弱美元 焗炒格
2018/01/29 12:16:34 網誌分類: 經濟
游資賣債四處流竄
港股升唔停，美股同樣不甘示弱，上周杜瓊斯指數收報26616點，周五單日升咗223點；英特爾股價標青，帶動納斯達克指數收報7505點，升94點；標準普爾500指數收報2872點，升33點。
半導體龍頭英特爾隔晚公佈2017年業績，總收入達628億增長6%，其中數據中心業務收入大增21%，推動股價急升10.55%，收報50.08元。去年市場大炒晶片相關股，O依家業績對辦，成個科網股板塊都生晒。
美股好，但美元散咗，美匯指數報89.039，跌0.33%，總結上周美匯指數下跌1.6%，更一度觸及三年低位88.44。歐羅兌美元報1.2422，美元兌日圓報108.516，美元兌人民幣報6.325，英鎊兌美元報1.4154。
周日同中環銀行家飲茶，佢話美國政府減稅，要埋單就即係美國財赤要增加，咁美元點會唔弱，美元弱推動資金由債轉股，游資四出炒作，所以見到美國10年期國債孳息率報2.66，升1.48%；美國30年期國債孳息率報2.911，升1.06%；美國2年期國債孳息率報2.12，升1.74%；美國5年期國債孳息率報2.47，升2.16%。
呢輪美元下跌，皆因美國財長努欽話弱美元無問題，觸發全面跌勢，呢兩日美國總統特朗普出嚟解話，話係外界誤解，努欽亦重申有人斷章取義。中環銀行家話，究竟幼欽係有心定無意唔重要，重要係美國政府根本樂見弱美元，特朗普同努欽出來唱雙簧，俾人感覺係打籠通。過去美國政府講親強美元政策，都係導致美元走弱，皆因市場解讀係如果美元強，咁何必官員以至總統出嚟撐？
好似奧巴馬落任前，美國財政改善，美元呈強，奧馬巴邊有出嚟講過匯價，官員出來撐美元，變相等如叫人聚焦美元匯價，係美國政府因為赤字搞到停轉下，咁美元點會強呢？華府咁樣夜行人唱口哨，係咪等同變相唱淡匯價先？
特朗普上台，好多人話會有利銀行界。睇番財長唱淡係美元下跌的近因，遠因其實係特朗普上場，繼續奉行財赤同弱美元政策，同埋放水俾華爾街搵食。銀行家又話，美元轉弱，游資就會四出炒作，好以紐約原油上周又升上報66.24元。呢啲係焗炒格，總之炒到爆為止。
到金融界搵食時刻
弱美元有利炒風，有利金融界搵食。1月份大市除咗股王騰訊外，基本上係金融股威晒，當中內銀股升幅更加靚仔。唔少散戶買咗內銀股，係去年升市無乜點得益，但踏入新年頭就轉晒運。全球經濟升溫有利銀行股，無論國際金融股好似滙控（0005），抑或係內銀股都走勢靚仔，買銀行股捱價捱咗幾年的銀行股粉絲，如今真係守得雲開見月明。
銀行股轉勢，死守散戶勝利在望，當中多得呢個板塊的股份大部份過去低潮期都有排息。陸羽仁過去經常講，內銀股派息高，死坐個心都定啲。過去幾年，外資基本上唔睇好內地經濟，唱空內地銀行係他們普遍觀點，直至最近先明顯轉調。摩根士丹利上星期就出報告唱好內銀股，認為隨著中央落實在金融市場去槓桿的政策，利率將會處於高水平，並維持一段較長時間，銀行淨息差可望逐步擴闊，對相關股份有利。對四大國有銀行的評級則仍然是「增持」，目標價全線提升，工行目標價調高至9.2元、建行調高至11.9元、中行是6.4元，至於農行（1288）則為6.5元。有買咗銀行股死坐的中環茶友話，內銀股O依家升咗唔少，但計起市盈率仲唔係貴，所以佢會維持唔郁策略，等大浪遲啲沖佢上岸。
銀行股有升有息利死揸
茶友O依家持有的銀行股有升有息，除咗內銀股，佢仲買咗滙豐。佢話滙豐雖然O依家仲未創出歷史新高，但如果計埋收息就已經返到家鄉。過去滙控係最差日子，都維持有5%息率，佢買咗差不多10年，收息已差不多收回股價一半，加埋低價供股，就算係高價入貨，O依家都已經有賺。
茶友的買股策略其實唔算高明，亦無乜難度，佢最大優勢係持貨能力強，有閑錢可以守落去，用呢種策略最重要係本錢夠，唔使被迫係低位沽貨。O依家港股創新高，就算用笨笨地的方法去買股，都好易變咗有賺，呢個亦都係點解股票平的時候無人買，貴的時候反而多人買，到愈貴就愈多人話自己想長線投資買股的原因。其實，股票投資最穩陣方法係用平均入市，定期定額買股，咁股價低時買多啲，股價平時買少啲，咁樣買股法加理揀啲有息收穩陣股份，贏錢機會肯定大過炒炒吓好多。如果早前已經用呢個方法買咗股，咁O依家就真係不妨繼續沖吓浪。
新地賣樓啖啖肉 雷爺買地算盤密
著名音樂劇《CATS》來港演出，煤氣公司上星期整咗個酒會，請咗好多商界夥伴出席，新地執行董事雷霆都帶同太太一齊出席。
新地去年賣樓大豐收，新盤幾乎長開不斷，每年安裝煤氣單位唔少。有出席中環茶友見到雷爺，大表佩服之餘，雷爺謙稱要維持呢個陣勢都唔容易，皆因而家搵地唔易。最近，市場盛傳新地同係啟德揸住最多哋的海航行得好埋，唔通有大計醞釀？
有地產界笑言，雷爺出名精打細算，一向落價買地保守，開盤訂價進取，所以新地賣樓啖啖肉係有原因者。
呢次煤氣派飛請睇《CATS》，此及經典長壽節目，係世界各地都曾經演出。欣賞這套劇主要係睇演員歌舞，劇中借助不同的貓角色如明星登場，各有魅力。像白貓演出獨舞一段，姿態妙曼，若論角色認人喜歡，火車貓應得分不少，還有舞技精湛、配襯閃爍貓衣的魔術貓足以令人目眩。由於不同的貓由不同演員演繹，會有不同味道，在倫敦看過者，再看又有另一番喜好。
陸羽仁
回應 (0)
我要發表