝過買債。股神又表示，巴郡自去年開始投資蘋果股票後一直有加碼，可以肯定截至上季仍有再買入，至今一股都未沽出過。
港股一向同中美股市關係密切，今年內地股市主體平穩，本地股市上升主要係受惠美股帶動，所以升得最多板塊都同樣係科技同金融板塊，其中特別係本地同國際銀行。聽股神嘅講法，佢對美股嘅睇法唔可以講太好，但都未到時候睇淡。按照股神睇美股，港股短期就算有調整力，但如果見佢連升八個月去沽高，咁就要留意會唔會太早造淡嘞。
內銀股回吐好正常
上個星期恒指調整，臨尾兩日內銀股跌幅略多，令到指數係兩萬八千點企唔穩，咁多少係因為之前股價已經升咗，所以要消化一下。睇番四大內銀上半年表現算係唔錯，盈利增速回升，中國銀行（3988）增長仲可以去番雙位數，四間龍頭內銀盈利首次同時破千億元人民幣，四間合計上半年共賺逾5,000億元，可以話比預期理想。由於內地銀行業整體盈利比之前有所回升的消息已先一步披露，股價紛紛炒上一年高位，加上上半年貸款增速減慢，所以到好消息出台就變咗大戶食胡之時。
炒栢能激過炒BITCOIN
科技股係騰訊（700）同幾隻手機股大炒後，開始炒到二三線公司，有啲禾雀亂飛嘅味道。上周隻柏能（1263）股價爆升，主要係市場對虛擬貨幣BITCOIN價值急升嘅憧憬。栢能主要從事設計、開發及製造供桌面電腦、電子製造服務使用之圖像顯示卡，以及製造及銷售其他個人電腦相關產品及零件，當中顯示卡就係用來幫助提供電腦運算力去挖BITCOIN的工具。
柏能上星期公佈中期業績，公司擁有人應佔溢利為43.7百萬港元，同比增幅19.7%。每股基本盈利0.1012港元，派中期股息每股0.04港元，數字唔算好驚人。期內，公司自有品牌圖像顯示卡新產品銷售強勁，2015年呢項生意係24元，2016年增至31.6億元，增幅達29.5%。係呢個概念底下，佢股價由一元水平爆升上4.35元水平，單係上周公佈業績後股價已急升近三成。過去公司盈利由賺幾千萬到虧蝕都有，最另係2016年賺咗1.5億元，如果只計去年單一年業績，佢市盈率係十二倍，數字唔算特別高，但佢嘅主打產品相當單一性，如果睇多幾年嘅盈利，接近20億元嘅市值都唔係咁低，所以究竟BITCOIN熱潮維持得幾耐同可以再帶俾佢幾多增長，係股價有無得再升嘅關鍵，從呢個角度睇，炒佢嘅風險應該唔比炒BITCOIN低。
睇好高鐵效應港航貴賓室落重本
香港航空近排動作多多，上個星期佢哋嘅貴賓室開咗，中環茶友都有去捧場，高層大力推薦試佢嘅VR電影體驗，聽聞稍後佢哋仲會贊助埋馬會嘅盃賽。
當日為咗試吓新體驗，搞到晏都冇乜點食。港航咁落本搞呢個貴賓室，反映佢哋對前景嘅信心，聽商務總監李殿春透露，公司去年有錢賺，同事都有花紅分。航空業賺錢唔易，尤其香港市場競爭咁競烈。不過，李總就對前景好有信心，話未來高鐵開通，將會對香港航空業帶來不可錯過的機遇。據佢嘅分析，有咗高鐵後航程在八百公里內的短途飛行，基本上都會被取代，好似未有高鐵前，北京飛濟南每天有二十班飛機，近年已逐步減至每日勉強維持一班。相反，對於以國際航班為主的香港就非常有利，因為乘客可以坐高鐵來港乘機，服務範圍大增，屆時就係香港航空業新嘅黃金期。
國泰大佬唔易做
講起港航賺錢，好多人奇怪點解國泰上半年蝕成20億呢？茶友話如果睇真條數，國泰唔計燃油對沖，其實都仲係賺緊錢，只不過佢以前咁好景，大家要求高，加上成本結構偏高啲，所以變成轉身有啲困難。佢舉個例子，茶友早前去搭飛機，入國泰貴賓室食碗擔擔麵，味道依然相當正，啖湯仲係好濃郁，搞到佢食完一碗佢想整多碗陽春辣麵，但呢啲好嘢大家習慣咗，覺得國泰係高品牌，做得好係應該嘅，呢個就係做大佬嘅難處嘞。
陸羽仁
君子不立危牆之下20170904
上周隨著大內銀公佈業績, 恒指出現了反高潮現像。
客觀而言, 恒指上升勢頭未有大改變, 市場熱度未夠, 散戶參與度不足,
雖然說恒指已超越了15年大時代的重蟹貨區域, 向上的阻力較小,
但因已被各傳媒分析員唱得太厲害, 短期有機會要先震倉, 將跟風的散戶震出局才能再上。
個人覺得三大內銀, 特別是中行確實仍有投資的價值,
所以建議若持重貨的短線投資者, 應在高位分段沽貨鎖定利潤, 搏調整到20天線時再買入。(現在三大行20天線位於:3988 3.96/ 939 6.67/ 1398 5.67)除非三大行升穿上周高位, 否則不要追貨。建議50%持倉。
長線而言, 三大行仍在很健康的上升軌內, 可以放心持貨, 除非跌穿50天線, 否則不用理會。
當中值得留意的是中行, 這次業績和上次業績表面上盈利相差很遠, 實際上只是兩次撥備費用比例不同而已, 這實際上只是會計帳目上的左袋入右袋, 不明白上次為何人人唾棄, 這次就一面倒唱好......所以陰謀論點想...大戶已經收集夠, 打算炒高位散貨?
呢度竟然 無人留言既@@