BANKER個個氣管炎
2016/04/11 16:18:54 網誌分類: 經濟
索羅斯政治發燒友
懷疑歸懷疑，大家都只能夠靠估，但同樣係以爆料見稱的維基解密，其後就指洩密件的ICIJ，幕後推手是有組織犯罪和腐化曝光計劃（OCCRP）。OCCRP是由美國國際開發署（USAID）和索羅斯基金資助，專門為打擊俄國而成立。ICIJ打着言論自由、新聞自由的旗幟，發表該份報告，但當維基解密要求ICIJ公開所有密件，讓公眾檢索後，ICIJ卻拒絕。
索羅斯係金融界鼎鼎大名，佢除咗炒嘢叻外，仲係一名政治發燒友，曾成立基金推動東歐政治解體。有人話索羅斯主張資本主義，華爾街就係表現資本主義最高象徵的場地。佢豪擲銀彈推動政治改革，有人懷疑內有私心，希望藉此令全球金融一體化，在開放和資金自由流動下，令做金融狙擊手嘅佢更加如魚得水。不過，更貼切的睇法可能係，佢已經分唔清意識形態同搵銀之間的界線，好多時佢係一石二鳥，透過各種手段搞出天翻地覆的時間，既推動咗自己的政治理想，同時藉變身金融HITMAN大賺一筆，呢個亦係點解舊年人民幣匯價大幅波動時，內地政府一度對佢高度戒備的原因。
有人問我「巴拿馬文件」對於全球股市會有甚麼影響？我係網誌講過，開設離岸公司同戶口，好多人主要都要通過銀行去搞，所以好多國家，特別係西方民主國家都會對銀行加強監管，美國政府一向對美國人避稅睇得特別緊，所以唔單止會加強美國銀行的監管，即使在美國有業務的海外銀行都會受到影響。「巴拿馬文件」顯示有多家歐洲銀行的子公司特別活躍於開設那些離岸戶口，據聞美國執法人員正調查這些海外銀行有無違反美國法律，查出有事一定會處以巨額罰款甚至採取制裁。由於銀行參與涉嫌有走私漏稅活動，將提供藉口畀政客增加對銀行的監管條例，甚至建議增加對富人的徵稅。
匯豐屋漏偏逢連夜雨
咁啱美國銀行及歐洲銀行在「巴拿馬文件」公開以後，連日表現又真係唔係幾得，上周匯豐曾插落今年低位（45.8元），中環茶友話，匯豐腳仔軟，同摩根士丹利發表驚嚇目標價關係似乎大啲喎。摩笛呢次追魂，將目標價由51元降至45元，評級為「減持」。最震撼嘅係佢話，如果全球經濟增長放緩，中國經濟硬着陸及盈利停止增長，匯控最壞的情況，可能會跌番去2009年供股價的28元！我就覺得兩者互有表裏關係，銀行監管嚴過氣管炎，搞到BANKER個個氣咳無碇唞，今次巴拿馬事件手尾可以好長，最驚係爆完一間，會唔會仲有下一間，美歐國家係咁打擊金融違規，銀行做生意賺錢，賺埋賺埋都唔夠一鋪罰款，所以有銀行家講起呢次事件，佢瞪大雙眼同我講，我無買銀行股好耐啦，乜你唔知咩！
傢俬靚木價值連城
投資市場搵食難，好多財主講消費好過搵股炒。因為消費貴極有數計，炒股輸錢仲加「甘」！
消費要有品味，有時都要有窿路。中環茶友話，早幾日有人介紹佢識個英國傢俬大師MarkBoddington，都令佢增加見聞。呢個專做精品傢俬的英國大師，問寶號叫SilverliningFurniture主席MarkBoddington，佢創辦三十多年來專攻超豪華家具，特別擅長為豪宅、大屋、遊艇和私人飛機度身設計精緻家具，目標為富裕而有品味的人士提供指定服務。
Mark哥服務嘅有錢人物業遍佈不同地方，同時在歐洲地區訂製遊艇，佢要經常周遊列國。
講到多年做傢俬經歷，佢話最難忘係有個俄羅斯富豪，神神秘秘咁用私人飛機車佢去祖家，睇啱後豪擲巨款叫佢幫手設計傢俬，Mark哥自言佢當時面露難色，因為佢多年宗旨，係要為識欣賞嘅人服務，就算想幫襯都唔可以咁土豪？
英國大師為知己者服務
Mark哥仲即場騷咗雷射切割嘅靚木面板俾茶友欣賞，有款用人手鑲嵌金線，睇落手工真係唔錯。不過，最入心嘅係佢話入行多年，睇住靚木買少見少，價格係咁爆上，係好有價值嘅投資，聽到近排大歎無股好炒嘅茶友，即時心癢難搔想入番幾球貨！
陸羽仁
回應 (0)
我要發表