炒吓特朗普效應
2017/11/13 10:11:49 網誌分類: 經濟
香港炒新股炒得興起之餘，外圍都有唔少大件事發生，包括沙特阿拉伯政局大變，「中東股神」阿勒瓦利德（Al-WaleedbinTalal）王子都拉埋落水，以及美國總統特朗普同國家主席習近平會面。中東皇儲以反貪拘捕多名皇室成員，包括中東股東在內，令美股係高位遇阻。杜指周五收市報23422點，跌39點，納斯達克指數收市報6750點，升不足1點，標普500指數收市報2582點，跌2點。
美股借中東股神中招調整
沙地近年政局內弛外張，呢次皇室內鬥有跡可尋。消息傳來美股一度受壓，但震盪暫時唔算太大，中東股神持有多隻美國藍籌股份，市場關注佢被捕會否引起拋股潮。不過，美國係沙地保家，邊個上位都要睇佢枱戲，所以真正影響相信唔大，美股相信都係借意消化。由於華爾街之前牛氣沖天，特別係納斯達克指數升勢尤勁，唔排除要調整耐啲。
同沙特政變比較，特朗普訪華之行仲矚目。特朗普去到北京，搵埋外孫女唱普通話歌，大力示好下簽咗唔少合約，兩國簽署的商業合同和雙向投資協議涉及總金額超過2500億美元。對於普通人嚟講，中美猛簽合約分唔到乜好處，反而兩國就人仔匯率同其他貿易問題似乎講掂數，呢個影響仲直接。
據報道，中美雙方願意進一步加強宏觀經濟政策包括財政、貨幣和匯率政策的協調，並就各自結構性改革和全球經濟治理有關問題保持溝通與協調。雙方將共同努力推動全球經濟強勁、可持續、平衡和包容增長。中方願就增加自美商品進口、各自外資安全審查政策同美方加強溝通。雙方歡迎兩國民航當局簽署《適航實施程序》。
點名話會幫中金攞牌
中方按照自己擴大開放的時間表和路線圖，將大幅度放寬金融業，包括銀行業、證券基金業和保險業的市場准入，並逐步適當降低汽車關稅。在2018年6月前在自貿試驗區範圍內開展放開專用車和新能源汽車外資股比限制試點工作。對乾玉米酒糟在進口環節和國內環節實施相同的增值稅政策，恢復免徵進口環節增值稅。
中方要求美方切實放寬對華高技術產品出口管制、履行中國入世議定書第15條義務、公平對待中國企業赴美投資、推動中金公司獨立在美申請相關金融業務牌照進程、慎用貿易救濟措施。雙方將就中美經濟合作一年計劃或中長期合作規劃保持溝通。
內險股上周已開車
從美國總統特朗普係行程後段話中美貿易好唔平衡，但呢樣唔關中國事，而係前任政府有問題，睇到佢已經攞到着數。中美兩國關係改善，就算北京要俾啲着數特朗普，都除笨有精。美國總統去得大陸訪問，事前梗係做足工夫，而家按劇本演出，對內地投資氣氛都有啲幫助。上個星期見到內險股好似平保（2318）、太保（966）已經開車創咗新高，反映對內地市場氣氛樂觀咗。
內地市況改善，最大路係買吓指數關連的指數基金好似2828，而係呢次元首會見提到的中金公司（3908）翌日升咗唔多，收市報17.14元，上揚2%。
中金（3908）早前宣佈引入騰訊（700）為戰略投資者，騰訊將認購中金2.07億股H股新股，佔擴大後總股本4.95%，成中金第三大股東。當時交易每股作價13.8元，消息公佈後炒咗一輪就靜番。未來中美金融合作增加，雖然係咪真係搵到錢無人知，但從概念上講就有想像空間。以中金仲未創新高計，買嚟或者有機會博吓短炒。
另外全球最大電競品牌雷蛇（1337）今日在主板掛牌，暗盤收報4.65元，較招股價3.88元，高出0.77元或19.85%。雷蛇以每股3.88元定價，為招股價範圍2.93元至4元的近上限範圍，公司淨籌39.31億元，股份每手1000股，一手的中籤比率50%，申請25手可穩獲1手。公開發售獲290.24倍超額認購，凍結資金1239億元，並已啟動回撥機制，公開發售部份佔比回撥至50%（即5.318億股）。國際發售獲非常大幅超額認購。
識歎大閘蟹口福勝過特朗普
特朗普今次訪華，號稱是「國事訪問+」的級數，但國宴菜單曝光，就無乜特別，唯一唔同就係上次招待奧巴馬，用咗中西合璧，呢次就全部係中菜。今次請特朗普的國宴有七味菜，菜式都係宮保雞丁、水煮東星斑、椰香雞豆花、番茄牛肉，奶汁焗海鮮、上湯鮮蔬、加埋小碟、水果雪糕，飲吓中國紅酒咁。相比之下，今年五月份係杭州舉行的金磚會議，東道主特別安排了杭州古菜，仲有特色。
炮製金磚國宴名菜
金磚會議其中有一道宋朝食譜提及的膏蟹釀香橙，據講係當代名菜。鮮橙當時作為貢品，供皇帝享用，宋朝新橙矜貴。有中環茶友最近食私房菜，都試過以這個菜意炮製，做法是用大個靚橙，連鮮果汁肉再加蟹粉。茶友試過話味道唔錯。
今年大閘蟹遲來，而且價錢唔平，不過，最近股票市道唔錯，賺到錢可以諗吓咁食大閘蟹，食得招積之餘，仲隨時好口福過美國總統。
陸羽仁
http://www.bastillepost.com/hongkong/article/2596193-全世界都聽中國的聲音-香港不要例外
http://www.bastillepost.com/hongkong/article/2593951-二線大學生考入投資銀行的故事
http://www.bastillepost.com/hongkong/article/2590802-香港為什麼不搶這個生意-因為根本不知道
http://www.bastillepost.com/hongkong/article/2587735-小朋友，-the-world-is-tough
http://www.bastillepost.com/hongkong/article/2584148-「蘇州過後無艇搭」的事情正在發生了
http://pop.stheadline.com/section.php?cat=ppl