縮表唔係好消息
2017/09/25 08:42:02 網誌分類: 經濟
收水影響資產價格
聯儲局啟動縮表，資產負債表會由4萬億美元逐步削減到2.5萬億美元。睇番聯儲局擴張資產負債表嘅過程，最先係2009年金融海嘯爆發，前聯儲局主席伯南克做過教授，佢研究上世紀30年代大衰退嘅經驗，得出的結論係當年央行於不景氣時收緊銀根，係導致出現蕭條嘅原因，所以佢諗咗唔同嘅招數去放水。除咗減息外，佢仲諗咗量化寬鬆（QE）呢招，藉住擴大央行嘅資產負債表，將錢注入市場，令到融資成本大跌，間接效果係減少咗企業因為無錢而退閉，避過咗海嘯引發的恐慌效應。
在聯儲局大力放水初期，市場被金融海嘯嘅恐怖場面嚇儍，對量化寬鬆作用半信半疑。大量資金喺銀行體系閒置，造成債息超低，帶動美債進入超級大牛市。其後隨着大家驚魂甫定，資金繼而推高美股，並且慢慢進入實體經濟，令美股出現大牛市之餘，全球資產市場，包括物業等都出現虛升，慢慢實體經濟都受到帶動。
儲局量化寬鬆造成全球股樓進入牛市，係一個不爭的事實，因此美國啟動退市收水，遲早會影響到資產市場。股市有升必有跌，雖然投資者多數樂見升市，不想見到跌市，但市場並唔係以人嘅主觀意志去轉移嘅。第二係宏觀貨幣政策影響市場，產生效用嘅時間好受投資者心理影響，如果大家都高度重視，咁效果就立竿見影，例子之一就係1987年股災，就係受當時聯儲局主席格林斯潘加息一嚇所以出事，但如果大家當佢無到，咁政策就可能要以年計才會出現效果。不過，遲到不等如不到，有咁嘅政策原因，就會有咁嘅政策結果，所以如果話啟動縮表係消息明確咗嘅好消息，咁就似乎樂觀咗啲。
樓市恐受雙重夾擊
由於政策方向開始轉變，所以投資者炒還炒，警覺性都要提高。如果係炒股仲好，因為有乜失閃仲可以走得好快。如果要炒樓，就要留意現時有幾重辣招，入市成本好高。
上個星期本港地產股炒過一浸，主要係市場相信現屆政府改變咗態度，增加同發展商合作去提高住宅供應，令到發展商手上嘅農地更易獲准改建為住宅或者補價，但呢個做法對地產發展商有利，但對樓價就有壓力，因為政府放寬土地發展，令發展商有機會可以將難以發展嘅農地變成其他項目，既減低風險，又可以有相對高嘅利潤，但咁樣就會增加供應，對樓價產生壓抑作用。
聯儲局縮表，加上未來住屋供應有望增加，對樓價自然會有壓抑作用。不過，最近新盤開售，發展商依然進取，有將軍澳開售嘅樓盤價格創出區內新高，發展商嘅賣點係呢個盤嘅定價平過旗下元朗樓盤，咁樣自己同自己比較嘅「賣點」，真係可圈可點。
當下樓價去到天咁高，搞到政府話連貨櫃屋都想搞，可見高官話增加供應唔係講笑，所以一擲幾百萬買個納米盤，如果係用嚟炒賣，都真係要諗清楚將來想賣嘅時候點離場，所以有地產代理老闆喺縮表後繼續唱好樓市，就真係聽到人耳都側埋！
美國縮表後，借住美國評級機構調低中港評級，恒指喺上周五跌咗229點，跌穿28000點，收報27880點；國企指數收報11109點，跌89點。不過以全周計，恒指仍累積上升72點；國指也累漲41點。美股收市就變動唔大，杜指收市報22349點，跌9點；納斯達克指數收市報6426點，升4點；標普500指數收市報2502點，升1點。
期望眾安登場沖喜
藍籌股上周五幾乎全線下跌，匯控（005）、建行（939）及平保（2318）為跌市元兇，匯控跌0.59%收報76.2元；建行跌0.75%收報6.62元；平保跌1.6%收報61.6元；三股合共拖低恒指51點。
地產股亦普遍下跌，不過新世界發展（017）就逆市升1.63%收報11.22元。大炒多日嘅內房股回吐，恒大（3333）單日跌3%收報29.5元；遠洋集團（3377）跌5.6%報5.41元；綠城中國（3900）跌5.5%收報10.34元；世房（813）亦跌5%收報17.38元。估計大市本周初可能仲有壓力，跟住就睇吓隻眾安保險（6060）掛牌可唔可以沖喜吓嘞。
流心月今年大熱太古整餅唔執輸
迪士尼與友邦（1299）合作的慈善跑於上星期舉行，吸引咗近萬人參加，今年賽事還增加了領袖盃，中環茶友都有份去湊熱鬧，仲見到唔少老友，好似旅發局企業事務總經理梁美寶（Cynthia）同太古集團高層唐偉邦，後來仲收到由太古公關大員送出今年大熱嘅流心月餅。
水貨客來港掃貨
香港月餅年年有新潮流，聽講今年由過去好興嘅半島奶黃月轉到去流心奶黃月。早前有中國水貨客來港買月餅餅卡，惹來歹徒垂涎施襲，搶走過百萬現金，有說掃貨目標就係呢啲大熱的流心奶黃月。
水貨客熟悉行情，中秋節前預知產品有機會大賣，為了確保有貨供應在手，遂攜同現金來港掃卡。
至於茶友收到嘅奶黃月，睇真原來係中國出品。講到月餅嘅品質保證，中國人都要嚟香港買餅，咁點解太古要送中國生產嘅餅呢？皆因近年太古好有興趣於當地發展食品業，年前就收購咗一家麵包集團，呢啲潮流大熱就係佢哋自家出品。既然自己有好嘢，咁就無理由去幫襯人哋啦。
中國生產香港「品管」
呢盒由中國生產，香港品質保證嘅月餅，茶友食落口都話唔錯，如果唔留意睇佢盒面嘅簡體字，都未必留意到係中國產品。茶友話，明年月餅唔知又興乜？有人估會果饀月餅，因為夠健康，唔知太古會唔會又有呢啲新口味供應呢？
陸羽仁
網誌分類: 經濟
未跌破上升軌20170925
上周先高後低,若能在28000樓上按小貓建議成功沽貨的師兄姐,到了周五低位又可以考慮重新買入了。
如果未能成功沽貨的人, 要留意這周恒指可能會在觸及20天線後反彈, 但如果今周再一次跌跛20天線時, 就可能真的要調整至50天附近, 即27500一帶, 甚至擊穿27300的重牛區了。
除非大市成交能達到1200億以上來向上突破, 否則這種憑高沽出, 再憑低買入的波段操作應該可以持續一段日子。
三大內銀又回到波段低位, 只要不跌穿現價, 就可以吸納, 短線又可以候高再沽。
當中尤其是939建行, 已到50天線(6.62), 相對工行(5.63)中行(3.93)有較大的搏反彈價值。
要留意, 若建行現價不反彈而繼續下跌時, 工中行可能會跟隨, 反則就可能啟動新一輪升浪。
中長線而言, 無論恒指和工中建, 都仍在牛市的合理調整範圍中(中線看50天, 長線看250天), 只要不是大成交跌破現價, 仍可安心持股, 否則應離場觀望。