平保有個超級推銷員
2017/11/20 15:33:54 網誌分類: 經濟
外圍股市上周續升，港股成交雖然維持過千億元，但氣氛顯然弱咗，主要係內地A股係穿破3400點之後，未能破關而上。大陸最近發表的經濟數據轉弱，令人擔心十九大前一輪催谷，之後會出現回調。市場呢個擔心可以理解，今年上半年內地經濟表現比預計嘅強，有啲出乎意料，所以人仔匯價都被佢帶起咗。今年香港頭三季增長數字接近年4%，以成熟經濟嚟講算係好好，其中一個火車頭就係出口好轉，呢樣同大陸表現比估計好有關。
資金歸邊大股愈升愈有
經過一輪發力後，內地經濟慢番啲唔出奇，正如好似A股破關後要打底，但中線嚟講，內地係新興產業嘅發展勢頭實在係好勁。好似而家大陸講緊一帶一路，中資跟住就到，最近同做生意嘅朋友講起，佢就話阿里而家已經開始係東南亞國家落戶，準備一展拳腳，所以睇長啲，大陸好有機會成為區內嘅經濟引擎。
講起阿里，最近馬雲、馬化騰同馬明哲呢三馬嘅公司輪流發威。上星期騰訊（700）發威升破400元關口之餘，由馬明哲打骰嘅平保（2318）都接連破頂。有中環茶友係三馬聯手嘅眾安（6060）上市前買咗啲平保，當時都係60元多啲，o依家已經升咗25%，回報相當和味。資金扶旺不扶衰，恒指雖然升到10年高位，但主要係騰訊、平保呢啲大股高處未算高，其他好多股份仲係大落後。好似同樣做保險兼係國企龍頭嘅國壽（2628），歷史高位係2007年港股大時代嘅51.4元，上周收市價26.85元只係啱啱過咗一半多啲。今年初國壽股價開始時係20元，至今升咗30%，睇落算係唔錯。同期嘅平保唔夠40元，到上周收78.85元，幾乎翻咗1倍。如果睇番2007年嘅高位55元，今年已經打破，而家更已經過咗好多。
巨無霸好難秤身家
呢輪平保股價咁勁，除了眾安上市的因素，騰訊分拆都有影響，因為騰訊係咁拆資產出來，搞到股價爆上，外界開始又炒作平保分拆網貸公司陸金所，有估計呢間公司去年身價係2000億元人民幣，今年價值再漲，估計平保持有的44%陸金所身價有1400億元人仔。不過，平保單計H股市值已經有5800億元，連同A股市值接近2萬億元，從基本因素睇，一間陸金所嘅影響唔止於咁大。平保有壽險、平安銀行、平安證券、平安信託、平安資管，茶友話，好似呢啲巨無霸，因為好難秤清楚佢嘅身家，業務又複雜，加上市值大，若然無乜消息，形成唔到大量資金嘅流向，佢嘅股價好容易就變咗大笨象，眾安同陸金所上市，就俾到佢需要嘅市場關注，令股價有條件彈高。
平保股價靠馬明哲吹起
茶友仲笑言，阿里同平保都有個其他公司無嘅條件，就係有個好嘅推銷員。馬雲嘅口才好多人見識過，馬明哲講嘢嘅說服力都唔差。最近平保股價發威，有人見到佢問買唔買得過，佢嘅回應係唔會叫人買股票嘅，但會話俾佢聽未來公司有乜計，跟住就吹出不同的發展策略，話要將平保打造成一間金融科技公司。上個星期，國際金融科技投資公司H2 Ventures與畢馬威最新報告顯示，今年位列全球金融科技百強公司的中國企業共九間，當中螞蟻金服、眾安保險分排一、二名，馬明哲吹話佢哋變金融科技公司，無人會駁到佢㗎。
茶友話，睇返平保過去五年業績拾級而上，所以股價基本上係長期向好，至於呢排升得咁勁，可能就要歸功於公司有個超級推銷員。水能載舟、亦能覆舟，同樣道理，好似平保呢啲巨無霸，估值既然係一種藝術，受資金流嘅影響有時多過公司生意嘅表現，坐平保呢間快車就要留意埋推銷員嘅表現同佢對投資市場嘅叫座力會唔會同幾時消退啦。
今個聖誕 貴價錶市道回升
潮流興講科技，好似唔少中產都鍾意載吓智能手錶。最近遇到喜運佳集團主席蔡加讚（KARSON），講起智能手錶對行業嘅衝擊，佢就好淡定咁話，兩者係唔同市場，戴靚表係講工藝。佢仲話，佢自己嘅表行今年生意有好轉，有啲牌子仲被客人追貨㖭。
KARSON話，今年錶市回暖，而且買家好多都自用或收藏，所以市道都幾健康。過去幾年喜運佳開咗幾間勞力士專門店，佢話，過去內地人對勞力士認知度不及香港人，但近年接受程度明顯增加。今年品牌銷售相當理想。勞力士每年會按過去的銷售情況分配數量，過去港澳奢侈品賣少咗，今年市道好轉，頭痛嘅問題就係唔夠貨，買家看中個別受歡迎的型號，可能就要等候。隨著今年銷情增加，他估計未來品牌有望增加香港地區的配貨量。
未受智能手錶威脅
呢個聖誕貴錶行情好番，有行尊話，智能手錶來勢洶洶，但睇真暫時威脅有限，皆因佢介面仲細過手機，用嚟接收訊息好唔方便。佢仲笑言，講到藝術同工藝，唔可以同科技產品比較，如果唔係，達文西幅耶穌像就唔會值三十幾億銀啦。
陸羽仁
回應 (0)
我要發表