香港仔舊大街的上海老店
上星期日一早同幾個朋友去了南丫島行山，之後乘街渡回到香港仔海傍，望望手錶，都只是4點左右，但肚皮卻響起訊號，Tea癮發作，可能行山活動多咗的緣故吧…遂和朋友一起在香港仔逛一下看看有甚麽好嘢食。在印象中，香港仔比較出名的都是海鮮，或以前的山窿魚蛋粉，但都已經不起歷史洪流沖擊而光榮結業了，現時剩下的大多是一些大型連鎖式餐飲食市，無甚特色。當我們都不寄予厚望之時，行到去香港仔舊大街那邊，忽爾眼睛不約而同被一間店舖吸引住，不是因為那是甚麼出色名店，也不是因為裝修得華麗堂皇，而是因為這小店在懷舊的裝潢下，一塊半身廚房大玻璃的透現中，我們看到一位赤膊上身的師傅在努力的搓緊小籠包皮，係呀，你沒有睇錯，是赤膊上身，相信現時的食市，就算是大排檔都好難見到如斯場面了。可能你會將此情此景定性為不專業，不衛生，但在我個人觀點是，這種視覺“風味“可能已“失傳”很久，是香港以前平民食堂風格的一個標誌，更何況衛生與否是在乎廚師的手法而不是佢嘅外觀。眼見師傅的熟練手藝，我們幾個的冒險精神忽然番哂嚟，決定入去試一下。
甫入店內，濃烈的八十年代風格影入眼簾，一種舊式上海飯店的裝修風格，門口是一個透明廚房，讓客人盡覽師傅做麵點的手工和蒸籠裡小籠包的滾熱辣，櫃台面還放滿了各式各樣的冷盤小食任君選擇，而店內貼滿一張張招牌餸的菜名，還有久歷風霜的海報，見證著昔日情懷，有點地踎的感覺，卻另有一番味道。和師傅聊了一會，原來他們已開業近二十年了，之前是在華富村那邊營業的，後來業主收番舖位，輾轉先搬到嚟舊大街現址繼續營業。
由於是下午茶關係，我們只叫了幾款點心醫肚，以免食唔落晚飯，小籠包當然唔小得，還有窩貼及生煎包，全部見師傅即叫即包，剩係呢樣都值回票價啦！
小籠包
即包即蒸，夠新鮮！質感唔似現時大部份小籠包店的那種薄皮湯包，而是舊式上海店那種，皮略厚，但筋性強唔會硬，用筷子夾住都唔會穿；而肉餡調味十分好味，雖然唔係現時食完就成啖湯喺口那種，但一咬落去肉汁都很豐富，唧哂出嚟，有點似南翔小籠包，懷念已久嘅味道即刻番哂嚟！
煎窩貼
一樣係現包即煎，一樣係懷舊味道，只是唔似以前那些舊式老店般煎得“硬篤篤”，這裡的卻煎得啱啱好，外脆內軟，一咬肉汁即標出嚟，超好味，我哋食完立即再加碼要多碟！
生煎包
包皮鬆軟，包底煎得微脆，只是略嫌肉餡小了一點，未夠盡情，但味道仍是o-i-shi呢！
雖然我們這次只試了包點，但其實見到鄰枱叫的酸辣湯，炒鱔瑚，上海粗炒及高力豆沙的賣相都似模似樣，吸引非常，下次一定要嚟試埋其他小菜至得。
個人覺得這小店的包點確是一絕，令我回憶起不少童年時嘅味道，自從銅鑼灣一品X結業後，相信亦很難再找到類似的上海老店了。所以我都是重覆一向所講的，這類小店在香港的營商大環境下，已經變得買少見少了！如果大家唔想以後出街食飯變得毫無選擇，只剩低那些千篇一律的連鎖式食市的話，請大家多D支持呢類小店，幫佢哋爭取多一點生存空間。
原文連結: 香港仔舊大街的上海老店
更多資訊，盡在: 古家私房菜
Facebook: https://www.facebook.com/myplayground2015
