特朗普請股民食驚風散
2018/04/09 11:58:58 網誌分類: 經濟
上周臨近周末，隨著大陸出硬招向美國還擊，恒指在清明假前大插六百點，假期間美國總統特朗普未有回應，大家以為有偈傾，港股預託證券一度反彈九百點，到港股上周五復市前，特朗普又出口術，話會考慮向一千億美元的中國貨徵稅，港股氣氛又受影響，恒指雖然最多曾升462點，高見29980；午後升幅已經放緩，恒指收造29844，升326點；國企指數收報11967，漲110點，成交跌到只有986億元，可見觀望氣氛幾濃厚。全周三個交易日，恒指累積下跌248點；國指累積下滑30點。不過，驚嚇場面跟住先喺華爾街上演。
儲局未考慮因貿戰延加息
中美係貿易戰場輪流加注「晒冷」，港美股民輪住食驚風散。上周五美股杜指成份股大跌，杜指一度暴跌750點，收報23,932點，跌572點；納斯達克指數收報6,915點，跌161點；標準普爾500指數收報2,604點，跌58點。成份股中賣唔少推土機畀大陸的卡特彼勒跌3.7%，英特爾跌3.16%，因為貿戰受壓的波音再跌3.06%，3M跌2.94%，耐克跌2.93%，維薩卡跌2.88%，通用電氣跌2.76%，陶氏杜邦跌2.64%。呢排科技股都唔係咁掂，facebook跌1.34%；Apple跌2.6%；Google母公司Alphabet跌2.2%：微軟跌2.3%；Netflix跌1.74%。
市場避險情緒上升，現貨金報1332.93美元，升0.01%；COMEX黃金期貨報1337.3元，升0.66%。美國10年期國債孳息率報2.775，跌2%。有分析話如果美國貿易戰升級，聯儲局可能會拖慢加息緩和風險。聯儲局主席鮑威爾似乎就覺得呢個講法有啲言之尚早。佢坦言聯儲局有討論過中美貿易戰，認為關稅效應對近期展望未有太大影響，因目前並不了解關稅生效影響有多大，同時關稅的時間點亦未肯定，因此難以定論。
另一方面，鮑威爾重申美國經濟逐步增長，維持穩定加息屬必須，但他亦坦言生產力低迷及勞動力參與率低為經濟帶來挑戰，他預計通脹繼續接近美聯儲2%的目標，即使工資增長率維持低企，失業率仍有機會跌至4%以下。佢認為加息過慢，有機會導致貨幣政策必須突然收緊，有機會危及經濟發展，但加息太快卻壓抑通脹率，因此聯儲局在選擇加息路徑時候，會平衡兩種風險，呢個講法被理解為暗撐加息。
美股大跌後，中方即刻出來話呢個係對美國打貿易戰的回應。有中環茶友話，貿易戰影響心理大於實質，但如果衝擊擴散到去金融市場，咁影響就會明顯同強烈好多，內地官員的態度已係間接作出警告。如果大陸係市場拋售美債美股，殺傷大仲大過針對個別貨品徵稅。美國政府有護盤基金，在涉及國家安全下會入市保持穩定。美股而家跌幅仲唔係咁大，若然特朗普真係諗住繼續同大陸鍊落去，咁可能佢都要研究吓幾時要出動金融保護隊護盤，以防戰況擴大被人係股市債市殺佢一個措手不及。
營商去得盡玩到破產
特朗普對中國貿易打響第一槍，中方態度是不想打、但不怕打，提出六百億徵稅反制就係不怕打的具體表現。市場普遍睇法係中國回應理性，有路可捉，關鍵係特朗普想玩到幾時，呢點就最難準確預測。特朗普周末接連請股民食驚散，聲稱要再研究向一千億中國貨徵稅，再加注同北京鬥大，跟住又話世貿組織偏幫中國。股市對佢呢個講法作出反應，實際都未算係好激，相信大家仲係睇緊佢係咪真係會具體落實。中美打咗兩個回合，對實體經濟仲未有真正大影響，但已有美國商界出來說項，摩根大通國際業務主席弗蘭克爾認為，中美之間爆發貿易戰，將對全球經濟構成最大威脅。弗蘭克爾接受CNBC訪問時仲作出提醒，話而家其實仲係小規模衝突，不算是貿易戰。但大家應該牢記1931年的災難，為保護美國就業，換來大蕭條的催化劑，所以應該不惜一切代價避免它。佢亦認為，中國人非常理性，但任何談判必須基於尊重，「不要開槍，只是對話」。
銀行家基本上係自由貿易的受益者，摩根大通作為美國最大銀行，當然唔想同中國開仗，只係佢呢個睇法，能唔能打動特朗普呢？好多人都講過，特朗普係生意人，到最後都係想做「刁」，但要留意係佢性格。有曾經同佢做過生意的港商，大罵佢面厚心黑，談判必定鍊到最盡，有機會佢仲會「晒人冷」。正因為去得咁盡，所以佢試過唔止一次要玩破產，如果套用佢做生意手法去貿易談判，咁係忍受痛苦的能力，肯定高過大銀行家好多，所以弗蘭克爾的說法，都幾難可以打動到佢。
成為股民近日生活一部份
特朗普加大注碼，中國必然奉陪，不過，特朗普的口頭加注，要落實仲有好多嘢要做，中方亦無必要搶閘作出反擊，正因為呢個原因，所以股市反應相對唔係跌得咁多。而家中美格局係無論政治同經濟都齊齊開波，好似北韓同美國談判，中國搶閘安排金正恩訪京，大有從美國手上搶回朝核問題話語權的味道。本來特朗普同肥仔恩有機會見面，成為佢大出風頭的政治騷，大陸突然跳出來撬牆腳，相信都令特朗普幾唔高興，咁亦可能令佢想係貿易問題上同中國過多兩招，所以呢舖話事啤都唔會咁快玩完。不過，股市唔會因為有貿易戰就唔開，呢啲長命牌局初頭大家好緊張，但慢慢大家都會學習適應，成為股民呢輪生命中的一部份。
細細粒容易食 風口上蓋爭崩頭
最近油塘站的通風口上蓋招標，入標財團有多達三十幾個，可謂爭崩頭。
呢次招標反應咁熱烈，但其實項目唔係鐵路上蓋，只係沿線通風口上蓋用地申請改變用途，加建住宅。不過因為發展面積只有三十多萬呎，加上補地價只需四千幾元一平方呎，細細粒容易食，所以吸引不少中小型發展商參與。
有參與投標人士話，呢塊地補價咁平，除咗佢唔係上蓋，亦因為負責財團要負責做埋出口氣改建。呢個係彩虹站清水灣一號之後，港鐵另一個單幢樓項目，對財力唔係咁夠又想做地產的財團，真係機會難得，所以會咁多人入標。
呢位仁兄笑言，做地產乃係鬥錢多的生意。錢愈多機會愈多，好似恒基地產李四叔買海航集團兩塊啟德靚地，就勝在財力雄厚，夠膽快手落注。傳聞中的故事，係海航早已跟另一個大財團傾有關土地的未來安排，且談得甚為深入。這個大財團的老闆一向以數口很精見稱，向海航開出的是一個借錢方案，但海航仔細睇完條文，擔心最後借錢都好可能畀人收地，於是轉而同恒基接頭，恒基三下五落就跟海航達成協議，靚地手到拿來。
陸羽仁
回應 (0)
我要發表