炒賣產大不如細
2016/08/29 10:41:41 網誌分類: 經濟
加息係時間問題
耶倫在JacksonHole年會開金口，佢話近月來勞工市場表現穩健，加息條件已日益增強，聯儲局仍相信未來適宜循序漸進地加息；市場最關注下月或本年底聯儲局加息的機會，佢就唔肯透露半句。
據耶倫嘅講法，近月來勞工市場表現持續穩健，加上儲局對整體經濟和通脹前景的研判，近月來加息條件已日益增強。她指出，美國的勞工市場已接近充份就業，儘管早前能源和進口物價對物價造成暫時的下降壓力，大致仍向2%官方目標邁進。她說，未來美國的就業和通脹達致官方目標可期，聯儲局仍相信循序漸進加息是合適做法。耶倫在演辭中未有就加息時間發表評論。
佢又指出，在目前市場長期利率已甚低的情況下，一旦經濟危機出現時，聯儲局就算再把基準利率降至接近零，效果亦打折扣。耶倫唔講加息時間應該係留有彈性，佢講完嘢後美股同金價一度彈升，反映市場估計九月份加息機會唔大，因為如果九月就加息，佢應該講得逼切少少，加強市場預期。雖然九月加息機會一般，但儲局最新講法係美息上調只係時間問題，所以股市開心一陣就回復冷靜，最終杜指收市跌咗53點，收報18395點，納指就升咗6點，報5218點。
長地放樓愈傳愈誇
上個星期物業市場特別熱鬧，除咗好多新盤鬥搶客外，商廈物業大手成交都好多，其中最誇嘅係長地，先係傳佢會賣中環中心嘅業權，作價三百幾億元，跟住傳吓傳吓，傳到佢連長江中心、和記大廈等核心物業都放盤，合共成千億元資產掟出街。長和主席李嘉誠一向以眼光準確見稱，佢有大動作都被視為市場指標。兩年前佢喺內地賣出一啲資產，都已惹起揣測，若然話佢放售千億資產，若然係堅就好震撼啦。可能因為呢個消息太過嚇人，長地急急發聲明否認，強調無咁嘅事。
正常嚟講，中環中心業權已經賣散，而且位置偏近上環，同長江中心及和記大廈用嚟做集團總部嘅象徵地位亦好唔同，雖然話在商言商乜都有個價，但呢兩幢物業要嘅溢價，相信無乜人畀得起，所以我估中環中心易手機會唔低，但其他嘅核心物業放盤，可能就係講大咗。
中環中心傳聞會賣，買家有可能係內地嘅保險公司。中環茶友話，一幢中環嘅大廈就要賣300至400億元，而且仲唔係身價最貴嗰幾幢，香港物業幾貴可想而知。幾百億元基本上可以買一間中型銀行，可以開個覆蓋全港九嘅龐大零售網……可以做嘅嘢真係好多，所以有人想買，唔怪得好似長和咁疊水都心動。
會德豐冠君升幅唔細
內資嚟香港掃地產，呢兩年跡象愈嚟愈明顯，佢哋高價買地，又高價買商廈，之前買中環商廈，跟住灣仔，然後過海買紅磡，估計呢個潮仲會持續，所以見到猛起商廈賣俾佢哋嘅會德豐（020）今年升咗唔小。若然中環中心成交，相信會令到呢類物業市道更堅挺。
除咗龍頭巨企話賣嘢，股仔都一樣有類似動作。傳放售中環物業的恒和（513），上周五股價爆升後中途停牌，之後就話可能出售集團一間間接持控物業公司的權益，停牌前大升45%造0.168元。
對於炒作呢類公司，其實股仔好炒過藍籌，因為藍籌Size大，升起來無咁勁，但要買中就要有眼光加耐性。另一類受惠公司係房託，睇番手頭揸住寫字樓嘅冠君（2778），過去半年由3.7元剷上5元，買佢一樣係賺到開巷，仲唔係好似買領展（0823）咁俾人成日鬧添！
大小詹同科應考肥佬張心驚拉票
仲有一個星期唔夠就係立法會投票，中環茶友吹水不忘時局，尤其今年選情波譎雲詭，大家睇緊喺股壇有名堂嘅詹培忠，有無機會父子同科，齊齊掄元！
今年立法會選舉正經事無乜料到，但緋聞鬧劇就唔少。有專業界別好好先生畀人爆佢有婚外情，聞說有啲中環友睇到笑吟吟，因為識佢嘅人已預咗佢幾時畀人爆料，結果真係出事，最慘係搞到佢唔知認唔認好。但講到同股市有關，當然係金融服務界別，本來做緊嘅張華峰會唔會陰溝翻船。
殼后不滿掀暗湧
上屆由於做開嘅詹培忠臨門唔選，肥佬張執支好簽，就咁做咗尊貴嘅議員。本來，佢今屆好大機會無風無浪連任，點知最近幾個月證監搞咗個上市機制諮詢，肥佬畀人話佢想支持建議，由於方案包括限制啤殼同賣啤，咁就激怒咗有唔少票嘅殼后，搞到佢選情告急，畀詹培忠個乖仔有機可乘，從後殺上。小詹牙尖嘴利，加上有老竇加持，搞到肥佬騰騰震。聽聞，肥佬倒瀉蘿蟹，已經搞到佢個黨好緊張，即係走去同殼后講數，殼后話就話無事，係咪咁星期日就揭盅啦。
小詹呢次撼肥佬，輕裝上陣點都無得輸，至於佢老子轉戰直選，入閘前竟然染病，但諗唔到佢堅持落場，出閘後仲有唔錯走勢，雖然而家仲係半冷門，但無人敢睇死佢唔得。老詹講嘢一向出位，曾經有啲講法，搞到社會嘩然，佢要即刻解話，不過做人錯就要認，打就企定，最緊要唔好有膽做、無膽認，老詹當日講啲咁嘢，真係有啲不合時宜，但人總係會有失蹄，最緊要敢行番正，今日佢夠膽喺港島玩直選，仲有咁成績，勝負已經唔重要啦。
陸羽仁
回應 (0)
我要發表