要遏樓價首要有地
2017/10/23 08:42:08 網誌分類: 經濟
美股上周大強勢，周五三大指數再升。杜指收市報23328點，升165點，納斯達克指數收市報6629點，升23點，標普500指數收市報2575點，升13點。美股呢排咁標青，主要係透支美國減稅嘅利好消息，呢樣嘢香港企業唔會直接受惠，所以美股雖然大升，港股就沾唔上邊，相反，資金可能集中精神炒美股，少咗睇新興市場，加上市場仲係觀望緊十九大利好抑或利淡，所以港股完全跟唔得上。
十九大習近平顯強勢
今個星期，市場焦點會係即將分拆網上小說平台閱文的騰訊（700），上周五騰訊係反彈市成交多達50億元，為交投最活躍的股份。另外內險股表現都標青，平保（2318）收報67.15元，基本上係歴史高位無乜點到。
市場焦點而家等緊十九大會議結果，焦點係周中宣佈的常委名單。今年入常名單守得好密。係會議開幕時，總書記習近平講足三個幾鐘頭，充份顯示強勢，如無意外，揭盅出嚟嘅名單都會反映佢嘅影響力。係觀望內地未來五年大局之際，中環茶友話題之一，係未來樓市發展。因為《施政報告》拋咗幾招出嚟，包括首置盤先導計劃、綠置居同白居易恒常化。有評論話政府以置業為主導，推出咁多細價樓，必然令到而家最煞食嘅納米盤滯銷，甚至可能令樓市轉勢。
對於《施政報告》幾個房屋計劃，陸羽仁睇法係綠置居同白居二，針對嘅係公屋同居屋買家，基本上佢哋唔係私樓嘅買家，真正有影響嘅係中產上車盤，但先導計劃只得一千個，即係話未來兩、三年都唔成大氣候。中產上車盤首要解決係土地，無地點樣起屋。政府講明唔會用公屋地起，如果用私樓地起，就會令私樓減少。特首林鄭月娥日前講多啲，話可以考慮係發展商補地價項目，容許佢哋增加地積比，將呢啲樓用嚟做首置上車盤。呢個構思聽起嚟可行，但細心諗吓就算政府肯俾發展商額外起多啲樓，但要發展商合作，佢哋都一樣要賺錢，咁即係話要用佢哋嘅地去起中產上車盤，發展商點都要賺番咁多錢，咁扣除咗建築費，政府收番嚟嘅地價就會好少，所以如果推得呢啲盤多，最傷唔係發展商而係庫房。
首置上車盤暫難寄厚望
如果政府無乜地價收而發展商就照賺錢，外界會點樣講，明白呢樣嘢，就知點解林鄭話自己學精咗，就算諗咗點搞都唔敢咁快講出嚟，所以左睇右睇，暫時都好難對首置上車盤寄以太大期望。
如果政府大起上車盤，的確係會打殘納米樓。風水佬呃你十年八年，呢樣嘢會唔會發生好快睇到端倪，過啲日子睇吓發展商入則仲起唔起納米樓就知道。陸羽仁最擔心嘅係，大家覺得樓市已經搞掂咗，就覺得唔使咁緊張搵地。上個星期發展局局長黃偉綸出席電台節目時就示警，話土地供應情況仍然緊張，公營房屋興建數字仍然落後，新發展區完工前，透過改劃210塊土地，在數字上能滿足土地供應，提供31萬個單位，但實際要看改劃是否順利，如果在城規會遭遇反對，就會影響五、六年後的供應。
高官警告改劃隨時有變數
按佢講法，210幅土地中有26幅是近期覓得，因應社會對公營房屋不足的關注，而調整到七成為公營房屋，三成是私營。不過，呢啲生米係咪煮得成熟飯，仲要睇改劃過程係咪順利。過去五年，前特首梁振英採取一個盲搶地嘅策略，好似有啲地明明有人覆核，佢都唔理地價死推出嚟拍賣，咁做雖然益咗夠膽落標嘅發展商，同時亦確保咗土地嘅供應，如果將來政府無呢個硬手推地嘅決心，遇到阻力就縮，供應隨時就會少番。
香港樓價咁貴，一早脫離咗大部份人購買力，樓價下跌早晚都係要跌，不過，如果大家寄望首置上車盤可以快啲令樓價調整，咁就可能表錯情，最實際嘅方法，仲係四周圍搵多啲地，有多啲地起多啲樓，供應多咗，唔理係咪資助房屋，都必然紓緩到樓價嘅壓力。
恒基李公子教人做KOL
恒地副主席李家傑最近接替咗恒隆主席陳啟宗檔攤，做咗一國兩制研究中心嘅雙料主席，兼埋理事會同執行委員會。新人上場點都要有新風，日前佢就大談起中心新方向時，猛講新科技發展，仲話好似佢哋呢啲大財團，都要諗吓點樣適應新時代，又話香港年輕人要搵出路，不妨諗吓做KOL。
