股民係善忘的
2018/01/22 12:19:13 網誌分類: 經濟
美股新高創不停
美股上周繼續高收，杜指收報26071點，升53點或0.21%；標準普爾500指數收報2810點，升12點或0.44%；納斯達克綜合指數收報7336點，升40點或0.55%。總結本周，道指與納指均累升1%，標普500指數升0.9%。港股美國預託證券繼續創攀升。
全球股市新年頭牛味濃，主要係炒經濟升溫。金管局總裁陳德霖上星期就話，自己出席國際會議，提到全球復甦，即刻俾人糾正話O依家全球係增長緊，可見市場樂觀情況。有做財務的中環茶友話，美國長債息率呢排持續向上，若然美國今年真係再加三次，咁長債息升破3厘真係話咁易。債市回落，可以解釋係市場避險情緒下降，資金由債券流入股市，造成債息上升，通常債跌股升，市況就會熾烈，直至有一日大家忽然擔心經濟過熱，個市就突然掉頭都唔奇。
香港情況都一樣，O依家樓旺股旺，加埋最新失業率跌到去2.9%，呢個係亞洲金融風暴後最低水平，市況之旺真係想唱淡都無人信。
惠理派特息有洗底味
港股創出歷史新高，但很多股份仍然與高位有很高距離，最明顯是金融板塊，當中最特別是證券及基金股。大部份的基金股表現都遠遠落後，好似公佈業績會狂升的惠理（806），股價就與2015年時的大時代相差接近70%。
惠理在三年前的大升浪，是表現最好股份之一，當時股價跟住A股同步攀升，最高曾升穿17元水平。上周，中港股市向好，惠理仍然收低於10元，頗有不復當年勇之態。
惠理股價大落後，有證券及基金股的板塊因素，同時也有公司本身因素。在上次升浪，集團高層曾公然出來唱好A股前景，令市場聯想起業績與股市掛鈎的惠理明年會更好。正當投資者追捧得高興之際，主要股東就在高位配股，股價自此就由高位回落，相信不少股民仍然高位被綁。從技術上來說，呢啲公司可以話係炒壞咗，要有排醫先可以有表現。
惠理高位散咗貨，股價撻直，到了去年第三季先叫做好番，首先係公司透露有人向大股東洽購，消息刺激下，股價由7元左右水平抽上。去到今年初，公司宣佈洽購無著落，股價隨之坐一坐，跟住公司又披露，預期去年度純利按年大幅增加13.55倍，至20億元，增長主要由於表現費由2016年的1080萬元，增加至去年度約25億元。集團建議宣派特別股息86仙，慷慨派息有改善股民印象同洗底味道。喺業績大有改善下，股價再度回升。
惠理早前獲財團洽購，相信是看中公司的基金管理業務有發展空間。當時相信洽購價會較市價有相當溢價，洽購未成事，股價就要跟基本盈利走。按公司盈利20億元，上周收市價9.95億元，等同市值180億元計，市盈率約為9倍左右。呢個市盈率計落唔貴，不過，表現費同投資市場氣候有關，呢類生意波動性比較強，估值唔會好高。
高位唱好沽股留陰影
不過，考慮到之前幾年佢盈利最高只係去過8億幾，但股價可以去到17元，現今股價唔夠10元，多少有點反映股民俾佢過去嚇親同埋有啲懲罰主要股東高位沽貨的味道。有中環茶友就笑言，股民從來都係善忘的，O依家大家對有人唱好後高位沽股的陰影未散，但如果個市繼續旺，股價繼續炒上，大家可能又會唔記得。從呢個角度講，做個快啲善忘的股民，可能比做遲啲先唔記得的股民好喎。
茶友的講法，的確講中唔少股民的心態，呢個亦反映咗喺呢類金融股表現身上。O依家好多券商股或者投行股，同3年前高位明顯有差距，睇番O依家指數同成交，比起當時更加壯旺，以盈利能力睇，呢類股份基本因素應該好過從前，股價未追上，反映市場唔肯畀番以前的估值，咁即係話大家仲係比較審慎。到呢啲股份都大力炒上，咁個市先至真係開始升溫要小心。
新股敲鑼要走鬼 煮酒鋸鮑論炒股
呢排新股上市旺到極，做生意搞到公司上市，諗住搵至愛親朋去敲鑼，結果人數有限兼要走鬼。做廚做到上市的「幟哥」黃永幟，就索性喺自己主場龍皇酒樓大搞慶功宴。
今次幟哥上市，主家席見到有證券界名人郭思治，公眾認識幟哥，是做電視飲食節目。記得最初他是在亞視與黃麗梅一齊亮相，當時聽他介紹各種菜系烹調，已覺得真材實料，留下深刻印象，還記得他在節目披露，現時風行的甜品楊枝甘露，是由他父親所創。不久後他就獲大台垂青，獲邀主持《為食總司令》，人氣再上一層樓。
龍皇能夠上市，幟哥坦言之前煮定鮑魚等掛牌，夢想成真令他興奮得難以入眠。當晚鮑魚撈起，人人開顏。有中環茶友話，當日佢一邊鋸鮑魚，一邊交流炒股心得，座中有人話睇好林順潮醫生隻希瑪（3309），話佢做7萬銀生意賺2萬，利錢認真深。茶友心諗隻股一掛牌已經升咗60%，無理由仲去高追，點知隔日隻鮑魚都仲未消化，希瑪股價一開市已經爆上咗！
陸羽仁
回應 (0)
我要發表