特首我撐孫明揚:HK has no time for Trainees
官場真是匪夷所思,胡亂發出垃圾宣言的唐英年,至今日還有政棍夠膽公開出來撐唐。
老實講,當唐英年在電視熒幕前以Completely Rubbish回應新聞界,基本上已把自己的Incompetence表露無遺。早前維基解密爆料,就話鄭大班與曾蔭權秘密商議,指唐英年Incompetent,所以給他做政務司最好,因為他Incompetent,下層官員就會傾向向曾蔭權直接匯報工作,不會先向政務司匯報,從而對曾管治有利。Incompetent這詞可以有好多種譯法,偏偏傳媒選擇了「無能」二字為該詞的翻譯,我認為可以視為新聞界對唐英年無形的反感。
世事無巧合,新聞工作者是媒體把關人,他們每日篩選無數新聞,如果唐不惹他們反感,遇有關於唐的負面新聞,新聞界或許會自動手下留情,例如維基解密爆十單料,佢地可以避用唐無能這單為例子,又或者把Incompetent譯作不勝任,減弱該詞之負面意味。我認為該篇新聞,是新聞界有意借維基解謎向唐英年公開報復。「垃圾」與「無能」,不是很匹配的對偶詞嗎?
五六年前,迪士尼開幕後,不知大家還記不記得,負面新聞困擾了迪士尼接近兩年時間,一時話迪士尼超支,一時話迪士尼虧損,一時話有秘密入口唔駛錢入場,一時話迪士尼刻薄演藝人員,一時話香港迪士尼面積太小,又話上海迪士尼將威脅香港迪士尼。
我只可以告訴大家,當初迪士尼開幕,不知聘用了甚麼白痴公關,該等公關把迪士尼當寶,在新聞界面前吊高賣。當年我還在兒童雜誌工作,照理我們應該獲得採訪招待才是,結果是要爭崩頭,先可以做到採訪。據知,該等公關將新聞界分門別類,給與差別待遇,有報章可以試住酒店,有些則不能,我認為他們因此得罪了某些傳媒,結果不得好死。
兩年後,香港迪士尼受夠了,對傳媒態度180度轉變,我們去採訪,也變得會識得派人欣勤招待,起碼紀念品級數提升不少,也會主動提供靚相,跟我們合作。
意氣風發是公眾人物和大機構死症,當年葉劉和李國章,就是典型例子。葉劉今天變得很會做人,也全靠當年的七一50萬人大遊行。唐英年公開高調教訓八十後,雖然道理係有,但亦有過份意氣風發,得些好處不饒人之嫌。政客講說話唔睇環境,唔考慮會唔會引爆深層次矛盾,完全忘記溫總要求政府解決香港社會深層次矛盾,仲調轉去招惹敵人,就唔合格,做官都唔夠格,何況話想做特首。
對比唐唐,梁振英起碼學會收藏自己的野心,在公眾面前表現出謙虛。就是係扮出黎都好,起碼他肯扮,唐唐連扮都唔識。
至於范徐,本來都睇好佢,點知佢走出來撐唐。既然佢認為自己連政治弱智的政客也不如,我也不對她寄予厚望。
香港經歷了建華八年,亂了八年,再經歷了曾蔭權六年過渡式管治,可以說已浪費了十四年寶貴的發展機會。一個城市,等住改善的政策多不勝數,香港還能浪費幾年。有人話董伯伯有心為香港,但問題係,佢只係一名特首練習生,根本沒能力完成特首重任。曾蔭權好一點,佢借助董伯伯失敗經驗,學識左說話唔可以亂講,但佢都係一名特首練習生,只知咩野唔講得,唔知道作為特首,應該對世界傳達點樣既信息。
唐唐連董伯伯八年失敗經驗得來的教訓都唔識記取,胡亂發言,連曾蔭權都不如。須知香港市民無權選特首,但並非無權遊行,並非無言論自由。特首認受性低,七一多左人出來遊行,中央都會很頭痛。
講特首最佳人選,我心中只有一個--孫明揚。
唔知大家記唔記得,董伯伯八萬五推倒樓市後,是誰人成功執拾爛攤子?當羅范同李國章以劣政如基準試、殺校政策,把香港教育界弄得風聲鶴淚(不少教師跳樓自殺)之後,又是誰人負責收拾爛攤子?
