查小欣 - 去廟街喇喂！｜查乜料

活化了的廟街，燈火通明，張燈結彩，不再沉寂，人頭湧湧，熱鬧似花市。旅發局免費為檔主搭建攤檔，設計盡顯每個攤檔售賣食物的特色，琳琅滿目，提供足夠電力，檔主無租金壓力，配套又足夠，可專心做生意，笑逐顏開。去廟街掃美食當晚，竟巧遇薛家燕拍特輯，引來圍觀，特輯出街後，廟街必旺上加旺。

尹光好多年前創作的《廟街》已唱好廟街：「嗱香港廟街好風光，老友記全世界得呢一處」，一條街集廟宇、睇相算命、平民夜總會、美食、當舖、涼茶舖、日用品、電器、手袋服飾，的確少有。廟街爆紅，光B又爆紅，光B會否在1月1號叱咤頒獎禮上唱《廟街》贈興？

去廟街，最好在榕樹頭出發，先欣賞每晚五點開始在地上和牆身不同圖案的投影，沿途記得在突出廟街特色的霓虹燈裝置打卡：當舖招牌、福字、涼茶舖招牌、發字、魚旦串、麻將舖等，忙住食又忙住影相，眼手口齊發。

朋友紛紛吃我形容的「廟街自助餐」，沒想過在廟街可以用三十幾蚊食到手掌般大的烤生蠔，encore又encore，仲有辣辣小龍蝦和田螺。牛雜和咖喱魚旦與別不同。煎釀三寶，即叫即炸，香脆加碼，記得食炸釀豆腐，鬆軟脆。太受歡迎方太砵仔糕，好多紅豆，糕底軟糯。尼泊爾和印度小食有特色，識多一種飲食文化。和牛串燒，肉香撲鼻。土耳其咖啡同Kebabs為當晚主食。仲有好多小食未試，下星期再去。

查小欣