陸羽仁周記
陸羽仁周記
陸羽仁周記

國泰小股東的權利

2016/08/22 08:42:04 網誌分類: 經濟
22 Aug
        八月份唔少業績公佈,大市上周先受深港通消息左右,跟住就追隨業績炒作。上周四恒指首度企在兩萬三樓上收市,可惜呢個關口阻力唔細,周五收市再度失守兩萬三,跌85點,險守22900收市。全周計,恒指累積上漲171點;國指累積上升52點。美股周五偏軟。杜指收市報18552點,跌45點。納斯達克指數收市報5238點,跌1點。標普500指數收市報2183點,跌3點,全球股市係高位開始有啲無力,指數進一步又退一步,等緊九月份息口去向。

        騰訊上市後增長不斷

        上周宣佈業績,最搶眼嘅當然係騰訊(700),佢再交出亮麗業績,股價再創新高,佢上市以來增長不斷,至今買佢嘅都有賺,沽貨嘅都變成離場太早,可以話係新世紀最成功嘅股王。

        另一隻公佈業績惹起爭議嘅係國泰航空(293),佢盈利大跌超過八成,公佈後股價即插,上周收市11.2元,與今年低位10.7元相差不遠,跑輸咗大市2000點。有中環茶友話,國泰係一間唔錯嘅公司,但上市咁多年累積升幅唔大,可見買股除了揀啱入市時間,揀好嘅行業進入都好重要,好似騰訊係好行業加好公司,股價就爆升到七彩;國泰公司唔錯,可惜大環境唔同咗,上咗機嘅小股東,就行得慢咗。

        太古醒目慢機換快機

        國泰喺一九八六年上市,當時財經記者喺記者會問當年大班麥里士,將公司上市係咪擔心前途談判後,國泰前景不明朗,當時大班梗係唔認,仲話係要同小股東分享發展。而家睇番,國泰上市後,令控股公司太古可以騰出大量資源搞地產。當年國泰上市價係3.88元,最水係2010年尾升穿23元,之後就輾轉回落,差不多由高位跌咗一半,而家累升唔夠兩倍,同期寫字樓樓價由唔足兩千元一呎,升到而家兩萬元以上,先唔講太古將國泰上市,等如將風險同小股東一齊孭,呢一着慢機換着細機,證明係英明神武之舉。

        國泰當年上市,好多人懷疑係同主權回歸有關。因為國泰係英資,喺政府保護下長期變相壟斷本地航空業,隨着香港空運不斷發展,國泰高速增長,但呢個狀況喺主權決定回歸後變得不明朗,所以母公司太古決定將佢上市,賣咗部份股權畀市民大眾,大家同坐一條船,兼且攞番資金做地產。母公司咁做,同時亦代表國泰嘅高速增長期已過,變成一間穩定的公司。

        六四之後股價最風光

        雖然太古揀個靚價嫁女,但國泰都有過風騷時,喺國泰上市後幾年,內地發生咗六四事件,港股暴插近半,當時唯一保持股價表現嘅係國泰,當時大家話要移民,國泰生意必定唔憂做,加上佢嘅資產可以四圍飛,所以政治風險最低。呢啲理由而家睇落有啲幼稚,但當時大家就相當受落,喺咁情況下,國泰股價一枝獨秀,茶友就係呢個時候沽出佢申請返嚟嘅國泰股份,獲利超過一倍,而家睇番,當時市場追捧嘅理由唔係咁理性,醒目仔借意炒起,其實就係最佳沽貨時機,當時接棒者,到而家事隔二、三十年,其實無乜點賺過。當然,如果你阿Q一啲,咁多年國泰派息唔錯,點都抵銷到通脹,呢啲就係買有業務、有派息嘅實力藍籌嘅最基本保障。

        茶友形容國泰管理層唔錯,咁講唔係從股價增長睇,而係從佢哋維護公司利益作出嘅評論,喺回歸前航空業係厚利生意,要維持一啲都唔容易,係呢點管理層一直做得唔錯,雖然無咗英國政府嘅庇蔭,嚴格嚟講咁多年嚟無邊間航空公司可以挑戰到佢嘅地位,佢透過入股國航,併吞國龍,成功咁食到航空市場最大嘅一份餅。

        不過,近幾年廉價航空冒起,加上香港航空快速成長,令人擔心管理層死守多年的城市開始逐步失陷,加上多年來咁成功,體制難免龐大,轉身好難學新公司咁靈活,所以唔易維持競爭力。呢個就係好多人所講嘅範式轉移(PARADIGMSHIFT),好多大公司都唔能夠過渡呢個考驗。以國泰管理層過去嘅表現,相信成功機會比人大,但過程痛苦難免。呢個亦係短期股價受壓嘅原因。茶友話,小股東唔會亦無能力管理公司,呢個亦係佢哋最大嘅權利,能夠做嘅只係選擇喺適當時間買賣佢嘅股票,喺國泰上市三十年遙遙之路,就見證咗呢個簡單嘅道理。

        潮遊古巴做大爺

        暑假好多中環茶友去外遊,有茶友選擇去古巴,返嚟大聲話正,皆因令佢重溫幾十年前內地開放改革之初,港人北上,用小小錢就可以做大爺的快感。

        古巴係加勒比海唯一嘅白人國家,上世紀六十年代由於唔賣帳畀美國佬,用飛彈「隊」住華盛頓,於是俾美國經濟封鎖。呢兩年,奧巴馬大玩鬆章外交,好多人估美國好快有直航機去古巴,所以希望喺麥記、星巴克殺入前先去領略吓當地樸素嘅風土人情。

        茶友話,古巴行共產主義,政府仲係最大嘅老闆,佢住嘅酒店仲係國營,早餐見到盤生果有幾雙烏蠅喺上面,遊客出街買嘢仲係要用一種叫CUC嘅外匯券。加勒比海陽光與海灘最出名,佢畀多幾元外匯券(一兌十港元左右),就可以歎私家灘連飲品食物,係咪好似時光倒流返大陸開放初期呢!

        中國車代替美國老爺車

        茶友話,香港而家無直航去古巴,反而內地好似有。中古大家同係共產主義兄弟,一早就關照佢,提供好大嘅信貸額俾佢買國貨。古巴最出名係美式老爺車,呢啲無晒原廠零件,要用雜嘜拼湊嘅舊車,搞到成個首都汽油味,但講到新車就係中國嘅天下。內地喺委內瑞拉有車廠,再加埋比亞迪,基本上雄霸咗當地嘅車市,所以話人民幣雖然未國際化,但人仔同國貨早就走出咗國門啦。

        要去古巴,港人可以去中環搵名譽領事簽證,愛食雪茄嘅鄧永鏘係該國名譽領事,大家寫字樓就喺埋一齊。不過,茶友喺加拿大飛去,上到機就發覺有簽證派發,夠膽可以去到先填,咁就仲慳埋嚿幾水?!

        陸羽仁

        
回應 (0)
我要發表
user

網誌分類