答案都是--孫明揚。先是孫九招,後是微調政策,每次孫公都低調地大事化小,小事化無。這其實就是溫總有求於香港政府領袖的工作--化解社會深層次矛盾。拆彈工作要求低調,孫公做得到。雖然,孫公未至於好似奧巴馬或者溫總咁樣,有一種改革的信息傳俾全世界,但其實我覺得孫公有一種道家黃老無為精神,對於政策過份繁多,以及對於過份疲累的香港人來講,是十分逼切需要的一種處世態度。
比起董伯、煲呔和唐唐,孫公的政治手腕,遠遠超過一個練習生(trainee)的水平。香港已浪費不少時間,不需要更多的笨蛋練習生來當特首啦!
PS. 今集論政比較理性,話題也敏感嚴肅,唔落相了。
依家年青人都好忙嫁,唔係個個都出去做V煞。
唔好係電視見到幾個,就當哂全部80後都係果一班人先得嫁。
香港人把新聞節目所見當成100%現實世界,其實係缺乏傳媒教育所致。
indy
領袖要擁有感染力!現今香港社會邊個埋怨、批評、反對、鬧政府最大聲,似乎最有感染力!尤其是對於年青新一代來說!特首人選應在此中尋吧!
官的第一誡條:唔好揹鑊
你話佢地點會多做事?
多做事就多機會出事。
真領袖有一種本領,就是靠把口和靠做Show提高民眾的支持度,支持度高,官員做錯一兩件事都唔會令民眾反感。
有咁既條件,有心做事的官才敢放手一搏。
現在政府支持度不高,就算有好官,都不敢亂來,不敢做正事,因為一錯就揹到正。
所以,魅力領袖對香港來講好逼切需要。
indy
其實社民連影響力愈來愈弱,我唔覺佢地成到咩氣候。
反而社民連成功逼班官學得醒定左好多。
就呢點來講,社民連的行動不宜鼓勵,因為再攪大鑊D係會有危險,但佢地做野Show我覺得無白費。
官呢種人好怪,有壓力先會識得做事。
社民連正係俾緊一種有如癌細胞一樣的壓力給政府。
一個好人好姐係唔會戒口,但如果你話佢知佢有腫瘤,佢會聽醫生話去戒口。
只要官場有人做番正經事,社民連就會慢慢喪失Market,唔駛理。
indy
知、講但行難!有美好願景、抱負又如何?當欠缺其他人配合及支持,則無法執行,無法實現,只是徒然!有好領袖但沒有好團隊,有什麼用!難道反過來套用黃毓民議員昨日在立法會為暴力示威護航說:此乃官逼民反之表現!而將一切責任卸去嗎?坦白説:香港是一本全球獨有兼且越來越難讀的書!
話又唔係咁講,香港好明顯係缺緊一個有號召力的領袖人物。
領導香港查實唔一定要做到特首,當然坐正係好。
大家可能曾經忘記,有個人曾稱俾人稱為十點前特首,佢係鄭大班。
香港人需要一個代表他們講野,同埋向佢地講野並指出方向的人物。
鄭大班果時有D似。
美國的奧巴馬同我地溫總係呢類人物。印度以前有甘地,緬典有昂山素姬。新加坡曾有李光耀。
香港,無!
indy
香港如斯政治環境及氣氛,邊個做特首都死啦!換番一班實事求是的議員先再講啦!
花蛋凡人有理,望唐唐真是打退堂鼓。
蜀國無了趙雲關羽,唯有用黃忠。香港無將可用嘛。
孫公至少知道搞咩野會出爛攤子,不會製造更多。所以佢做返一屆都好丫。
香港回歸後正路政策行得不多,但爛攤子就搞出一籮籮,爛攤子減少,香港人先可以全力辦正事嘛。
indy
熱廚房, 不是人人願意做的. 可能唐英年在打退堂鼓, 才做些反智的舉動出來.
好的救火队长,不一定是好的领导人;不过目前香港立立乱,四围火头,救火队长上场要有排忙,或者刚刚够一任特首都唔定!
快樂多,憂愁少,祝福中秋節快樂。
闔家團圓,平平安安,事事如意!
Yes, 特首留番俾D傻人去做丫馬... 咁我寧取梁振英的「當仁不讓」,話哂佢備戰咁耐, ...
其實選錯特首,孫公都無好日子過,因為佢專責補鑊,到時補鑊補到佢傻。
孫公應該會選擇印印腳過晚年囉,邊仲有心情逐鹿中原呢. +1