縮表拖遲利資產股
2019/01/28 04:13:23 網誌分類: 經濟
月底討論停抽水
聯儲局將於1月29至30日舉行議息會議，今次開會外界估計不會加息，但不代表會議無料到。《華爾街日報》透露，官員屆時會集中討論如何處理資產負債表，有可能決定是否把資產負債表維持在遠較金融海嘯前高的水平，意味提前結束縮表，停止在市場抽回資金。聯儲局主席鮑威爾會否在這次會議後，向傳媒交代最新的縮表時間，則視乎討論進度。
儲局是在2017年10月開始縮表，鮑威爾曾說，預計三至四年才完成。不過，自去年10月美股大插一輪，總統同華爾街大鱷聯手炮轟央行機械式加息後，收水行動明顯被打窒，鴿派節節搶攻。
喺消息帶動下，杜瓊斯工業指數一度急升307點，收市升升183點，報24737點；標準普爾500指數升22點，收報2664點；納斯達克指數升91點，收報7164點。總結一周美股表現，三大指數個別發展，杜指累升0.1%，納指升0.1%，兩大指數都是連續五周上升，標普500指數則累跌近0.3%。美國唔再扭緊水喉，消息令美元受壓，黃金則升超過1%。
喺放假期間，特朗普同國會達成短期方案，終止政府停擺幾個星期，稍為紓緩市場對白宮與議會不和的衝擊。外圍形勢偏穩，港股上周氣氛不俗，一舉上破27500關，最後U盤又進一步嘜高，並以全日高位收市，報27569點，升448點，創逾三個月半高位，全周累彈478點，而且是連續第四周上揚。
今個星期副總理劉鶴訪美，繼續推動中美喺三月談判限期前達成貿易協議。美國財長努欽早前表示，中美兩國貿易談判有很大進展，匯價議題依然是討論範疇之一，因為它是重要議題。中美兩國有90日進行談判，美方表露出願意達成協議的姿態，相信會加大力度令中國讓步。由於鷹派喺談判桌上代表佔多數，會前美方一時放好消息、一時放硬消息，樂觀地估就算今次無法達成協議，相信都會努力再推進，談判破裂機會較低。
本地大發展商圍爐取暖
華爾街大鱷打殘聯儲局鷹派，扭轉全球資金流向，對資產股明顯有利。自去年12月份起，本地地產股走勢開始轉強，由於美國加息步伐放緩，兼且覓地小組發表報告，對短期增加供應的應對辦法差唔多係零，咁對地產股自然係有利消息，所以龍頭地產股好似新地（016）同恒地（012）持續反彈。上個星期，啟德再誕生百億地王，新地以112.6億元奪得海景地皮，每方呎地價高達17360元。今次新地擊敗多個發展商組成的財團，預計落成後每方呎售價逾三萬元。
啟德係市區最大的土地供應區域，亦係兵家必爭之地，三年前海航高價連投四塊區內靚地，出價1.5萬元左右。當時新地主席郭炳聯以「癲價」形容，市場有消息指，新地其實都好鍾意區內發展，故此以高價搶地，豈料被海航以更高價截胡，故此認為對手實在太癲。
覓地報告助長壟斷
從呢兩年新地不斷喺區內買地，而且出價唔低於海航，反映集團對區內前景看好。另一方面，市場似乎都認同新地策略，投地後股價無因為出高價而回落，上周五升上129元，單日急升2%。
地產商自從覓地小組公佈報告後，買地意向同出價都反映興趣似乎更加濃厚，陸羽仁同有喺中港兩地起樓嘅發展商談起，他慨歎現時政府公開推地有少無多，要買地發展比幾年前仲難，如果手頭無地，根本無得入場。幾個本地大發展商圍爐取暖，其他人根本好難逼入去。
覓地小組來勢洶洶，外界本來寄予厚望，點知出嚟重點係填海，連公私營合作都無料到，其他說收高球地、搞棕地更係得啖笑。大發展商一早知道呢類民粹玩意無料到，睇完報告更淡定。
佢哋現時根本無興趣搞甚麼複雜的公私營計劃，總之有錢就買官地，買到乾晒控制貨源，等政府無地嚟傾先吊高來賣。覓地報告搞咗成年，實際上係間接助長大地產商嘅集體壟斷，所以地產股價喺12月就見底回升。
全球央行現時都怕了大鱷，對資產價格有利。內地為咗防止經濟下行，逐漸加大放水力度。內房股上周五開始炒落後。碧桂園（2007）單日收升5.5%，報10.28元，為最強勢藍籌股；萬科（2202）升5.5%，報29.8元；恒大（3333）收升4.6%，報23.9元；新城發展（1030）收升4%，報6.46元，估計未來資產股仲會吸引資金流入。
煤氣股價爭氣 陳董請食雞批
中華煤氣（003）常務董事陳永堅近日心情好靚！原來無他，皆因煤氣股價屢創歷史新高，搞到佢要頻頻請食小店新鳳凰嘅靚雞批慶祝。
聽陳董講，今年港股首個交易開局大跌七百點，當日煤氣股價大升！陳董笑住話，煤氣有避險作用，逆市上升嘅情況不時發生，當日股價升至歷史新高，即係理論上所有股東都有份贏錢，而且市值仲超過2500億！
見煤氣股價咁好成績，陳永堅知道鰂魚涌有一間好出名嘅雞批店，決定請一眾同事食雞批慶祝，但因為公司有成2000名員工，雞批店應接不暇，所以最後改為請同事食蛋撻王。陳董講起呢件開心事，仲話聽者有份，再請食靚批，而且即日送到，足見佢嘅辦事效率好高。
食正內地煤轉氣大氣候
煤氣股價咁「爭氣」，除咗香港業務好，同樣因為公司喺內地一早大力發展，食正內地煤轉氣嘅大氣候。早前佢接受《英文虎報》訪問，就話公司係綠色公司，順應環保趨勢，相信商機無限。有中環茶友睇完訪問入貨，就食正呢個升浪，就算唔識陳董，都一樣賺到錢買雞批食。
陸羽仁
回應 (0)
我要發表