樓市存泡沫風險 陳家強爆肚　鼓勵買股

【本報訊】財經事務及庫務局局長陳家強叫人買股票？陳家強昨出席一頒獎禮致辭時，竟在原定講稿上私人「加料」，「教路」投資者可考慮投資股市。此話一出雖 即時贏得在場人士熱烈掌聲，惟掌聲背後暗藏不少批評，指他作為財金官員鼓勵市民投資股市並不恰當。
記者：吳永強、石永樂

陳家強的致辭，主要是指近期資金流入，住宅樓宇市場帶來泡沫風險，相反投資股市，「相信在面對更加多的數據，我覺得市場有能力做好的分析，股市係一個好地 方引導投資，引導資金作分析，所以我喺呢度仍然好鼓勵各位投資股市嘅。」

昨出席同一場合、親耳聽到陳家強「教路」的城市大學商學院工管碩士課程主任曾淵滄，即時對局長的說話充滿「無限遐想」，直指陳家強的說法令他覺得政府是鼓勵市民投資股市，更對他個人投資取態有一定影響。
同 場的信永中和副管理合夥人盧華基則認為，陳家強為投資股票下「註腳」有失持平態度。他指陳家強的講話容易令投資者產生「誤會」，「佢之前（講稿前半段）有 提及到樓市，會唔會係政府嘅暗示，支持股市而唔支持樓市呢？」他並認為，「不應進一步講鼓勵大家去做呢啲嘢（投資股市），唔係就變咗欠缺作為特區任命官員 嘅一個持平態度。」
立法會財經事務委員會委員涂謹申認為，陳家強的講話「唔小心」，兼且算是「講錯嘢」。他指出，「不同嘅人聽呢句說話會收到不同 訊息。有啲人可能只係覺得股市都係一個值得考慮嘅投資途徑，有啲人就會覺得政府係咪想叫人入市。」他認為，作為財金官員作出具鼓勵性的評論有危險性，「佢 嘅身份會好容易令人產生錯覺。」

未知陳家強是否意識到在致辭時「講多咗」，會後被記者追問他是否鼓勵投資者入市時，他即時口窒窒「補鑊」：「我剛才是說股票市場是供大家投資用的，我提到 若投資者有足夠的數據，這是正常的投資活動，我當然是鼓勵的。」而陳家強新聞秘書及後亦就本報查詢作回應，指陳家強講話並無「失言」，其「好鼓勵各位投資 股市」的說法，是基於一連串大前提所作出。
對於陳家強忽然「爆肚」，財經事務及庫務局前局長馬時亨表示，由於自己未有深入了解事件，故不作評論；但他卻同時「可堪玩味」地拋下一句，「我在任嘅時候，有叫啲公公婆婆唔好買窩輪呢啲產品。」
另一名前問責局長王永平則認為，「財金官員講股市幾時都敏感㗎啦！但我唔覺得會有官員刻意呼籲人入市，會唔會俾人誤解咗係一個入市訊息就係另一回事。」

商務及經濟發展局前局長馬時亨：
「我唔作出評論！但我可以講你知喺我在任嘅時候有叫啲公公婆婆唔好買窩輪呢啲產品。」

城市大學商學院工管碩士課程主任曾淵滄：
「局長唔代表政府代表邊個？好多小市民會覺得呢句說話指𠵱家係（入市）的好時機……呢句話好有影響力㗎！」

信永中和副管理合伙人盧華基：
「可以講投資股票係一種可以選擇的投資工具，但不應進一步鼓勵大家去做呢啲嘢，唔係就變咗欠缺一個持平態度。」