李家傑說，自己很喜歡以老牌遮店梁蘇記為主題的電影《人間有情》，套戲講香港勝在有人情味，最後仲大團圓結局。不過，最近他和大型私募基金的負責人聊天，對話就相信這個世界是弱肉強食，適者生存。他又看到一位知名學者預告，在人工智能發展下，到了二〇三三年，將會有四成七工程會被機械人取代，這股科技造成的失業潮同樣會席捲香港。內地決定把大灣區打造成中國的矽谷，香港若然不能緊隨形勢變化，最後焗住自己做梁蘇記。
李公子講到將來咁難撈，咁青年人點算好？一條出路係做KOL。佢話，任何一件事如果肯花一萬小時去研究，人人都可以變專家，做咗專家就可以做網上意見領袖，有咗影響力仲怕搵唔到錢咩。
機械人變米芝蓮大廚
佢仲話，唔好睇大地產商好似恒基咁財力雄厚，一樣受科技衝擊，好似佢哋而家嘅商場設計，全部位置都可以做餐廳，不過，佢聽啲夥計講，而家已經有機械人煮餸，咁將來人工智能再發展，機械人個個照住米芝蓮大厨咁烹調，咁大家仲使唔使幫襯餐廳，商場到時點樣變招先？所以佢周不時都去矽谷取吓經，留意住形勢變化，仲好有興趣搵吓有無投資機會?。
李家傑對科技咁有興趣，下個月佢就會有個新玩具，是可以即時傳譯幾十種語言的谷歌耳機，他已預訂一隻，若然耳機可以翻譯俄文，他就會在到訪俄國時用。因為據他觀察，俄國現時被美國圍堵，佷有可能會對一帶一路動心，所以現在可以先去俄國多交朋友鋪路。
陸羽仁
http://www.bastillepost.com/hongkong/article/2539244-閱文集團投機性吸納
http://www.bastillepost.com/hongkong/article/2539559-香港搞政改要想的四件事
http://www.bastillepost.com/hongkong/article/2536830-點解人們愈鬧，中國愈得？
http://pop.stheadline.com/content.php?vid=66424&cat=d
http://www.bastillepost.com/hongkong/article/2534206-「世界仍是強權政治！」年青習近平講的故事
網誌分類: 經濟
20171023蟹仍未夠肥
上周四的閃跌, 令一些人以為見頂收網了, 上面好多蟹。
嗯, 世事什麼都有可能, 只是可能性大或小的差別。
的確, 經上周四一跌, 把10月上旬十個交易天的成交都變成蟹貨;
但, 這兩個星期的蟹貨, 相對於整個2017年的牛市,時間實在太短, 成交也太少。
如果真要說蟹, 倒不如說淡蟹更多更肥(由年頭一直睇淡未入市的散戶),
這些淡水肥蟹的購買力一日不消耗, 牛市一日都好難完結。
實情是上周四才一千多億的成交, 就能將指數推跌600點, 這實在沒什麼承接力--即是散戶尚未願意接貨。
在這種市況下, 大戶可以殺牛, 但很難全身而退--把貨散盡。
所以結論是, 大戶們一直把指數大成交推上來, 破關衝阻力, 接晒散戶沽出來的獲利盤, 單單這個小頂實在無法走貨。
至於內銀, 工中建都曾試穿止蝕位, 但都未有效擊穿。所以中長線繼續持貨行山,BBQ, 晒太陽, 不用理。
超短線如果不夠貼市, 又沒有膽量在周四低位買, 周五反彈也很難吃到肉。
如把持不定的話,
可定收市再度跌穿周四低位(1398:6.14)或50天線(3988:3.99; 939:6.73)時作止蝕,
收市升穿10天線(1398:6.34; 939:6.93; 3988:4.06) 就應該追了。
http://www.bastillepost.com/hongkong/article/2531079-中國模式-驚人的持續力