陸羽仁周記
陸羽仁周記
陸羽仁周記

王文彥施永青大鬥氣

2016/05/16 10:13:58 網誌分類: 經濟
16 May
        港股係五月至今,已經跌咗千幾點,上周四跌穿兩萬點,上周五再一度急插300點,市況認真麻麻,傳傳吓仲一度傳到好多大交易出問題,包括萬達係香港退市再上A股都可能有變,其後接近公司人仕就出來派定心丸,話今個星期會正式公佈私有化方案。由呢幾日變化,足證股海風高浪急。

        股場逐浪,本來是金錢遊戲,勝負以誰贏得最多銅鈿為標竿,這也是從商之道。不過,當人活到咁上下年紀,錢賺得唔少,但又多唔過李嘉誠時,睇嘢就唔淨係講錢。呢種心態,正係中原兩個老闆施永青同王文彥打足幾十年交,最近想講和想上市,最終又失敗嘅原因。

        中原美聯兩大代理行雄霸代理界廿年,係地產代理通街通巷多過茶餐廳,「中美」做到咁樣真係唔容易。兩大之中的美聯,喺1995年已經上市,97後吹起金融風暴,陸羽仁試過喺低於5毫子買佢,可惜賺咗一倍就放貨,錯過咗後來佢升10倍嘅大浪。

        中原上市要擱置

        美聯上市多年,中原一直無上市,除咗話生意好唔想益人,另一個原因係佢哋兩大股東施永青同王文彥不和。呢個情況直至去年,中原係內地畀對手用銀彈狂攻,陷入全面捱打後出現變化,長期控制住公司嘅老施終於向王文彥伸出橄欖枝,實行破冰,仲邀請昔日拍檔重返公司。

        不過,王文彥入番中原一段時間,早前就接受周刊訪問爆響口,話如果純粹從中原(香港)的層次來說,門店數目達到三百多家,此際樓市進入下跌浪及沒有業務新亮點的情況下,上市的股份價格將得不到理想的反映,根本上市的時機不好,也沒有上市的需要,反而建議研究是否需要讓中原(中國)直接或間接上市。佢仲順勢大彈中原(中國),話最近兩、三年在鏈家的打壓下,中原(中國)落了下風,他這次重回中原董事局,是為了深入了解現時中原(香港)和中原(中國)的種種情況,特別是何以中原(中國)在全國範圍內慘敗於一間成立不外十五年的對手鏈家,和研究中原上市的可行性。

        王文彥愈講愈興奮,大彈自己離開後,施永青一直獨攬大權,以道家思想「無為而治」管理公司,實際上讓下級公然鼓吹上級(老闆)不事作為,逃避及推卸領導人應負的職責。

        王文彥被老施圍堵廿幾年,今次借上市狂插,盡出多年怨氣。老施可能被佢激得㷫㷫哋,加上睇佢咁樣,所以早兩日就自爆,話唔會接受王文彥要求輪任主席嘅條件,仲會叫停中原(香港)上市,仲話唔排除會將公司清盤,然後安排集團另一間代理利嘉閣上市。

        據老施講法,若然王文彥同意上市,按A股估值可達700億元,現時搞喎咗,只係將利嘉閣上市,就只值11億元,真係蚊髀同牛髀,最大鑊係內地嘅對手又融資咗70億元同中原砌過,如果無銀彈,前景真係好難捱。

        大陸燒錢唔易頂

        聽完兩邊咁講,有人會覺得王文彥好唔理性。不過,佢照計唔係儍仔,佢係度阻住可能只係幾個理由,一,係佢要氣唔要錢,呢個可能性絕對存在,但關鍵係錢唔夠多嘅;二係佢等緊老施投降講數,爭取更佳條件;三,佢覺得老施所講係「𠱁」佢,尤其你話,中原上A股值700億元,係人都知A股估值天咁高,值幾多基本上任講,最緊要係𠵱家大把公司排緊隊上,幾時會輪到一間香港代理抽水先,既然係咁,不如自己玩吓嘢出吓氣先仲實際囉。

        香港樓市調整睇嚟唔會一年半載就結束,內地又進入L形經濟,係呢啲環境,吸多啲水度過寒冬本來係上算之事。被玩多年嘅呢次王文彥借住中原想上市演出一幕「王子復仇記」,跟住就睇老施點樣還招。王、施兩手惡鬥,好似金庸筆下西毒歐陽鋒同北丐洪七公攬住同歸於盡未知;不過,中原上唔到市其實都幾大件事,因為中原香港呢幾年最賺錢係2014,去年都仲幾好,但今年就差咗,如果二手樓再跌,咁就會過咗上市嘅窗口。講到中原中國,𠵱家內地樓市升溫,代理要搵錢就要趁快。國內做代理同香港唔同,香港做代理要搞舖位,又要有人腳班底,兩大放下用四個代理品牌,基本上已經形成半壟斷,但內地仲係玩緊燒銀紙遊戲,邊個反應慢啲都死,而且內地做代理無香港咁好搵,所以錯過咗上市機會,後果隨時好嚴重㗎!

        家全七福搬竇唔怕貴租

        灣仔食飯,最多人講嘅名人飯堂當然係福臨門啦。年前福記兄弟分家,整多間家全七福。家全七福係由「七哥」徐維均所創,最近仲搬咗地舖。福臨門幾年前分家,五哥、七哥兩兄弟競價,睇吓邊個承接老父衣鉢。本來人人看高七哥一線,點知七哥講到最後都係要真金白銀,賣咗股份自己另起爐灶「家全七福」。

        七哥新鋪佔地兩層,店名取父親的名字,加上他是第七位兒子。佢自幼獲家傳廚藝,希望將炸子雞、燒乳豬、荷葉飯、雞蓉官燕等傳統粵菜傳承下去,陸羽仁都去食過幾次,都頗欣賞佢嘅鳳吞翅。

        最近聽講家傳七福搬咗舖,新舖都喺灣仔,聽講七哥今次出價好高,大有志在必得之意,係今時今日咁環境,都可以話係勇字當頭。中環茶友笑言,福記喺灣仔開枝散葉,呢度係佢哋嘅福地,七哥家住山頂加列山道獨立屋,手頭大把銀彈,就算畀多啲銀彈,都係「面頭嗰浸」,無計啦,不過班客如果耐無去捧場,咁就要留意地址啦。

        陸羽仁

        
回應 (0)
我要發表
user